1 ยอห์น 4:9 - พระคริสตธรรมคัมภีร ภาคพันธสัญญาใหม

⁹ นี่​คือ​วิธี​ตี้​พระเจ้า​แสดง​ความ​ฮัก​ต่อ​เฮา คือ​พระองค์​ส่ง​พระบุตร​องค์​เดียว​ของ​พระองค์​มา​อยู่​ใน​โลก​นี้ เปื้อ​เฮา​จะ​มี​จีวิต​นิรันดร์​โดย​ผ่าน​ตาง​พระบุตร​ของ​พระองค์​นั้น

1 ยอห์น 4:9 ပူးပေါင်းရင်းမြစ်များ

มาระโก 12:6

เจ้าของ​สวน​ยัง​มี​แหม​คน​นึ่ง เป๋น​ลูกบ่าว​ตี้​เขา​ฮัก จึง​ส่ง​ลูก​ไป กึ๊ด​ว่า ‘คน​เจ้า​หมู่​นั้น​ก็​จะ​นับถือ​ลูก​บ่าว​ของ​เฮา​พ่อง’

ลูก๋า 4:18

“พระวิญญาณ​ของ​องค์​พระผู้เป๋นเจ้า​อยู่​กับ​ข้าพเจ้า ย้อน​ว่า​พระองค์​ได้​ตั้ง​ข้าพเจ้า​ไว้ หื้อ​บอก​ข่าวดี​แก่​คน​ตุ๊ก พระองค์​ใจ๊​ข้าพเจ้า​หื้อ​บอก​นักโต้ษ​ว่า​เขา​จะ​มี​อิสระ หื้อ​บอก​คน​ต๋าบอด​ว่า​เขา​จะ​หัน​แหม หื้อ​บอก​คน​ตี้​โดน​ค่ำ​ว่า​จะ​ป๊น​ตุ๊ก

ยอห์น 10:10

คน​ขี้ลัก​นั้น​ก็​มา​เปื้อ​ลัก ฆ่า กับ​ทำลาย​เต้าอั้น แต่​เฮา​มา​เปื้อ​คน​ตี้​เป๋น​แกะ​ของ​เฮา​จะ​มี​จีวิต เซิ่ง​บ่ขาด​อะหยัง​เลย

ยอห์น 14:6

พระเยซู​อู้​กับ​เขา​ว่า “เฮา​เป๋น​ตาง​นั้น เป๋น​ความ​จริง กับ​เป๋น​จีวิต บ่มี​ใผ​ไป​หา​พระบิดา​ได้​นอกจาก​มา​ตาง​เฮา

ยอห์น 3:16

“ย้อน​ว่า​พระเจ้า​ฮัก​โลก​นี้​นัก​ขนาด จึง​หื้อ​พระบุตร​องค์​เดียว​ของ​พระองค์ เปื้อ​กู้​คน​ตี้​เจื้อ​วางใจ๋​พระบุตร​นั้น​จะ​บ่ฉิบหาย แต่​มี​จีวิต​นิรันดร์

ยอห์น 3:18

คน​ใด​ตี้​เจื้อ​วางใจ๋​พระองค์​นั้น​ก็​บ่ถูก​ลงโต้ษ แต่​คน​ใด​ตี้​บ่เจื้อ​วางใจ๋​พระองค์​ก็​ได้​ถูก​ตัดสิน​ลงโต้ษ​ไป​แล้ว ย้อน​เขา​บ่ได้​เจื้อ​วางใจ๋​พระบุตร​องค์​เดียว​ของ​พระเจ้า

ยอห์น 5:23

เปื้อ​หมู่​คน​ตึง​หมด​จะ​หื้อ​เกียรติ​พระบุตร​เหมือน​ตี้​หมู่​เขา​หื้อ​เกียรติ​พระบิดา คน​ตี้​บ่หื้อ​เกียรติ​พระบุตร หมู่​เขา​ก็​บ่หื้อ​เกียรติ​พระบิดา​ผู้​ตี้​ใจ๊​พระบุตร​มา​ตวย

ยอห์น 6:29

พระเยซู​ก็​ตอบ​ว่า “สิ่ง​ตี้​พระเจ้า​ใค่​หื้อ​เยียะ​ก็​คือ​เจื้อ​วางใจ๋​ผู้​ตี้​พระองค์​ใจ๊​มา”

ยอห์น 6:51

เฮา​เป๋น​ของกิ๋น​ตี้​หื้อ​จีวิต​เซิ่ง​ลง​มา​จาก​สวรรค์ ถ้า​ใผ​คน​ใด​กิ๋น​ของกิ๋น​นี้ เขา​จะ​มี​จีวิต​นิรันดร์ ของกิ๋น​นี้​ก็​คือ​เนื้อหนัง​ของ​เฮา ตี้​เฮา​จะ​หื้อ​คน​ใน​โลก​เปื้อ​มี​จีวิต​นิรันดร์​ได้”

ยอห์น 6:57

เหมือน​ตี้​พระบิดา​ผู้​มี​จีวิต​อยู่​ใจ๊​เฮา​มา และ​เฮา​มี​จีวิต​ย้อน​พระบิดา จาอั้น​คน​ตี้​กิ๋น​เนื้อหนัง​กับ​เลือด​ของ​เฮา​ก็​จะ​มี​จีวิต​ย้อน​เฮา​เหมือน​กั๋น

