Yasaqya 4:2 - NABUWWA KEE MALIKWA

² YALLIH Luddi nabna kee qax-maqaane edde baahu waa wakti amaatele. Too wakti Israayil ummattay baaxô-bagul raqtehiyya, woo baaxol taabuku waytam yabloonu waan waqdi, ruffu axceloonuuh; nabna edde geelon.

Yasaqya 4:2 ပူးပေါင်းရင်းမြစ်များ

Yasaqya 11:4

Masaakiinah cakkik-yan-cokmi ackumele. Tu-maleelah cakkik-tan-mekla abele. Iyyem akke leh: digaala elle amrise mari diggalsimeleeh umeynit ambaxele.

Yasaqya 26:1

Too saaku Yuudâ-rasul qadar abelon. Qadarah iyyoonu waanamaa, «Ni magaala qandeey maqar le; Yalli isih maro teetit heeh yan; tet wada'gidih maro edde hee; is Yallih dacayri geyteh tan.

Yasaqya 27:6

Ahak sarra tamaate ayroora Yaqkuubuk samad daabimele. Israayilik ummat saadele; caxâ-miri baad duudusele.

Yasaqya 30:23

YALLI rob siinih ruubeleeh; buqre elle abinnaan ikkel, qidinnaan daro siinih aabukele. Mango daro orbisetton. Laahi siinik mango qayso geeleeh amaanah aloolele.

Yasaqya 45:8

Qadaalat qaraanak robti innah ruubeyyo. Addunya woh raabiteleeh, namma gaba akah garaysele. Yi wadu kee qadaalat teetil reedele. Aham absissu waytam yoo YALLA» iyye.

Yasaqya 53:2

Kafin-baaxoy laqaymumtal toobokeh ten caxah gide akah yenem, YALLIH garil. Xagarat kaak yablen nabnay, kaa tablem kaa elle taaxige, kay xagarat matambulla. Too misliino luk mananna. Kaa elle nassakaxxe hayba kay xagarat maballino.

Yasaqya 60:15

Koo maaqileenih koo yinqibeenih sugeenih, dibuukuyitteh abur tekkeh sugte'mmay, kaxxa magaalay qaxmeqe koo abeyyo. Kulli way farci elle yan magaala koo abeyyo.

Yasaqya 60:21

Ummatta cakkik-tan-taamah taamitele; baaxo kulli way kenim akkele. Liyoh an qax-maqaane keenil elle tambulle'gidih, ken bicisseeh ken daabissem yoo.

Yasaqya 61:11

Baaxo elle anxaxxoyse'nnal, bustaan qiden dariyyi elle yaysubuke'nnal, YALLAY Mulki-lehiyya ummattah inkih cakkik-tan-maqaane bahsiiseleh; baadal tan ummatta inkih kaa faylisele.

Ermiyaas 23:5

Qagseh iyyeemih, «Dawuduk radeeh cakki gitat gexa malik siinih edde reedisu waa ayroora amaatele. Too malikiy Dawud-Luddal muggaaqisaanahiyya reedu waa saaku, ummat kasat xiinisaah qadaalat le malik akkele. Baaxo qadaalatat xiinisele.

Ermiyaas 33:15

Too waktil, Dawuduk rade marak cakki gita gexa numuy Dawud-Luddal muggaaqisaanahiyya ruubeyyo. Too num cakkih tanim abaah, qadaalatat taamita malikih heeyyo.

Ermiyaas 44:14

Yuudâ-maray Masri fan gexehiyyak num raaqe'kal inkih ambaxelon. Yuudâ-rasuy madaarah akah maxhaxak sugeenihiyya ahaysa num keenik mayaduura. Dago maray meysih kudek sah, isi baaxo num siinik mayaduura› 'yaanam keenik inxic» iyye.

Ermiyaas 44:28

A carbik tasillimu waytaah Yuudâ-baaxo aleelittu waytam, dago mara. Tohuk wadir Yuudâ-marak saaboh raaqe mari, yi yab numma kinnim kee sin yab numma kinnim ablelon.

Yacedkel 34:29

Qidinnaan daro elle taabuke baaxo keenih aceeyyooh; ahaysa maqululan. Irô baaxoh mari anqaasah af keenil maraqeeqisa.

Yacedkel 36:8

yi Israayiliy, qaleela ayyuufa siinih baaheleeh, caxâ-miru siinih xalele. Ahaysa isinni baaxo xayuk gacetton.

Yacedkel 7:16

Marak garab goloh addal suge kimbiiriy qale fan gilitahiyyah innah, qale fan kudele. Kulli num isih abe dambih nadaamitele.

Ayyuqel 2:32

YALLAH seecinnaanih num waddiimele. YALLI akah iyye'nnah, «Yarusalaamal sugu waa marak tu takkem asillimele. Anu dooreh akah seece mari cattiimele» iyye.

Ayyuqel 3:18

Too ayrooral qaleeli qinab cooxuk amaggele; laahi kulli qaleelal aloolele; Yuudâ baaxol inkih yan sanat buyitte racele. Yallih Qibaadah-Qarik obta lee Tikible Golol darah oobele.

Qobadya 1:17

«Takkay immay Yarusalaamal tan Siyon qaleh amol sugu waa mara cattiimele. Too arac taahirik yan arac akkele. Yaqkuubuk rade mari isi baaxoy ikoytah luk sugehiyya geele.

Zakariyya 3:8

Kaxxa sek kinnitok, ko'lih yaaba yab ankacca hay. Isin kaadu kaa'lih tan seekay ankacisa. Sarra takku wayta maqaaneh asta kinniton. Anu faxa taamah taamitu waa numuy migaaqah Dawud Luddal muggaaqisaanahiyya ruubeyyo.

Zakariyya 6:12

Too waqdi kaak intaamah, ‹Ludda deqsita num saadeleeh, abinnaanim gabal kaak bicele. YALLIH Qibaadah-Qari nammeyhaak xisele.

Zakariyya 9:17

Baaxo too saaku kaxxam amqele. Baxuw kee furrayna inkih, mango daro kee qusbih bicsen qinab kamrik adoobitak ariiqo baahelon.

Malaaki 3:17

YALLAY Nabaamak Nabahiyya iyyeemih, «Too mari yi mara. Anu gaba qidu waa saaku, too mari yi intit fayya le mara akkeleeh; abba isi baxay kay yab yoobbehiyya akah racmata innah, anu too marah racmateyyo.