1เปโต 4:3 - Northern Pwo Karen Thai Bible

³ พี่ น ซื๊ง แม้ เท่อ ลู่ง อ ไยะ แค๊ อู้งนอ, ฆวี๊ นอ แอ เย้า, ลู่ง อู้งนอ, น ซื๊ง แม้ เท่อ พี่ โพล้ง ล แบ้ แยว้ แบ ล แพ นอ แม้ เว๊, เมะ เว๊ แม้ อ ซ้ะ บี่ ซุ้ ทวีง, ซ้ะกวี้ง ล๊องก้อง เท่อ, จวี้ ไซ้ะ, ลื่ง อาง โละ ซ้ะ, โอ้ ไซ้ะ ฌ้อง เซ๊ ทาง เซ๊ ล้าง, ดี๊ โบง ทาง แบ้ ทาง ท เค่ง ท ฌ้าง ลู่ง อ อ้า อ ซ๊าง นอ

1เปโต 4:3 ပူးပေါင်းရင်းမြစ်များ

2​ซามูเอง 13:28

ฌ้อง อะซาโลง อางแบเลา อ เพล่ดู ไจ้ะเว๊, “น แคว่ดุ้ แฆว่-อ้ะ, อางโนง อ เซิง มึ ซ้ะ มึ ดี๊ ไซ้ะ ซไบ้ะ แซ ที๊ง ตแค๊เล้, ฌ้อง จ ม โล้ แบ น ซื๊ง บี่อี้ง, ‘เกม๊า แม้ ซี๊ง อางโนง’, อ นอ เกม๊า น ซื๊ง แม้ซี๊ง-อ้ะ เฆาะ, ซ้ะเม ล ฌี้ แย้ นอ จ อางแบเลา น ซื๊ง เย้า, ล เมะ แบ-อ้า?, เกม๊า น ซ้ะ ชอง ดี๊ เก โพล้ง ซ้ะ น้า แดเทา”

1​กจุ้แฆว้ 21:26

อ เว๊ แม้ เท่อ พี่ ล้างแช๊เมะไฌ๊ซ้ะ เต้ๆ, เมะเว๊ ลี้ โพะ ทเค่งทฌ้าง อ ไค๊, บี่ซุ้ดี๊ โพล้ง อาโมไร พี่ กแช่ยาเว เว่งว๊างไฆวะ-อ้ะ, เกม๊า พ้องไฆวะ ดี๊ โพล้ง อีซลาเอง อ เมะ อ แน๊ นอ อไฌะอไฌ่ กุ้เม้ง

2ทกวิ้ไน 15:8

ท่อง อาซา คุ้ช๊องแน แบ ทไคล้ ลแพ อี้ง, เมะเว๊ โอเดะ อ พู อาซารียา อ ทไคล้ คิ้ กแช่แยว้ นอ, อ เว๊ อ ซ้ะน้าทาง, อ เว๊ แม้เฌ๊ฌ้องไฆวะ ทล้างซ้ะลูซ้ะไล้ะ ลู่ง ค่าง ยูดา พ้า, ดี๊ ค่าง เบงยามีง พ้า เลาพะ, ดี๊ ลู่ง เว่ง ล จอง แบ ล จอง พ้า, พี่ อ ยึ นี่ก้ะ เว๊ ลู่ง ทลู่ง เอฟาอีง แพ้ล้อง, ดี๊ อ เว๊ แม้ ฌี้ไท้ กแช่ยาเว อ ทลื่งล่าง, พี่ อ โอ ลู่ง กแช่แยว้อล่างโอ, อ ทกางนึ อ เมะแซ พ้า นอ

อีซยา 28:7

อ ซื๊งเว๊ ล แพ อี้ง, ว้างมื่งว้างไร้ะไฆวะ ดี๊ ไซ้ะ ซไบ้ะแซ ที๊ง บี่ซุ้ โละซ้ะ ปะ ดี๊ เด้งเค๊งแดฆ้าง ดี๊ ไซ้ะที๊งมี่จ้าง โพล้งลื่งเท่ออคู ดี๊ โมไคล้คิ้กแช่แยว้ นอ, ว้างไร้ะว้างพาง ดี๊ ไซ้ะที๊งมี่จ้าง อ ซื๊งเว๊ ลแพ นอ, คูเยิ้งแน่เยิ้ง ดี๊ ไซ้ะ ซไบ้ะแซ ที๊ง อ เว๊ เด้งเค๊งแดฆ้าง ดี๊ ไซ้ะที๊งมี่จ้าง อ ซื๊งเว๊ แด ท แด เว้ ลเมะลโต้ แบ อ เว๊ บึ้ทะ ลู่ง ท ต้ะเซ๊ง พ้า

