Yasaqya 19:3 - NABUWWA KEE MALIKWA

³ Masri marih mala foyya abeyyooh, niya keenik aggileyyo. Yalla 'yeenih yaqbudeenimil cato esserelon. Ginnili kee kalluwallel fayu essereloonuuh, rabe marih roocaaniyyak, ‹Maca neh taysee?› 'yaanam axcelon.

Yasaqya 19:3 ပူးပေါင်းရင်းမြစ်များ

2 Samuwel 15:31

Dawud, «Acitoofal Absalaam marat yengele» 'yaanam yoobbe waqdi, YALLA kallaceeh, iyyemii, «YALLAW, Acitoofal fayu foyya ab» iyye.

2 Samuwel 17:14

Too waqdi Absalaam kee Israayil mari yakkeemiik, «Acitoofal-fayuk, Cusaay-fayi yayseh yan» iyyen. YALLI woh akah abemii, Acitoofal baahe meqe-fayu kataate waana'gidiiy Absalaamal bala obta'gidi.

2 Samuwel 17:23

Acitoofal kay fayu oggole weenim yuble waqdi, isi dananal koori hayya heeh, isi magaala yuduure. Isi buxal, buxah addah caagid bicseek lakal, ogot is qide. Sarrak magaqah kay buxah mara edde haak sugen aracat kaa heen.

2 Malikwa 1:2

Israayil-malikih yen Malik-Acadya isi qarih amol yen qarik taagat boohaahik radeeh, kaxxam biyaakite. Too waqdi Filistiin-magaalay migaaqah Ekron deqsittahiyya Baqal-Dabub-deqsittaamay yalla 'yeenih yaqbudeenihiyyal woo biyaakak uram kee ure wayu waam esseraana'gidih, farmoh sinam ruube.

1 Aydaad 10:13

Saawul wonnah yan raba akah rabem, YALLAL faxxiimak yen imaan agaagul kaak yekkeemih rabe. YALLIH amri cineeh, YALLAL imaan haam hinna'mmay, rabe marih roocaaniyyal fayu esseraanam taamah haysite.

Yasaqya 14:27

YALLAY Nabaamak Nabahiyya taham abaamal gaba kaleeh; ummatta edde digaalu waa gaba fakeh immay, aham abe kaa kaltam matan.

Yasaqya 15:2

Dibon mari qibaada-elle-aban-qale yewqeenih, sadgat elle aban aracih garil weeqan. Mooyab mari, Nabo kee Medabâ-magaalah-marah boogisaanaah rookitan. Rookah amo kee deben isinnik mooleenih.

Yasaqya 19:1

Masri giddinaamak ruuben farmo ah teeti. YALLI qamburreh addat sissikuk Masri fan yamaate. Masri addal yalla 'yeenih aqbuduk sugen coox kee xeetik bicsen duyyeeya kay foocal axaxitele. Masri marak niya addigillele.

Yasaqya 44:25

Ginnili kee kalluwalle dirableela kinnoonum aybullee. Faal qida mara kee cutuk-beya duquura kinnoonum aybullee. Sahda le ixxiga, iggima kinnim keenik aybullee.

Yasaqya 47:12

«Sicriy qunxaaneey akke edde taqabak sugteeni macabinay aba. Tuk teena siinih xiqa kaa tekkek tableenih! Sinaamaay edde meysissaanam takkek, abak sugteenim macabina.

Yasaqya 57:16

Tonnal ahak wadir keenik tu mawaay, ahaysa naqabut ken lih maraaqa. Kulli waqdi tu keenik week, sinam boolaateleeh, niya keenik rabele.

Yasaqya 8:19

Takkay immay sahda, «Ramli qida mara kee kalluwalley tutuc intak xaagu aba» siinik intu wayta waqdi, isin, «Xaagu kalluwallek abtaanamak, Yallak macah abe waytan? Yan marih xaagu rabe marih roocik macah abtan?» 'yaanam keenik axcetton.

Ermiyaas 46:15

Kaxxa yallah luk sugten Afis migaq le awur akah kudem macaay? Afah akah radem macaay? YALLI kaa yootoke.

Yacedkel 21:7

‹Macaay akah gomomtaah tu edde toome num akah celtam?› kok iyyan waqdi, keenik intaamah, ‹Tu edde toome num akah ceelam, sarra yamaatu waa uma xaagih sabbata› keenik inxic. Woo xaagi yamaatu waa saaku, afqado keenik cunxoh dub axcele. Gaba keenik axaxitele. Niyâ xiglo ken abbixeleeh, gulub keenik kadiidimitele. Wakti xayyooweh yaniih xayuk akkele. Tahat yabtam yoo YALLAY Mulki lehiyya» iyye.

Yacedkel 22:14

Anu koo digaalu waa saaku gaba yot maay gacsetto? Tahat yabtam yoo YALLAY Mulki lehiyya; excem duudusa Dagelta kinniyo.

Daaniyel 1:20

Malik faxe essero esseraah, waagiseenimik faxem taniimih, a affara num, baab-abeenit kee faal-qiday woo baaxol sugga 'tehiyyak inkih, tabna adda tayse ixxiga luk yenen.

Daaniyel 2:2

Tonna-leemiik soonitem kaah warsaana'gidih, soono yafdige maraay faal-qidaay baab-abeenitiiy cutuk-beya kee ramli-qida-marah amma 'yaanam inkih seeco abe. Oson yemeeteeniih foocal kaak soolen waqdi, keenik iyyemii,

Daaniyel 5:7

Too waqdi, «Faal-qida kee baab-abeenit kee cutuk-beyah yoh seeca» iyyeh xongole. Woo mari yemeete waqdi, malik keenik iyyeemih, «A kutbe yakriyeeh teetik maqna yoh warisu waa numuh, malik buxah mari haa qasdiimin sartan kee dahabak bicsen silsilatay massakaxxah fillat haanahiyya aceeyyo. Abbootanah kaadu yok gubal sidochaytô-num akkele» iyye.

1 Samuwel 25:37

nammeyhaytoh ayro sikratak cissi geem ubulla hayte waqdi, tikka 'tem inkih kaah warisse. Toh yoobbe waqdi lubbi kaal yeedeeh, caxxi innah kafe.