Yoosuwa 15:8 - NABUWWA KEE MALIKWA

⁸ Too aracaak Hinnom-Golok qaxa-qaxa gacca 'yah, gabbi-qaxak Yarusalaam deqsitta magaalay Yabuusâ mari elle yanihiyya fan gufa. Tokkeek cuduud keenikii, Hinnom deqsitta golok ayrô-culma le kabut raqta koomah amoh amma 'yaanam guffa haah, tokket yaade. Tohumuu, Refaayim Golo deqsitta golo kilbat le kabuk edde taadee aracak ten.

Yoosuwa 15:8 ပူးပေါင်းရင်းမြစ်များ

2 Samuwel 5:18

Filistiin-mari Refaayim Golo deqsitta golo gufen waqdi elle yinfiddigen.

2 Samuwel 5:22

Filistiin-mari kaadu qagteh yemeeteeh Refaayim-Golol yinfiddigen.

2 Malikwa 23:10

Hinnom deqsitta goloh addal, yalla axcuk yaqbuden duyyeh qibaadah heen aracay Toofet deqsita foyya keenik abe. Toh keenik akah abem, too aracal duma Molok deqsitaamih sadgatah isinni xaylo girat qidak sugen. Toh elle abe waana'gidih, too arac foyya keenik abe.

1 Aydaad 11:4

Ayrok teena Malik Dawud kee inkih tan Israayil ummatta, Yarusalaam magaalat qeebi abta'gidih gexxe. Too saaku Yabuusa akak axcuk yenen kedoh yooboke mari woo magaalal dabaaqah yeneeh; magaala kaadu migaaqah Yaabus deqsitak ten. Yabuusâ mari woo baaxol naharak nooke marak ten.

2 Aydaad 28:3

Hinnom deqsitta golol gabat bicsen duyyeh qaydarus qeerisak suge. Kaadu girat isi xaylo sadgatah qide. Woh akah abem, Israayil-mari yamaateemik naharal woo baaxol suge maray YALLI yeyyeeqehiyyak raaqisen umâ-yabulih tan qaadah gabbaaqiyyak ten.

Nacmiya 11:30

Danowac kee Qadullam deqsitta magaala kee a sidiica magaaloolih dariifal tan gaandoodil dabaaqah gacen. Ta magaalooli kee gaandoodik kalah kaadu, Laakis deqsitta magaala kee a magaalah dariifal tan baqurê-baaxol dabaaqah gacen. Qadeeka deqsitta magaala kee woo magaalah dariifal tan gaandoodil kaadu dabaaqah gacen. Tonnal, Yuudah yooboke mari elle nooke baaxo, gabbi le qaxak Bersabaq kee kilbat le kabuk Hinnom Golo deqsita namma aracih fanat ten.

Yasaqya 17:5

Israayil, daro elle tooboke baaxoy woo daro akak orbiseenihiyyah innah gacele. Refaayim Golo deqsitta golol sugte buqrey daro orbisa mari cabem akak yifiileenih foyyah raqtehiyyah innah gacelon.

Ermiyaas 19:14

Too yaabay YALLAK yol oobehiyya Toofet deqsita aracal warisak sugga exceh, gaba kale waqdi uduureh. Uduure waqdi, Yallih Qibaadah-Qarik daaratal solla exceeh, inkih tan ummat lih yaabe.

Ermiyaas 19:2

Ken lih gacca 'xicay Galqi deqsitta afaak, Hinnom Golo deqsita arac fanah gexa» yok iyye. «Tokke gufta waqdi intaamahaa,

Ermiyaas 19:6

Tonna'mmay a arac migaaqah Toofet madeqsitaay Hinnom Golo madeqsita. Takkay immay, Masgaadâ-Golo deqsitele. Too ayroora gitat tan.

Yoosuwa 15:63

Tonna'mmay Yuudah yooboke mari Yarusalaam addal yen Yabuusa deqsita mara woo magaalah addak yayyaaqoonu maduudinnon. A saaku fanah woo mari woo magaalal ken lih dabaaqah yanin.

Yoosuwa 18:16

Tokkeek cuduud keenik Refaayim Golo deqsitta golok kilbat le kabut raqta qaley Hinnom Golo akak amballayuk raqtahiyya fanah ooba. Tokkeek Hinnom Goloh addal gacca 'yeh Yarusalaam amot akak raqta qalel gabbi-qaxal tan ullulluk Qenrogel deqsita buyyi fanah yamaate.

Yoosuwa 18:28

Xelaq kee Eelef kee, Yaabus deqsitta magaalay sarra Yarusalaamal muggaaqiseenihiyya kee, Gibqa kee Kiryat-Yaqaarim akkuk ten. Too magaalooli tittat taban kee affara magaala akkuk ten. Tohuk kalah too magaaloolih dariifal tan gaandoodi kenim tekke. Benyaamah rade mari gee baaxo mangah too gide akkuk ten.

Makaabon 1:21

Benyam marah tu gactek, Yabuusah yooboke maray Yarusalaam addal sugehiyya woo magaala yibbixen saaku mayyaaqinnon. Tonna-leemiik Yabuusâ-mari, Benyam-mara lih too magaalal elle raaqen.

Makaabon 1:8

Yuudah yooboke mari Yarusalaam magaalat qeebi abeenih, woo magaala woo qeebit yibbixen. Magaalal suge mara qideeniih, magaalat gira ruuben.

Makaabon 19:10

Too bar tokkel xiinaanam kaal tigibdiyeeh, tohuk gexxaamah kaa kee kay barraay kay taamah num, namma dananay koori elle heenihiyya luk daqaarimen. Sarrak magrib radam faxa waqdi, Yaabus deqsitta magaalay sarra Yarusalaamal muggaaqiseenihiyya gufen. Too waqdi isi taamah num, «Ahaysa a Yabuusâ-marih magaalal xinna'gidih daggawnu wayna» kaak iyye.