อีซยา 5:11

ท เซงทื่งเฌ๊ฌ้อง แบ โพล้ง ลแพ นอ, พี่ เฌ้เทิงทาง ลู่ง โฌ้ ล้างคึ บี่ซุ้ ลี้ ซยู๊ ฌูง ไซ้ะ ดี๊ โพล้ง พี่ โอ ท้อง ทไค้ะทแน้ ลแพ นอ ฌ้อง ไซ้ะ ซไบ้ะแซ ที๊ง, ดึ้ เกม๊า อ เว๊ ม้า เท่อ ล้างเท้าล้างเย้

อีซยา 65:4

โพล้ง ลแพ นอ, พี่ ชี๊น้าง โอ ลู่ง ไล๊ พ้า เคิงล้างบ้า ทจู ดี๊ มี๊งโท่ ลู่ง ทล่าง คุ้ซูงคุ้บีง พ้า โพล้ง ลแพ นอ, พี่ อาง ทุ้แย ดี๊ อ ทพ้าทล่าง พ้า, โอ ดี๊ ซ๊า พี่ โอ ดี๊ ทแย ลู่ง อ แบอ้า

เยเรมี 16:11

ฌ้อง นอ, เกม๊า น โล้ เอะ อ ซื๊งเว๊ ซีง ลแพ บี่อี้ง, ‘กแช่ยาเว ไจ้ะเว๊ บี่อี้ง, เป๊งนี่ น พี๊งชู้พู๊งชู้ ลู่ง แย๊ อู้ง, นี่ ญ๊องไฆวะ เฆ้อ, ดี๊ นี่ ลี้ โพะตไล่ ท กโช้งกแช่ อ แฌ้แพ อ ไค๊, ดี๊ แม้ เอะ เว๊ อ เท่อ, ดี๊ โบงทางแบ้ทาง ท กโช้งกแช่ ลแพ นอ, ดี๊ นี่ ญ๊องไฆวะ เฆ้อ, ดี๊ ล นี่ แฌแซกต้าง ก ทอางแม้เลา แบ

เยเรมี 16:18

ดี๊ ก ม แม้แอทาง แกไท้ อ ทไพ้ะทแม, ดี๊ อ ทเด้บ้ะ เก คี๊งโทะ, เป๊งนี่ อ เว๊ ดึ้ เกม๊า ก ค่าง แบอ้า ดี๊ ท ล้าง ซ้ะลูซ้ะไล้ะ อ จู, ดี๊ ดึ้ เกม๊า กคองกแซย้ โอฆวี้ ดี๊ อ ซื๊งเว๊ อ ท ล้าง แช๊เมะไฌ๊ซ้ะ นอ ล้อ”

เอเซเคียง 44:6

ฌ้อง เกม๊า โล้ เอะ ชื้อชะ พี่ อ เฌา กไบล้ะกแบล, เมะเว๊ อีซลาเอง อชื้ออชะ นอ บี่อี้ง, ทอดูทึโท๊ทึกแช่ยาเว ไจ้ะเว๊ บี่อี้ง, โอ้, อีซลาเอง อชื้ออชะ-เอ้อ, อวีงซ้ะชู้ เกม๊า น ซื๊ง ท ล้าง ซ้ะลูซ้ะไล้ะ กุ้เม้ง นอ ทึไฆวะ เว๊ ไช้ะ

