Yasaqya 45:20 - NABUWWA KEE MALIKWA

²⁰ YALLI iyyamaa: Baadal tan ummattak saaboh raaqe maraw, titta fanah gacaay inki aracal gaaboowa; inkih yoo fanah amay. Cooxuk bicsen duyyey yaqbudeenihiyya ukkuqqa heeh baaxo meksiisa mari, kas cabe mara. Oson too duyyey hebeltô-tu'xiq sinnihiyya yaqbudeeniih ta duyyek, ‹Nee wada› iyyan.

Yasaqya 45:20 ပူးပေါင်းရင်းမြစ်များ

2 Aydaad 25:15

Taham YALLIH naqabu kaah bahte. Tonna-leemiik YALLI nabi kaa fan ruube. Too nabi kaal yemeete waqdi, kaak iyyeemihii, «Ta duyyey elle gexxe baaxoh mari aqbuduk sugehiyya yaqbudeenimit koo bahtem macaa? Aham tu xiqta way, le maray aqbuduk sugehiyya wadak ten kaak; koo tahat asissem macaa?» kaak iyye.

2 Aydaad 28:23

Too waqdi, Acad isi bagul «A mara qeebil cattem, Suuriyah mari yaqbude yallak tanih tanikii, sadgat oson yaqbuden yallah abaama» 'yaanam heeh; qeebil akah gacem, a duyye yuqbudem kinnim yeegemeh. Damaskoh mari yalla axcuk yaqbude duyyeh sadgat abe. Takkay immay too duyyeh qibaada kaa kee Yuudâ-marah baati xalte.

Yasaqya 4:2

YALLIH Luddi nabna kee qax-maqaane edde baahu waa wakti amaatele. Too wakti Israayil ummattay baaxô-bagul raqtehiyya, woo baaxol taabuku waytam yabloonu waan waqdi, ruffu axceloonuuh; nabna edde geelon.

Yasaqya 41:21

YALLAY Yaqkuub-Malikih-yani, gabak bicsen duyye yaqbude marak iyyemii; «Intaanam faxxaanamat marô-foocal yaabay! Sumaaqah litoonum uybulluyay!

Yasaqya 43:9

Baadal tan ummatta inkih gaaboyseeh doolatwa tittal kobxisse. Too waqdi keenik iyyaamah: ‹Sugay ama isin yalla akak intan duyyey taqbudeenihiyyah addat sarra takku waytam naharal siinih warissem iyya?› inxicay ken esseray. ‹Taham akkele inneh neneeh tohum tekkeh› akak iyyaanam tenek, ‹Naabbu waynak neh warisa› keenik inxicay! Toh nummak sugtek, ‹Aleey oson yallah loonum nummat yabtah tan!› axcenno» 'yaanam iyye.

Yasaqya 44:10

Isi gabat yalla bicsa num, tu duude waytam bicse.

Yasaqya 44:9

Yallih aftoh yaqbuden duyye bicsa mari foyyâ-mara. Oson kaxxam ruffu edde iyyan duyye tuxxiq sinniimi. A duyyeh sumaaqita mari, tu aaxige waah tu'mabul sinni mara kinnon. Tonna-leemik tahamat wacarriye lon.

Yasaqya 46:1

Beel kee Naboy, Baabelon mari yalla axcuk yaqbudehiyya bokokteeh, raddeh tan. Ken ceelo a saaku quukah merrayti illel beyan. Merraytuy isih yeclehiyyal quuka yekken.

Yasaqya 48:14

Takkeenimik gaabooway ankacisa. Yi qaxat gaca'gidih doore num, Baabelon-magaalat qeebi abeleeh, teetik faxe baati teetit abelem toobbeenih maay sugten? Isin yallah liton xeet kee cooxuk bicsen duyye siinih maay warisse?

Yasaqya 57:13

Catô-goranah deero abtoonu waytan saaku, ama yalla axcuk taqbuden duyye sin cattay! A duyye caacay duufut beele. Takkay immay reebuh yoo eleelite mari, xagana keenih akah cule baaxol gaceloonuuh, yi qaril yoo aqbudelon» 'yaanam iyyah yan.

Ermiyaas 10:14

Tah inkih abalih, sahda xangi maleelay tut rade wayta tekke. Yalla axcuk yaqbuden duyye dahabak bicsa mari wohut wacarriyele. Oson bicsan yalla akak iyyan duyye anqaasah elle rabaanam ikkal, rooci leeh ufuy lem hinna. Ta duyye deedala'kkalah, tu xiqtam hinnaay tanim hinna; Yallih digaala tamaate saaku, baatu wayta duyye.

Ermiyaas 10:5

Too cooxuy yalla akak iyyaanahiyya cabcab elle yooboke aracal, woo cabcab kimbir yakmeemik kimbir akak meysita'gidih, sartan edde hayya heenih sahdayti gurral soolisen caxxih bis le. Afak mayaaba; mayangayyaay magexa. Aracak arac ken beyaanam faxan waqdi, sunkul hayya ken heenih quukah beyan. Hay, siinil baaham maliiy siinih xiqam malik, akak mameysitina» siinik iyyah yan.

Ermiyaas 10:8

Yakkeenimik inkih duquuraay; hawri akak gexe mara kinnon. Cooxuk bicsen duyyey yaqbudeenihiyya tu ken barissu madudda.

Ermiyaas 48:13

Duma Israayil, elle aaminuk yen Beetalat wacarriyya akah iyyen innah, Mooyab mari kaadu ah keenit takku wayta saaku, Kamos akak 'yaanamay yallah loonuhiyyah abak sugen qibaadat wacarriyelon.

Ermiyaas 48:47

«Takkay immay sarrî-dabaanal luk sugen gaddaliino keenih gacseyyo. Tah intam yoo YALLA. Anu Mooyab maral abe cokmi tokket yeede» iyye.

Ermiyaas 50:28

Ankacisa! Baabeloonuk kude mari Siyon fanah yamaateh yan! Tokkel, duma Yallih Qibaadah Qaril baaheenimih caneh, YALLAY ni Dageltah yanihiyya Baabeloonul baaheemit yaabeloonuk, ken ankacisa.