เกล้​ท​ซ้ะวี่ง 18:12 - Northern Pwo Karen Thai Bible

¹² ทซู พี่ อ ฌี้ ทึ เลาพะ, ไซ้ะ ซไบ้ะ แซ ที๊ง พี่ อ ฌี้ ทึ, ดี๊ ทคลี๊งทโพ๊ เลาพะ, ดี๊ ทซูงทแซ อ วี่งคู ล ว๊าง, พี่ โพล้ง กุ้ แฌ้ เทว๊ เอะ กแช่ยาเว นอ จ เกล๊าง เอะ แน้ ล้อ

เกล้​ท​ซ้ะวี่ง 18:12 ပူးပေါင်းရင်းမြစ်များ

ทอคางไท้ะ 27:28

เกม๊า กแช่แยว้ เกล๊าง เอะ แน้ ปช้าง ที๊ง เฌ๊ล้างนี่ ลู่ง มุ้คู ดี๊ เกล๊าง เอะ แน้ ที๊งล่างค่างพ้า อ ทกู้งทล๊า เลา ดี๊ บืง, ดี๊ ไซ้ะ ซไบ้ะ แซ ที๊ง อ ซ๊าง แอฌี่งแอฌ้อง

2​กจุ้แฆว้ 4:42

กแคว๊ โอ ล แฌ้, เฌ๊นี่ ลู่ง เฌง บาอางชาลีชา, อ เว๊ เฌ๊ โชะ เอะ โพล้ง กแช่แยว้ เว๊ นอ อ เท่อ, โอ เว๊ แด กู เก ทซูงทแซ อ วี่งคู ล ว๊าง นอ, กู บาเล คี๊ง ชี๊ง ลอง, ดี๊ บืงแซ เชา อ ซ๊าง ชวี๊งล้าง เว๊ อ กเซ้าะ พ้า, ดี๊ เอลีชา ไจ้ะเว๊, “เกม๊า โพล้ง ลแพ นอ อาง เว๊”

2ทกวิ้ไน 31:5

ท่อง ทอางแบเลา ลี้ ท้อง นอ, โพล้งเฌงพูฆ๊างพู อีซลาเอง เกล๊าง เท่อ แอฌี่งแอฌ้อง, โอ เว๊ แด บืงแซ อ วี่ง คู ทึ, ไซ้ะ ซไบ้ะ แซ ที๊ง อ ซ๊าง, ไพ ซู อ เซ๊ง, นี๊จ้าง, ดี๊ ทซูงทแซ ลู่ง ไชะ พ้า ฆึ้ พ้า กุ้ อ เม้ง, ดี๊ อ ซื๊งเว๊ แม้นี่ ทชี๊งเชโป้ง ลู่ง ท กุ้เม้ง กุ้ มยู๊ นอ อ แกล้, เฌ๊โชะ เว๊ แอฌี่งแอฌ้อง

ทอางปฆ้า 147:14

กแช่แยว้ เกล๊าง ทฆู๊งทพุ้, ลู่ง น ค่างช๊า พ้า เกม๊า น บลิ้อาง ดี๊ บืงซาลี, พี่ อ ฌี้ทึ

ทอางปฆ้า 81:16

กแช่แยว้ ม ลื่ง-อ้ะ ดี๊ บืงซาลี, พี่ อ ฌี้ทึ “จ ม เกม๊า น แบเซิงแบซ้ะ ดี๊ นี๊จ้าง, พี่ เฌ๊นี่ ดี๊ โล่ง นอ ล้อ”

ทไจทางไฆวะ 22:29

“น ทซูงทแซ ลู่ง อ ฌี้, ดี๊ น ทแซ ที๊งนอ เฌ๊ เทว๊ เอะ แย้ ล น้าง, ซึ้ นี้ง ซึ้ ซ๊าง ล ฌี้ “ม๊า น เทว๊ พู วี่แซย่ นอ เอะ แย้

ทไจทางไฆวะ 23:19

“ทซูงทแซ ลู่ง อ ฌี้ ทึ, พี่ น ดิ้นี่-อ้ะ ลู่ง น ฌางคู ล่าง พ้า อ วี่งคู ล พ๊า นอ, น แบ เฌ๊ เทว๊-อ้ะ ลู่ง กแช่ยาเว น กแช่แยว้อล่างโอ พ้า นอ ล้อ “อางฆวี่ง แมะ พู ดี๊ อ มื้งแซย่ อ นู่ง ที๊ง ล ฌี้

ทไจทางไฆวะ 34:26

เกม๊า น แม้นี่ ทซูงทแซ พี่ อ แซทาง วี่ง ลู่ง อ ฌี้ ทึ, พี่ น นี่ แบ-อ้ะ ลู่ง น ฌางคู ล่าง พ้า นอ, เฌ๊ เทว๊-อ้ะ ลู่ง กแช่ยาเว น กแช่แยว้อล่างโอ พ้า นอ อางฆวี่ง แมะ พู อ แย ดี๊ อ มื้งแซย่ อ นู่ง ที๊ง ล ฌี้”

เอเซเคียง 44:30

ดี๊ ทซูงทแซ กุ้เม้งกุ้มยู๊ อ แซ ต้องคู ลู่ง อ ฌี้ ทึ, ดี๊ ท เทว๊ กุ้เม้ง พี่ เฌ๊นี่ ลู่ง น ซื๊ง อ ท เทว๊ เลาพะ นอ, ม เก โพล้งลื่งเท่ออคู ลแพ นอ อ เท่อ, น ฌื๊งไน้ะ ลู่ง อ ฌี้ ทึ นอ, เกม๊า น อางกีล้าง เอะ โพล้งลื่งเท่ออคู, บี่ซุ้ ทชูฌี้ ม โอ ลู่ง น เด้าคูล่างพ้า ล้อ