เอเซเคียง 45:9

“ทอดูทึโท๊ทึกแช่ยาเว ไจ้ะเว๊ บี่อี้ง, โอ้, กเย่ อีซลาเอง อคูอแน่-เอ้อ, ฆวี๊ นอ แบ เย้า, เกม๊า ญ๊องไฆวะ ทชองทจุ้, ดี๊ ท แคแนแคแก้, ฌ้อง แม้ ท อเกิ้งอแบ, ดี๊ แม้ ท แบกแช่แยว้อซ้ะ, เกม๊า โอโท๊ไฆวะ ดี๊ ท โฌ๊ไจไฆวะ กพูกลี้ง ลู่ง ฌางคูล่าง พี่ เกก้ะ อ เท่อ นอ”, ทอดูทึโท๊ทึกแช่ยาเว โล้ เว๊ บี่อี้ง ล้อ

มาร้ะกู 7:22

ท ซ้ะกวี้ง ล๊องก้อง โพล้ง อ เท่อ, ท แม้ อ้า แม้ ซ๊าง, ทอางโล๊ อางเว้ง เท่อ, ท แม้ ลู่ง อ ล้างลุ้ ล้างเช้, ท ไคว๊ ท โญ้ง เท่อ, ท ไคล้ แช๊คู ดูซ้ะ เท่อ, ทอางปฆ้า ล้าง อ ซ้ะ, ท ซไล้ะ พะท๊าง ล กลุ้ ล จ้ะ แบ นอ

ท​แม้ 17:30

ลู่ง อ พ้อง ไฆวะ นอ โพล้ง ล ซีงแฌ๊ เท่อ แบ, อ กย้อง นอ กแช่ แยว้ ล ทื๊ง นี่ นะ นี่ เท่อ แบ ล้อ, แบเด้าะ ค๊องเนง โย้ กแช่ แยว้ อางแม้เลา กเย่ โพล้ง กุ้ จอง กุ้ ไจ้ เกม๊า อ เปลง ไท้ ซ้ะ อ ซ๊าง กุ้ อ แฌ้

โรมา 13:13

เกม๊า ก แม้ ก ซ้ะ ลู่ง อ เกิ้ง บี่ ซุ้ โพล้ง พี่ อ โอ ลู่ง ท พ้าง, แม้ ได้ ซ้ะ ล ฌี้, ม้า ไซ้ะ ล ฌี้, แม้ กแม มืง กแม แคว๊ ล ฌี้, แม้ เท่อ ลู่ง อ ล้างลุ้ ล้างเช้ ล ฌี้, ติ้ โละ ไอ โละ ซ้ะ ล ฌี้, ไคว๊ โละ โญ้ง โละ ซ้ะ ล ฌี้

1​โคเรง 12:2

น ซื๊ง ซีงแฌ๊ เย้า พี่ น ล แบ้ แยว้ ได้ะ แบ อู้ง นอ, ท โซ๊ง กแม น ซื๊ง ลู่ง เกล้ ตบลึ้ บ้อง, เกม๊า น ทื๊ง น นะ ท เค่ง ท ฌ้าง พี่ อ ล โอ ม๊า แบ

1​โคเรง 6:11

ลู่ง เอะ อู้ง นอ, แบ ล แฌ้ๆ, ลู่ง น ซื๊ง แกล้ แม้ อ ซ้ะ บี่ นอ ปะ, แบเด้าะ กแช่ แยว้ อ วีง ฌี้ แล้ แอว้, ดี๊ กแช่ เยซู คริ้ อางซฌ้ะ เช๊ง ไฆวะ น ซื๊ง เย้า, เกม๊า น เกก้ะ โพล้ง ฌี้ โพล้ง แอว้, ดี๊ เก โพล้ง แบ กแช่ แยว้ อ ซ้ะ เย้า

2​โคเรง 12:21

จ ไค๊ไก้ะ ลู่ง จ เฌ๊ ไท้ โคะ นอ กแช่ แยว้ ม เกม๊า จ ฌางแช้ ลู่ง น ซื๊ง เมะแซ พ้า, จ ม ฌาง เป๊งนี่ โพล้ง พี่ อ แม้ ท เด้บ้ะ ลู่ง อ พ้อง ไฆวะ ครึๆ, นอ ล เปลง ไท้ อ ซ้ะ ได้ะ แบ, ท แม้ ลู่ง ล ฌี้ ล แอว้ แบ ฌี้, ท แม้ กแม มืง กแม แคว๊ ฌี้, ท แม้ ลู่ง อ ล้างลุ้ ล้างเช้ ฌี้, ล ญ๊อง ไฆวะ เว๊ น่าง เม้ง แบ

