10 ลู่ง ซ๊า ชี๊ง เนว๊ เนง ล เนง พ้า, พี่ โยอ้ะ กจุ้แฆว้ ค่าง ยูดา โพะคอง เท่อ อ ชู้ แค๊ นอ, เยโฮอาฮ้ะ อ พูแคว๊ เยโฮอะ โพะคอง ค่าง อีซลาเอง, โอ ลู่ง ซมาเรีย พ้า ชิ้ทาง ชี๊ง ฆู๊ง เนง
ดี๊ เยโฮอาฮ้ะ ซี๊ง ไท้ โอ ดี๊ อ พี๊ง อ พู๊ง ลู่ง แย๊, ดี๊ โพล้ง เคิงล้างบ้า-อ้ะ ลู่ง ซมาเรีย พ้า, ฌ้อง อ พูแคว๊ เยโฮอะ ทาง โพะคอง เท่อ เท่งก้ะ อ ล่าง
อ เว๊ แม้ ทอ้าทซ๊าง ลู่ง กแช่ยาเว อ เมะแซ พ้า, อ เว๊ ล วีงแซยไฆวะ อ ซ้ะ ดี๊ เนบ้ะ อ พู เยโรโบอาง อ ทเด้บ้ะ, พี่ อ แม้ เว๊ ดี๊ แม้ฌ้า โพล้ง อีซลาเอง ปะ นอ แบ, แบเด้าะ ลี้ ลู่ง ทเด้บ้ะ นอ อ พ้า
ลู่ง คี๊ง เนง ล เนง พ้า, ลู่ง เยโฮอาฮ้ะ อ พูแคว๊, เมะเว๊ โยอ้ะ กจุ้แฆว้ ค่าง อีซลาเอง อ ชู้ แค๊ นอ, โยอ้ะ กจุ้แฆว้ ค่าง ยูดา อ พูแคว๊, เมะเว๊ อามาซียา ทาง โพะคอง เท่อ
ดี๊ กแช่ยาเว ไคล้ ดี๊ เยฮู ไจ้ะเว๊, “ลู่ง น แม้ ทอฌี้, พี่ น แม้ ทอแบ ลู่ง จ เมะแซ พ้า, ดี๊ แม้ เอะ อาฮะ อชื้ออชะ กุ้เม้ง, พี่ โอ จ ซ้ะ พ้า นอ, น ชื้อ น ชะ ลี่ง ชู้ ม นี่ ชี๊น้าง แบ โพล้ง อีซลาเอง อ กจุ้แฆว้ อ ล่าง ชี๊น้าง คู”
ลู่ง เนว๊ เนง ล เนง พ้า, พี่ เยฮู อ ชู้ แค๊ นอ, โยอ้ะ เก กจุ้แฆว้, อ เว๊ โพะคอง เท่อ เว่ง เยรูซเลง พ้า ลี่ง ชี๊ง เนง, อ มู่ นอ อ เม้ง น่าง ซีบียา, เก โพล้ง เบเออเชบา
ลู่ง คี๊ง ชี๊ง ซ๊า เนง ล เนง พ้า, พี่ อาฮ้ะยา อ พูแคว๊ โยอ้ะ เก กจุ้แฆว้ ค่าง ยูดา นอ, เยฮู อ พูแคว๊ เยโฮอาฮ้ะ โพะคอง โพล้ง อีซลาเอง โอ ลู่ง เว่ง ซมาเรีย พ้า, ชิ้ทาง ชี๊ง เนว๊ เนง
พี่ เยโฮอาฮ้ะ กจุ้แฆว้ ลู่ง อีซลาเอง, อ พูแคว๊ เยโฮอะ ซี๊ง พ้องไฆวะ นอ, โยอ้ะ กจุ้แฆว้ ลู่ง ยูดา อ พูแคว๊ อามาซียา นอ, โอม๊า ได้ะ ชี๊งเย่ เนง
(ทกึทาง อ ซ้ะ อี้ง นอ, เกทาง บี่ซุ้ ดี๊ กแช่แยว้ อลู่งอแท๊, พี่ กแช่ยาเว โล้ เอะ เยฮู ไจ้ะเว๊, “น ชื้อ น ชะ ม ชี๊น้าง ลู่ง โพล้ง อีซลาเอง อ กจุ้แฆว้ อ ล่าง ชี๊น้าง คู, ท้อง โพล้ง ลี่ง ชู้” ดี๊ เกทาง เว๊ บี่นอ ล้อ)