Yasaqya 65:11 - NABUWWA KEE MALIKWA

¹¹ «Toh hinna'mmay raaqe maraw! Yoo hawweeneeh cine maraw! Yi qaley taahirik tani hawwenna 'yeeh burte maraw! ‹Nasiib› akak iyyan duyyeh meqe maaqo yecee maraw! ‹Ellecabo› akak iyyan duyyeh qinab-kamri yecee maraw, siinik excem tabbeenimi!

Yasaqya 65:11 ပူးပေါင်းရင်းမြစ်များ

2 Malikwa 21:3

Kay abba Ciskiyyaahu bayseh suge aroocay diini-maleela qibaadah luk sugtehiyya wadir nammeyhaak xise. Baqal elle yaqbudeeni'gidih, sadgat elle aban arooca bicse. Kaak dumal Israayil-malikih yen Acab akah abe innah, migaaqah Aseera deqsittaamay yaqbudeenihiyyah astah heenih sugen gurmudda soolise. Manasse cutuuka kaadu edde aqbuduk yen.

1 Aydaad 28:9

Too waqdi Suleemanak iyyemii, «Yi baxaw, atu kaadu isi abba aqbuduk suge Dagelta taaxigeemiiy namma kalbi aalle'kal kaah taamittaamih fayxi taalleemi. Kaak kalih imih taamittam cabba hayteh dibuk kay taamat gactaama. YALLI nanu nacsubem kee niyatnam nek yaaxigeh. Niya kaa fanah haytek, kaa gee lito. Takkay immay darre kaat cabtek, darre kot cabeleeh; way kol mayaduura.

Yasaqya 1:28

Takkay immay YALLIH yab cina maray dambit asahiyya baysele. Kaa cabba hee mara selele.

Yasaqya 1:4

Dambi-le-ummattey, mako-le-maray, umaane-raceynittey, taama akak toome urrow, YALLA cabba hayteenih, Israayil doore Dageltay *kudduusuk yanihiyya bursutteenih darre kaat cabten.

Yasaqya 11:9

Lee bad akah kibta'nnah, Yalla yaaxige mari inkih tan baaxo kibeleemih sabbatah, Yallih qaley taahirik tanihiyyah amol sahda biyaaku waah meqem bayisu waa num mayana.

Yasaqya 2:2

Tamaatu wayta ayroorah addat YALLIH Qibaadah-Qari elle yan qale kulli'kkek fayyah giffa axcele. Kulli qalek fayyah giffa luk raaqele. Kulli koomak fayyah giffa luk raaqele. Baadal tan ummatta tet fan amaatele.

Yasaqya 2:3

Mango baaxol yan mari too saaku iyyu waamah, «Qibaadâ-Qari elle yan YALLIH-Qale fan nee beya» tittak axcelon. «Israayil ummat doore Dageltih-Qibaadah-Qari elle yan arac nawaqu wayna. Yalli tokkel isih faxem nee barsele. Usuk faxe gitat gexenno» 'yaanam axcelon. YALLIH-baritto elle tanim, Yarusalaam magaalaay; Siyon qalek isi ummat lih yaaba.

Yasaqya 56:7

Siyon qaley taahirik tanihiyya fan sin baaheyyooh, yi migaaqal abtan sadgat siinik oggoleyyo. Dooqa yoo fan elle aban qarih addal ruffa axcetton. Tonna-leemiik, yi qari baadal tan ummat inkih dooqa elle abta qari deqsitele» 'yaanam keenik iyyah yan.

Yasaqya 57:13

Catô-goranah deero abtoonu waytan saaku, ama yalla axcuk taqbuden duyye sin cattay! A duyye caacay duufut beele. Takkay immay reebuh yoo eleelite mari, xagana keenih akah cule baaxol gaceloonuuh, yi qaril yoo aqbudelon» 'yaanam iyyah yan.

Yasaqya 65:25

Wakri anaqtu waklisele; lubak maaqoh qayso akmele. Awur innah qayso akmele. Hay, abeesa numut m'artaay, dibuk akmelem bullaaqe. Yi qaley taahirik tanil tet amol faxinnaan ikkel biyaakissam mageytinta; ahaysa umaane mayablan» 'yaanam iyya YALLI.

Yasaqya 66:20

Baadal tan ummatak sin tooboko inkih, mattacoh yoh baahelon. Gaariiy faarisiiy bakil kee gaalal hayya ken heenih, Yarusalaamal tan yi qaley taahirik tani ken baahelon. Israayil mari taahirik-yan-kafaqat sadgatah daro yi Qibaadah-Qari elle baahan innal, ken baahelon.

Ermiyaas 17:13

YALLAW, Israayil ummat kibaal elle lem koo. Koo bursutta haa mari inkih qawratak radele. Kooy sila le leeh raceynah yanihiyya cine mari siisâ-bagul yuktuben migaq akkelon.

Ermiyaas 19:4

Macaay inteenik, yoo maaqilteeniih, yot darre cabteeniih, yalla axcuk taqbuden duyyey xeet kee cooxuk bicseenihiyyat baaxo wasak abten. Taham duma sin kaxxa abbobti aaxaguk sugtem hinnaay; isin, Yuudâ-malikwak, kaadu aaxaguk sugteenim hinna. Tohuk kalah kaadu, a baaxo tu baahe wee marih qabalat bayissen.

Ermiyaas 2:28

Anu siinik axceemih: Yalla akak intan duyyey isinni gabak bicisseenihiyya ankel tan? Ta duyyey yalla akak intaanahiyya mangah sin magaaloolik madagok, gadaamittaanaah caalat siinil uma waqdi, sin akah cate waytam macaay? Sin edde wadan dudda maay lon?

Ermiyaas 7:18

Yol umam baahaana'gidih, urri keenik boco baahaah, ken abbobti woo bocot gira urussa. Agbi keenik qagina arqusa. Too qaginak too giral alaysen gaqambo, Gannat-Malikáy yallah loonuhiyyah dooqah baahan. Tohut mayaadiyaanay, yalla akak iyyan duyyeh sadgatah qinabak bicsen kamri baahan.