กาลาเต 5:19

ท ยื้งแย่ ลู่ง กโพล้ง อ ซ้ะ พ้า นอ, แม้ อ ซ้ะ บี่ จะ เล้ ก ซีงแฌ๊ เย้า, เมะ เว๊ เกม๊า โพล้ง แม้ กแม มืง กแม แคว๊, แม้ ท ล ฌี้ ล แอว้ แบ, แม้ อ ซ้ะ บี่ ซุ้ ทวีง

กาลาเต 5:21

อ ซ้ะ ชิ้อิ้ โละ อ ซ้ะ, โอ้ ไซ้ะ ม้า ไซ้ะ, แม้ ได้ อ ซ้ะ, ดี๊ แม้ ท อ แฌ้แพ แบ ด้อง อ อี้ง, จ โล้ เอะ น ซื๊ง บี่ ซุ้ จ โล้ ตบลึ้ พ๊า เย้า, โพล้ง พี่ อ แม้ เท่อ บี่ นอ ล นี่ โอ แบ ลู่ง กแช่ แยว้ อ มื่ง อ บ้าง พ้า แบ เฆาะ ล้อ

เอเฟโซ 5:18

ม้า ไซ้ะ ล ฌี้, อ นอ ม แม้ เฌ๊ฌ้อง น ซื๊ง ล้อ, แบเด้าะ เกม๊า วีง ฌี้ แล้ แอว้ โอ ล๊า โอ ฆวี้ ลู่ง น ซื๊ง ซ้ะ พ้า

1​เทซาโลนีเก 4:5

เปล้ ล้าง น ซ้ะ ล๊องก้อง แม้ ได้ ซ้ะ บี่ ซุ้ โพล้ง ล ชื้อ แด ลู่ง อ ล ซีงแฌ๊ กแช่ แยว้ แบ แม้ เว๊ นอ ล ฌี้

ทีต๊ะ 3:3

อ ไฌ่ บี่ อี้ง, ลู่ง อ พ้อง ไฆวะ นอ ก เว๊ แด ก เก โพล้ง เฌ๊ฌ้อง, ล ชู่ง ล นะ เท่อ แบ, ก แบ ทอางโล๊ อางเว้ง, เก ท ซ้ะกวี้ง ล๊องก้อง ดี๊ ท มึ ท พ้า ตบลึ้ เม้ง อ ฆ่อง, ก แม้ ท อ้า ท ซ๊าง, ก ไคว๊ เท่อ โญ้ง เท่อ, ก แช๊เมะ ไฌ๊ซ้ะ โละ ซ้ะ

1เปโต 1:14

เกม๊า น ซื๊ง ชู่ง ลู่ง เน้ แท๊ กแช่ แยว้, แม้ โพะ น ท ซ้ะกวี้ง ล๊องก้อง อ ไค๊, พี่ น แม้-อ้ะ ลู่ง น ล ซีงแฌ๊ กแช่ เยซู ได้ะ แบ อู้งนอ ล้า ล ฌี้

ยูด้ะ 1:4

อ ไฌ่ บี่ อี้ง โพล้ง แบ ล แฌ้ๆ, เฌ๊ นึ ฆ้าง ลู่ง ก แกล้, แบเด้าะ ก ล คลึ้ แคว่ ที๊ง-อ้ะ แบ, โพล้ง ล แพ นอ ล ชู่ง กแช่ แยว้ แบ, อซื๊งเว๊ เปลง ไฆวะ ท ไฌ่, แบฆ้ะ ดี๊ กแช่ แยว้ อ โก้ง อ โบ้ง อ บลึ้ อ บลาง, บี่ ซุ้ ม แม้ เท่อ ลู่ง อ ล้างลุ้ ล้างเช้ ซี, ดี๊ ล ทื๊ง ล นะ กแช่ เยซู คริ้ พี่ อ เก ก กแช่ ล แฌ้ ล้อ นอ ล้า แบ, ไละ ฌี้ ไละ แอว้ โล้ เว้ เว๊ ไยะ เย้า, แบฆ้ะ ดี๊ อซื๊งเว๊ อ เตา อ แต๊ อี้ง นอ