Yoosuwa 12:7 - NABUWWA KEE MALIKWA

⁷ Yoosuwa kee Israayil ummat kaadu Ordonuk ayrô-culma le kabut raqta baaxo yibbixen. Tohumuu, Baqal-Gaad magaalay Lubnaan Golol tanihiyyak xabba haanamaay Calak qaley Edom marih cuduudut xayuk raqtahiyyah amma 'yaanam tan baaxol, malikwah suggu 'ye mara inkih selli heen. Yoosuwa too baaxo Israayil marah kedo kedol kurra heeh, kulli way ikoytah takke'gidih keenih yecee.

Yoosuwa 12:7 ပူးပေါင်းရင်းမြစ်များ

Yoosuwa 11:17

A baaxo xexxaarah Calak deqsitta qaley Edom baaxoh garit tanik xabba haanamaay Baqal-Gaad deqsita aracay Lubnaan-Daqaral yanihiyyah amma 'yaanam fanah xexxar kee nabnah akkuk ten. Lubnaan-Daqar Cermon qalek ragidit raaqa. Yoosuwa ta baaxooxah amoytittet qeebi mango wakti fanah abak suge. Takkay immay inkih qeebit ken yibbixeeh ken qide.

Yoosuwa 11:23

Tonnal YALLI Muusa akah amrise innal, Yoosuwa woo baaxo yibbixeh. Yoosuwa woo baaxo Israayil marah ikoytah yeceeh; kulli kedohuuy exxa-exxah keenih kure. Kulli kedoh ken gufa ken xexxar keenih yecee. Too ayrok wadir ummatta carbik toffoofeh raqte.

Yoosuwa 9:1

Israayil mari gee nasri, Ordon weeqaytuk ayrô-culma le kabu raqqa 'ta amoytitiy qaleelah tan baaxo kee ayrô-culmat raqta mango koomaami le baaxol tanihiyya toobbe. Tonnah kaadu, Maditraaniyah badak afoofil tan gubbih tan baaxok xabba haanamaay Lubnaan baaxoh amma 'yaanam tan baaxoh amoytitte inkih ta yab toobbe. Tohum Ciita kee Amooraay Kanqaan kee Feriidaay Ciiwi kee Yabuusah yooboke marih amoytittek ten.