Yacedkel 43:7 - NABUWWA KEE MALIKWA

⁷ Yok iyyeemih, «Bani-adantow, amah yok dardaarinni korsih araca. Anu ta'kkel Israayil mara lih aneyyo. Abbootanah innih ken amol gaceyyo. Israayil mara kee ken malikwa ahak wadir xeet kee cooxuk bicsen duyyeh qibaadat yi migaq mabaysan. Ken malikwah raysitte fayya le aroocay xeet kee coox elle yaqbudeenihiyyal aagaquk migaq yok mabaysan.

Yacedkel 43:7 ပူးပေါင်းရင်းမြစ်များ

1 Malikwa 8:13

Away koh kaxxam naba qariy dabqih kulli way elle gactu wayta xise» iyye.

2 Malikwa 16:4

Diini maleela qibaada elle abta aroocakaa, koomaamih amo takku, silal le cooxih guba takku, too aroocal Acad sadgatah saq elle qidaah, qaydarus elle qeerisak suge.

1 Aydaad 28:2

Too mari inkih elle gaaboowe ikkel, Dawud foocal keenik solla iyyeh ken lih yaabe. Keenik iyyeemih, «Yi baaxoh ummatey, siinik axcem yok oobbeya. YALLIH Qahdih-Sanduguy kay ibih mattaaqatta kinnihiyya elle hayna'gidih, Qibaadâ-Qari xisam faxak suge. Inni Dageltah nabnah, kay Qibaadah-Qarih cato, bica naharal elle abeh suge.

Yasaqya 6:1

Malik Quddiyya edde rabe sanatih addat Goyta uble. Usuk isi dardaarinni korsiy fayya kee nabna lehiyyal daffeyak yeneeh; xagarat culsah le sartan inkih yan Yallih Qibaadah Qari duudeh yen.

Yasaqya 66:1

YALLI iyyaamah, «Qaran yok daffeyna korsi. Baaxo yok ibih mattaaqatta. Hay tonnal, elle gaca'gidih yoh xissoonu waytaanam, mannah yan qariy? Anu elle affoofu waa arac, mannah yan aracay?

Ermiyaas 14:21

Isi nabnah sabbatah, darre net macabin. Yarusalaam magaalay ku dardaarinnih korsiy nabna lehiyya addal akak tani qaybik maqidin. Ne'lih abte qahdi duudus.

Ermiyaas 16:18

Oson aban uma-taama kee dambil namma addah taduure digaalah ken digaaleyyo. Macaay inteenik, baaxol yok umâ-yabulih-tan-duyyey rooci sinnihiyyat wasak aben. Woo duyye yalla axcuk yaqbuden» iyye.

Ermiyaas 17:12

Ni Qibaadah-Qari, dardaarinni korsiy nabna leeh dumal elle fayya 'ta qaleh amol sugtehiyyah bis le.

Ermiyaas 3:17

Too saaku Yarusalaam magaalak bagulleytah, YALLIH mulkiinoh korsi, 'yaanam axcelon. Kulli baaxoh mari too saaku yoo yaqbude'gidih amaatele. Tohuk wadir ken afqadoy yabti cina kee umaane lehiyya aba keenik intaamih abittot magacan.

Yacedkel 1:26

Qari-amo-celtaamak daga, safir deqsita luuluk bicsen korsiy malik elle daffeya celtahiyya uble. Too korsih amol sahdâ-ceelo lem daffeyah uble.

Yacedkel 10:1

Woo galwa leemih moyyak daga raaqa aracay qari-amoh ceelo lehiyya fanah wagga hee waqdi, too tiyak daga, malik elle gaca korsih innah taniimiy safir deqsita luuluk bicseenim celtahiyya uble.

Yacedkel 20:39

YALLAY Mulki lehiyya kaadu iyyeemih, «Taway Israayil maraw, xeet kee cooxuk bicsen duyye taqbudeenim ableh ani'mmay, tamahat geytaanam ablettoonuk abbaasita. Tamahah, gexak teneeniik, yi amri duudusettoonuuh, xeet kee cooxuk bicsen duyyeh abtan sadgootak aadetton. Yi migaaqay taahirik yanihiyya nadaasa mabtan.

Yacedkel 39:7

Yi migaaqay taahirik yani Israayil ummatay yi ummatah tanihiyyah addal akah yamixxige'nnah abeyyo. Tahak wadir ceele-waa migaq yoh abaanam maqansiisa. Tohuk wadir gersi baaxol yan mari inkih, anu Israayil rasul taahirik yan Dagelta kinniyom yok aaxigelon.

Yacedkel 43:9

Taway, too yok sa yaqbuden duyyey yallah loonuhiyyah aban qibaada kee isinni malikwah lafa, a aracak wonnah yok beyoonay. Tah abeenik, ken addal gaceyyooh, way keenik mabaxsima» iyye.

Yacedkel 48:35

Inkih tan magaalah gaso affara tattabak xexxaarah sagla alfih mitri akkele. Ta magaalah migaq tahak wadir ‹YALLI-akkel-yani› deqsitele» 'yaanam iyye Yalli.

Yacedkel 6:13

Woo oson Yalla 'yeenih yaqbuden duyye kee, sadgat elle aban aracih dariifal, raysi tittak bagul gacele. Kaxxa koomaami kee qaleelâ-sanaay, silal-le-coox kee sublâ-gubay qaydarus qeerisakaay xeet kee coox elle aqbuduk sugeenihiyyal, raysi raaqele. Too waqdi ummat inkih YALLI yoo kinnim aaxigele.

Yacedkel 6:5

Israayil marak raysa too oson yaqbuden xeet kee cooxuk bicsen duyyeh foocal qideyyo. Lafa keenik sadgat elle aban aracak foocal caacayat ruubeyyo.

Hosiqa 14:8

Israayil maraw, ahaysa xeet kee cooxuk bicsen duyyeh intit yoo tableenim siinik moggola. Dooqa siinik oggoltaah sin dacrissem yoo. Anxax caxah innah sin silaalissem yoo. Eelli haan barkat siinit haytem yoo» iyye.

Ayyuqel 3:17

«Too saaku Israayil maraw, anu YALLAY sin Dageltah yani kinniyom yoh aaxigetton. Anu elle anim, Siyon qaley taahirik tani kinnim aaxigetton. Yarusalaam taahirik tan magaala akkeleeh; afak temeete qaskarih gabat maradda.

Miika 4:7

A mari aymiteeh, buxak yexxeere marah yaniini'mmay, meqe bica keenit abeyyo. Too mari kaxxa doolat akkele. Siyon Qaleh amol too ayrok wadir anu innih ummaan waqdi keenil ackumeyyo.

Zakariyya 13:2

«Too ayro Yalla axcuk aqbuduk sugen duyyey xeet kee cooxuk bicseenihiyyah migooqa baaxok bayseyyo. Tohuk wadir too duyye num kassitak maraaqa. ‹Nabi kinniyo› iyya mara bayseyyooh; nadaasak tan roocaaniyyay ken yaabissahiyya baaxok ayyaaqeyyo.

Zakariyya 13:3

Tahak wadir ‹Nabi kinniyooh wacyi ubleeh, wonnah tanim akkele› iyya num yenek, kay ina kee kay abba, ‹YALLI edde yaabe wee yaabat yabteeh, dirab teceeh; tonna leemiik rabtam kol tan› kaak axcelon. Tonnah yan diraabat yaabah kaa yoobben waqdi, kay xaleena kinni way seefit kaa qidele.