Yoosuwa 13:5 - NABUWWA KEE MALIKWA

⁵ Gabal deqsita marih baaxo mabbaxinniton. Ayrô-mawqa le kabut raaqa Lubnaan rasu kaadu uxih mabbaxinniton. Tohumuu, Baqal-Gaad magaalay Cermon qalek gabbi qaxat raqtahiyyak xabba haanamaay Camat deqsita daabah amma 'yaanam tan baaxok ten.

Yoosuwa 13:5 ပူးပေါင်းရင်းမြစ်များ

1 Malikwa 5:18

Suleeman maraa kee Curam maray gabâ-naggaarinna luk yenehiyya kee, Biblos-magaalah mari, Qibaadâ-Qari edde xisoonu waan cooxih missoysiyyá kee xeetih-oriyyih bicsat gacen.

1 Malikwa 8:65

Qibaadâ-Qaril Suleeman kee inkih tan ummatta Iraawô-Dabih-Qiid deqsita qiidih YALLAY ni Dagelta kinni aynabukuuy africuk malcina ayro qiidih asen. Too qiidih gaaboowe mari kaxxam manguk yeneeh; Camat deqsitta daabak xabba haanamaay Masri cuduudul yan daqaarah amma 'yaanam baaxok inkih mango mari woo qiidih yemeete.

Yasaqya 10:9

Kalnu kee Karkamis magaalah marak carbil eyseh. Tonnah kaadu Camat kee Arfad magaalah marak carbil eyseh. Samaariya kee Damaskoh magaalah marak kaadu eyseh.

Ermiyaas 52:9

Kaa yibbixeenih. Sarrak Camat rasuk Ribla deqsita aracay Baabelon malik elle yenehiyya fanah kaa been. Tokkel malik digaala kaal hee.

Yacedkel 27:9

Markab addat Gabal rasuk yemeete naggaarinna le mari yeneeh, too maray kaxxa ixxiga lehiyya, markabat luucaan fanak lee cultaamak, dubaalat edde heen. Badal gexxa 'ya maraakibit yan bacriyya-mari, tellemmô duyye kok xaamitoonuh kol amaatuk sugen.

Qaamus 6:2

Kalne deqsitta magaala fanah gexay wokkel tanim ubula! Wokkek bisoh taturra 'xicay Camat deqsitta kaxxa magaala kee Gaat deqsitta magaalay Filistiin mari elle yanihiyya fanah gexay tanim ubula. Woo mari siinik maay yayseeh, ken baaxo sin baaxok maay taysee? Mataysa.

Yoosuwa 11:17

A baaxo xexxaarah Calak deqsitta qaley Edom baaxoh garit tanik xabba haanamaay Baqal-Gaad deqsita aracay Lubnaan-Daqaral yanihiyyah amma 'yaanam fanah xexxar kee nabnah akkuk ten. Lubnaan-Daqar Cermon qalek ragidit raaqa. Yoosuwa ta baaxooxah amoytittet qeebi mango wakti fanah abak suge. Takkay immay inkih qeebit ken yibbixeeh ken qide.

Yoosuwa 11:3

Qagteh kaadu, Kanqaan baaxoh maray ayrô-culma kee ayrô-mawqat raaqahiyya kee, Amoorah yooboke maraay, Ciitah yooboke maraay, Feriidah yooboke maraay, Yabuusah yooboke maray woo qaleelah tan baaxol guubuh yenehiyya kee, tonnah kaadu, Ciiwih yooboke maray Cermon qaleh ragidil Mixfa deqsitta baaxol guubuh yenehiyyah edde farmo ruube.

Yoosuwa 12:7

Yoosuwa kee Israayil ummat kaadu Ordonuk ayrô-culma le kabut raqta baaxo yibbixen. Tohumuu, Baqal-Gaad magaalay Lubnaan Golol tanihiyyak xabba haanamaay Calak qaley Edom marih cuduudut xayuk raqtahiyyah amma 'yaanam tan baaxol, malikwah suggu 'ye mara inkih selli heen. Yoosuwa too baaxo Israayil marah kedo kedol kurra heeh, kulli way ikoytah takke'gidih keenih yecee.