Yasaqya 41:10 - NABUWWA KEE MALIKWA

¹⁰ Tonna'mmay anu sin lih anik, mameysitina. Sin Dagelti yook, niya siinik addigille waytay. Qande siinit heeyyooh sin cateyyo. Inni gabay qadaalat lehiyyat sin dacriseyyo.

Yasaqya 41:10 ပူးပေါင်းရင်းမြစ်များ

2 Samuwel 22:19

Gadaamite saaku sahda yoo dadahte. Too way kay cato gee.

1 Aydaad 12:18

«Yaaxigen Soddomuk» qaskar abba yakku waa numuy Qamaasay deqsitahiyya too marak numuk teenak ten. Too waqdi Yallih *Roocaaniyya kaal obteeh, isi milkih kaa hayte. Too num too waqdi anay fayya haak yaabeeh, «Yiisâ-baxa Dawudow, nanu ku mara kinninoh, ko'lih nan. Yalla kinni ku Dagelti ku qaxat yaniih; amaan kee wagari ko'lih yanay. Qeebil koo cata mari nasri geyay» iyye. Too waqdi Dawud ken arcibiseeh isi qaskarak abbobtih ken hee.

2 Aydaad 20:17

A carbih qeebi maabinay, inki aracal missowwa 'xicay elle idiya. Too waqdi YALLI siinih yacayu waa nasri isinnih abletton. Tonna'mmay Yuuda kee Yarusalaam magaalah maraw, meysi kee bagbaggoowiyya cabba haay, qeebih eweqa; YALLI sin lih yanik» 'yaanam keenik iyye.

2 Aydaad 32:8

Usuk catoh sahdaytu leeh; nanu catoh YALLAY ni Dageltah yani lino. Ni aftok qeebi neh abtu waytam kaa» keenik iyye. Ummatta ken malik a yaabat yaabam toobbe waqdi niya keenit gacte.

Yasaqya 12:2

Wadeenah yok tanim Yalla; toh aaxigeh; digga liyo. Kaa aamineh, tuk mameysita. Qande akak geem YALLA kinni; kay dacayrih guba edde anim. YALLAY yoo wade kaa kinni. Faylisam YALLAY yoo wada>> 'yaanam axcetton.

Yasaqya 35:4

Meysita marak, «Sin Dagelti yanik, mameysitinay ayti kibba haa» inxica. «Yalli sin wada'gidih, sin qaxat gaceleeh, umam siinil baahe mara digaalele» keenik inxica.

Yasaqya 37:6

woo yaabal gacsemii, «Sin amoytak intaanamaa, ‹YALLI, Assuuriyah-malik siinil ruube farmoy urri-xaylo yoo xaafak siinih warissehiyyak mameysitina, 'yaanam kok iyyah yan› inxica.

Yasaqya 43:5

Qagseh iyyemii; «Anu sin lih ani'mmay mameysitina. Ayrô-mawqa le kabul tan sin xaylo siinih gacseyyo; ayrô-culmak bahha sin heeh, sin baaxol tittal sin gacseyyo.

Yasaqya 44:2

YALLAY sin yuklukeeh ina bagut sin giney sin catahiyya siinik iyyam le. Siinik iyyamaa: «Yaqkuubuk rade maraw, mameysitinaay, yi naqoosa kinniton. Kiciyyo maray anu doorehiyya kinniton.

Yasaqya 49:8

YALLI iyyamaa, «Innih faxe waktit koo oggoleyyo. Edde cateh meqe waktit kaadu koo cateyyo. Koo dacriseyyooh, amo kok wagteyyooh, ummat lih qahdi ku kabuuk heeyyo. A saaku abuuruk yan rasul ahak sarra sinam nookisetto.

Yasaqya 50:9

YALLAY Mulki le yoo cata; yi qaxat yan yi Dagelta. Qellat yol num way mageya. Yok tu waa mari yakkeemiik, bayele, finqah gexele. Irimbite gorrih innah, gorritelon, foyya akkelon.

Yasaqya 52:7

Farmô-numuy qaleelak taturra 'yeh wagari xaaguy meqehiyya gabat lehiyya tableenim manxu meqeeh; too num waddiimaanam sinaamah warsaah, Siyon marak iyyaamah, «Sin Dagelti maliki» keenik iyya.

Yasaqya 60:19

Ahaysa laqo ayroh ifut faxxu waytam mantu; bari kaadu alsah ifut faxu waam mali. Yoo YALLI way-baruge-sinni-ifu koh akkele; nabna ku Dageltak geetto.

Daaniyel 10:12

«Sarrak yok iyyeemih, ‹Daaniyelow, mameysitin. Kol temeete farmoh adda ceddi hayteeh, Yalla kinni ku Dageltih meysih rammitteeh miskiinitte ayrok wadirih, ku dooqa oggolsimtem koh warsa'gidih emeete.

Daaniyel 6:16

Too waqdi malik, «Daaniyel baahay boodot kaa qida» 'yaanamih amri yeceeh; toh aben. Takkay immay malik Daaniyelik annah iyye. «Ku Dageltay atu baguuk taqbudehiyya koo catay» kaak iyye.

Hosiqa 1:9

Too waqdi YALLI kaadu kaak iyyeemih, «Tama awkak kaadu migaaqah Yi-Mara-Hinnon, 'yaanam inxic. Macaay intek, Israayil mari ahaysa yi mara hinnoonuuy, anu kaadu ken Dagelta hinniyo» iyye.

Caggay 1:13

Too waqdi YALLIH farmoytah yen nabi Caggay kay farmo ummattah warseeh, keenik iyyeemih: «YALLI siinik iyyaamah: ‹Anu sin lih aniih, yi taamay abtaanal siinik baxsime waamah xagana siinih cula› siinik iyyah yan» keenik iyye.

Caggay 2:5

Masrik tewqen saaku sin lih an 'yaanam siinik exceh sugeeh; tokkeey akke sin lih anik mameysitina. Toh siinik intam yooy YALLAY Nabaamak Nabahiyya› keenik inxic» iyye.

Zakariyya 10:12

Inni marat qande heeyyo. Yoo aqbudeloonuuh, yi yab aabbelon. Tahat yabtam yoo YALLA» iyye.

Zakariyya 10:6

«Yuudâ mara maqar bahsiiseyyo. Israayil ummat umaanek cateyyo. Keenih xuwaawaah; tohih sabbatah ken baaxo ken gacseyyo. Duma keenil baahem edde hawwenna haan maqaane keenih abeyyo. YALLAY ken Dageltah yanihiyya kinniyooh; yoo fanah aban dooqa keenih oggoleyyo.

Zakariyya 13:9

Too maray saaboh raaqu waahiyya yakke mara keenik able'gidih, dahab kee lakqo girat elle yasiffiyen innah, girat asiffiyeyyo. Tohuk lakal dooqah gaba yol ruubelon; anu too dooqa keenik oggoleyyo. Yi mara kinnoonum keenih warseyyooh; oson kaadu ‹Atu ni Dagelta kinnito› axcelon» iyye.

Yoosuwa 1:9

‹Agaagul akak cabay a taamal digga xic› 'yaanam amrih kol oobiseh; tama amri hawweene waytam kol tan. Anu *YALLAAY; ku Dagelta kinniyooh; elle gexinnaan ikkel ko'lih ani'mmay mameysitinaay; niya kok baxaqe waytay» kaak iyye.

Makaabon 6:16

YALLI kaadu kaak iyyeemih, «Anu koo cateyyooh; tonnal abtu duudetto. Miidiyan mari qandek inki numih gide kol mayallaay; bututtukka ken heetto» kaak iyye.