Yacedkel 7:24 - NABUWWA KEE MALIKWA

²⁴ Kaxxa umeynitih yan mara siinit ruubeyyooh; too mari buxaaxi siinik nagrele. Isin qibaada elle abtan arooca nadaasa abu waa mara siinit ruubu waa waqdi, siinik qande le mari elle kaxxiinitem gaba kalele.

Yacedkel 7:24 ပူးပေါင်းရင်းမြစ်များ

Yasaqya 5:14

Akeera ken qambaalak sugele. Edde gacoonu waan kabaara af kaawut keenih luk sugele. Yarusalaamal tan muddaqiyi kee raqqa 'ye maray qaffaydah digiraah waxxaq iyya selele.

Ermiyaas 12:12

Baaxo inkitanuuk bayisu waa mara ruubeyyo. Carbi keenit abu waa mara keenit ruubeyyo. Sinam buubu waa mari, gitah bakarroytah tan fayya le aroocaak gacak, wararah keenit amaatelon. Ahaysa amaan mageyan.

Ermiyaas 17:4

A baaxoy siinih eceehiyya akah cabtan innah siinik abeyyooh, aaxige waytan baaxol sin naqboytiitih naqoosa sin abeyyo. Toh siinit akah takku waytam, isin yot ugussen naqabih giray barge waytahiyya kinni» 'yaanam siinik iyye.

Ermiyaas 4:7

Gablah addak yewqe lubaakih innah, ummatta bayisu waa num aracak ugteh gitat yan. Yuudâ-maraw, sin baaxo abur aba'gidih ugteeh yamaateh yan. Ummatta baysele. Elle sugten magaalooli abuuruh raaqele. Sahdayti addal akak maraaqa.

Ermiyaas 6:12

Oson dabaaqah edde sugen qarwa marah raaqele; ken buqre kee ginnaaqot luk sugen agbih agantah marin mari nagrele. Ken digaaleyyooh; yi gaba ablelon. Tah intam yoo YALLA.

Yacedkel 21:2

«Bani-adantow, Yarusalaam ummat qibaada elle abta aroocat takku waytaamat yab. Yoo YALLAY Mulki lehiyya axcem keenih waris; Israayil rasuh garci kal.

Yacedkel 21:31

Yi naqabu siinil oobisu waa waqdi, kaak yawqe girah huuri le inna abletton. Racmattak tifa sinniih, umaane abaanamak meysite sinni marih gabal sin heeyyo.

Yacedkel 24:21

Israayil marak intaamah, ‹YALLAY Mulki lehiyya siinik iyyaamah: Ama yi Qibaadah-Qarit kaxxam takkaleeniih intih wagittaanam siinit meqeeh, kaa fan gexxaanam kaxxam kicintoonuh immay, yooy YALLAH yani ama qari nadaasa abba heeleeh; too magaalal raqta say xaylo kee lab xaylo siinik seefit ambaxele.

Yacedkel 28:7

racmattak tu sinniih naqboytit kok yakku waa mara kot ruubeyyo. Too mari atu isi ixxiga kee kasal geyte qax-maqaane inkih kok bayselon.

Yacedkel 33:28

Inkih yan rasu num sinniih lac sinni abur abeyyo. Oson kaxxam edde akkaluk sugen qande keenik bayseyyo. Ken qaleela dibuh yan aracay sahdayti gitah gace waa abeyyo.

Xafanya 1:13

Luk suggu 'yen gaddaliino keenik buubelon; buxaaxi keenik bayselon. Xissiten qarwat magacan. Yubquren qinabih kamri mayaaquban» 'yaanam iyye.