เลวี​อ​ไฌ่ 2:12

น ซื๊ง เมะ เฌ๊ โชะ เท่อ คี๊ง เม้ง อี้ง, เก ทซูงทแซ อ วี่งคู, เทว๊ เอะ กแช่ยาเว นอ ซี ปะ, แบเด้าะ เช้า ทาง เทว๊-อ้ะ ลู่ง ทลื่งล่าง อ คู, ดี๊ เกม๊า อ เก ท อ กลื่ง พี่ แบ กแช่แยว้ อ ซ้ะ ล ฌี้

เลวี​อ​ไฌ่ 2:14

“น เมะ เฌ๊โชะ ทลื่งทางเทว๊ทซูงทแซ, พี่ เก ท อ วี่งคู, เฌ๊ เทว๊ เอะ กแช่ยาเว นอ, เกม๊า น เทว๊ อ ซ๊าง น๊างเชา, อางแก-อ้ะ ท่อง อ ไฆ๊, ไฌะ อ คลี๊ง ท่อง อ บลิ้, เก ทลื่งทางเทว๊ทซูงทแซ, พี่ เก ทซูงทแซ อ วี่งคู ล ว๊าง

เลวี​อ​ไฌ่ 23:17

เกม๊า แม้นี่ กู คี๊ง ลอง, พี่ แม้ เว๊ ดี๊ ฌื๊งไน้ะ ลู่ง อ ฌี้ คี๊ง กีโล, ลู่ง น ซื๊ง ล่าง เปิ่งโอเปิ่งช๊อง พ้า นอ, เฌ๊ แม้ ท อ ไฌ่ เยาทาง เว่งว๊าง, เกม๊า แม้-อ้ะ ดี๊ ฌื๊งไน้ะ ลู่ง อ ฌี้ ทึ, ชวี๊งล้าง ดี๊ อ กูมีง อ ซีง, อางแก-อ้ะ เก ทซูงทแซ อ วี่งคู ล ว๊าง, เทว๊ เอะ กแช่ยาเว

เลวี​อ​ไฌ่ 23:20

เกม๊า โพล้งลื่งเท่ออคู แม้ ทไฌ่ เยาทาง เว่งว๊าง, ล พ๊าฆ่าง ดี๊ กู พี่ เก ทซูงทแซ อ วี่งคู ล ว๊าง นอ, เก ทลื่งาง เยาทาง เว่งว๊าง เทว๊ เอะ กแช่ยาเว, ล พ๊าฆ่าง ดี๊ แกะพู คี๊ง ดื้ง, เก ทเทว๊ พี่ อฌี้อแอว้ เทว๊ เอะ กแช่ยาเว, ลู่ง โพล้งลื่งเท่ออคู อ ฌ่าง

โล้​ล้างที๊ง​ทอางแม้เลา 18:3

ดี๊ อ อี้ง นอ, เมะเว๊ ท ล น้าง พี่ โพล้งลื่งเท่ออคู, นี่แบ เว๊ ดี๊ โพล้งเฌงพูฆ๊างพู, เมะเว๊ โพล้ง พี่ อ เทว๊ ทพูแฆ่ ลื่งทาง เท่อ, เมะ อ เก งู้ แพ๊ ฌี้, แกะ ฌี้ นอ, เกม๊า อ เว๊ แม้นี่ คาง เมะแย๊ ล โค๊ อ เช แย, อ บุ้แพ้ คี๊ง โค๊ อ แย, ดี๊ อ ฌู่โพ๊ง แย, เกล๊าง เอะ โพล้งลื่งเท่ออคู

โล้​ล้างที๊ง​ทอางแม้เลา 18:4

น บืง, น ไซ้ะ ซไบ้ะแซ ที๊ง, น ทซู, ดี๊ แกะ ชอง อ ต้องคู, พี่ น นี่แบ -อ้ะ ดี๊ น แกะ นอ, เกม๊า น เกล๊าง เอะ โพล้งลื่งเท่ออคู

โล้​ล้างที๊ง​ทอางแม้เลา 26:2

เกม๊า น แม้นี่ ฌางคู เลาพะ อซูงอแซ, พี่ น เก้านี่ ฆี๊นี่-อ้ะ ลู่ง น ที๊งล่างค่างพ้า, พี่ กแช่ยาเว น กแช่แยว้ เกล๊าง เอะ แน้ นอ, เกม๊า น แม้นี่ ทซูงทแซ นอ, ชวี๊งล้าง-อ้ะ ด้างเพะ พ้า, ลี้ โชะ ลู่ง ทล่าง พี่ กแช่ยาเว น กแช่แยว้ อางลึนี่ เว๊, บี่ซุ้ เกม๊า อเม้งอแซ โอ พี่ นอ

โล้​ล้างที๊ง​ทอางแม้เลา 32:14

เกม๊า เว๊ นี่แบ งู้ นู่งที๊ง, ดี๊ แกะ แมะ อ นู่ง ที๊ง นี่แบ แกะ พู อซูอไย้ ดี๊ แกะ แพ๊ อ ชื้อ บาชาง, ดี๊ แมะ ดี๊ บืง ซาลี ลู่ง อ ฌี้ ทึ ดี๊ นี่แบ ซไบ้ะแซ อ ซวีง, น นี่ โอ้ แบ ไซ้ะ ซไบ้ะแซที๊ง