ยอห์น 8:29

พระองค์​ผู้​ตี้​ใจ๊​เฮา​มา​ก็​อยู่​กับ​เฮา​ตวย พระองค์​บ่เกย​ละ​เฮา​ไว้​หื้อ​อยู่​คน​เดียว ย้อน​เฮา​เยียะ​ต๋ามใจ๋​พระองค์​ตลอด”

ยอห์น 8:42

พระเยซู​ก็​อู้​ว่า “ถ้า​พระเจ้า​เป๋น​ป้อ​ของ​หมู่​ต้าน​แต๊ๆ หมู่​ต้าน​ก็​จะ​ฮัก​เฮา ย้อน​เฮา​มา​จาก​พระเจ้า​และ​เฮา​อยู่​นี่​แล้ว เฮา​บ่ได้​มา​โดย​ต๋ามใจ๋​ตั๋ว​เก่า แต่​พระเจ้า​ใจ๊​เฮา​มา

ยอห์น 9:3

พระเยซู​ก็​ตอบ​ว่า “บ่ใจ้​บาป​ของ​เขา​กาว่า​ของ​ป้อ​แม่​เขา แต่​ตี้​ป้อจาย​คน​นี้​ต๋า​บอด​ก็​เปื้อ​คน​ตังหลาย​จะ​ได้​หัน​ฤทธิ์​อำนาจ​ของ​พระเจ้า​ผ่าน​ตาง​จีวิต​ของ​เขา

โรม 8:32

แม้แต่​พระบุตร​องค์​เดียว​ของ​พระองค์ พระองค์​ก็​บ่ได้​ขาง แต่​ยัง​ยก​หื้อ​หมู่​เฮา​กู้​คน​ได้ ถ้า​เป๋น​จาอี้ จะ​บ่โผด​หื้อ​กู้​อย่าง​แก่​หมู่​เฮา​ตวย​กา

ฮีบรู 1:5

ย้อน​ว่า​บ่มี​ทูตสวรรค์​ต๋น​ใด​เลย​ตี้​พระเจ้า​เกย​อู้​กับ​เปิ้น​ว่า “เจ้า​เป๋น​ลูก​ของ​เฮา วัน​นี้​เฮา​ได้​เป๋น​ป้อ​ของ​เจ้า​แล้ว” กับ​บ่ได้​อู้​กับ​ทูตสวรรค์​ต๋น​ใด​ว่า “เฮา​เป๋น​ป้อ​ของ​เจ้า เจ้า​เป๋น​ลูก​ของ​เฮา”

1 ยอห์น 3:16

จาอี้​เฮา​จึง​ฮู้​ว่า​ความ​ฮัก​เป๋น​จาใด คือ​พระคริสต์​ได้​สละ​จีวิต​ของ​พระองค์​เปื้อ​เฮา​ตังหลาย เฮา​ก็​สมควร​จะ​สละ​จีวิต​ของ​เฮา​เปื้อ​ปี้น้อง​ผู้เจื้อ​ของ​เฮา​ตวย

1 ยอห์น 4:10

ความ​ฮัก​ก็​เป๋น​จาอี้​ละ บ่ใจ้​ว่า​เฮา​ฮัก​พระเจ้า​แต่​ว่า​พระองค์​ฮัก​เฮา จึง​ส่ง​พระบุตร​ของ​พระองค์​มา​เป๋น​เครื่องปู่จา​เปื้อ​ฮับ​เอา​ความ​บาป​ของ​เฮา​ไป

1 ยอห์น 4:16

ย้อน​จาอั้น​เฮา​ตังหลาย​เถิง​ฮู้​ตึง​ไว้วางใจ๋​ใน​ความ​ฮัก​ตี้​พระเจ้า​มี​ต่อ​เฮา พระเจ้า​เป๋น​ความ​ฮัก คน​ตี้​ฮัก​พระเจ้า​กับ​ฮัก​คน​อื่น ก็​เป๋น​น้ำ​นึ่ง​ใจ๋​เดียว​กั๋น​กับ​พระเจ้า พระองค์​ก็​เป๋น​น้ำ​นึ่ง​ใจ๋​เดียว​กั๋น​กับ​คน​นั้น

1 ยอห์น 5:11

สิ่ง​ตี้​พระเจ้า​ยืนยัน​กับ​เฮา​คือ พระองค์​ได้​หื้อ​จีวิต​นิรันดร์​กับ​เฮา​แล้ว กับ​เฮา​ได้​จีวิต​นั้น​ผ่าน​ตาง​พระบุตร​ของ​พระองค์

1 ยอห์น 5:13

ข้าพเจ้า​เขียน​เรื่อง​นี้​เถิง​หมู่​ต้าน​ตี้​เจื้อ​วางใจ๋​ใน​พระบุตร​ของ​พระเจ้า เปื้อ​หมู่​ต้าน​จะ​ฮู้​ว่า​ต้าน​มี​จีวิต​นิรันดร์