6 อ เว๊ ล ควี๊งคูแกยแน่ ดี๊ เกล้ ทโอม๊า แบ อ เกล้ นอ ลี้ ช่องวีงวะ เท่อ, ดี๊ ล ซีงแฌ๊ ล้าง อ ซ้ะ แบ
พี่ จ ช๊องมอง เท่อ แบฆ้ะ ดี๊ จเกล้จพ้า นอ จ แกย จ คาง ลี้ฆ้าง ลู่ง กแช่แยว้ อลู่งอแท๊
กแช่แยว้ เนโพลทาง เอะ แย้ เกล้ ลู่ง ทม๊า ลู่ง กแช่แยว้ อ เมะแซ พ้า นอ, โอล๊าโอฆวี้ ดี๊ ทเซิงมึซ้ะมึ ลู่ง กแช่แยว้ อ จูงฆุ้ พ้า ล โค๊ นอ, โอ ดี๊ ทมึทพ้า ล้างชู้ล้างแกย ล้อ
โพล้ง พี่ โอเฌิ่งโอค๊า ลู่ง ทแบกแช่แยว้อซ้ะ นอ, ม โอม๊า เว๊ แบเด้าะ โพล้ง พี่ อ โพะ ทอ้าทซ๊าง อ ไค๊ นอ, ม ท้อง ลู่ง ทซี๊ง ล้อ
โพล้ง กุ้แฌ้ พี่ ลี้ฆ้างฌูง-อ้ะ นอ, ล นี่ เฌ๊ไท้ไท้ แบ ดี๊ ล นี่ เฌ๊ไท้ ท้อง ลู่ง เกล้ ท ม๊า แบ
อ อี้ง นอ เก กมืง เอโบ้งเอพะ เท่อ แม้ อ ซ้ะ เมะเว๊, อ เว๊ อาง เท่อ, ดี๊ เท้าซู๊ง อ นุ้ ดี๊ อ ไคล้ บี่อี้ง, “ จ ล แม้ ทอ้าทซ๊าง แบ ”
เกม๊า แม้พุ้แม้แด้ เกล้ ลู่ง น คาง อ ฌ่าง ฌ้อง น เกล้ กุ้บ้อง มเฌิ่งมค๊า เว๊ ล้อ
อไฌ่บี่อี้ง, โพล้ง อ เกล้ นอ, โอ ลู่ง กแช่ยาเว อ เมะแซ พ้า ดี๊ กแช่แยว้ โอคุ้แคว่ เว๊ อ เกล้ กุ้ บ้อง
กมืง เซ๊กูเฌ๊ฌ้อง นอ กุ้ซย้ะ เท่อ เซ๊ ล้างลื่ง อ ท โกงซีมองแบ โอ แซย้, ดี๊ ล ซีงแฌ๊ เท่อ น่างเม้ง แบ
อซื๊งเว๊ เอ ดุ้ กมืง พี่ อ แม้ กแม มืง กแม แคว๊ เท่อ, ล ก้ะ ได้ะ แบ, อซื๊งเว๊ แบ อ ซ้ะ แม้ ท เด้บ้ะ ครึๆ, ดี๊ โกง นี่ โพล้ง พี่ อ ซ้ะ คูๆ, ไค๊ๆ, ล แพ นอ, เกม๊า อ แม้ ท เด้บ้ะ ปะ, อซื๊งเว๊ ซอง ล้าง อ ซ้ะ เอ ดุ้ แน่แฌ่ แน่ท้า เท่อ ครึๆ, อซื๊งเว๊ เก โพล้ง พี่ กแช่ แยว้ ชู อ้า แบ-อ้ะ นอ ล้อ