Yacedkel 20:31 - NABUWWA KEE MALIKWA

³¹ A saaku kinni way too duma sin abbobti akah abak sugga 'te innah, too bis le sadgat abtaanaah, keenik kaxxih isinni xaylo sadgatah girat carrissan. Tonnal isinni nabsi nadaasa abtan. Tannah tanim abba hayteenik sarra, wadir yi fayuh esseroh yol tamaaten. Waara YALLAY Mulki lehiyya kinniyooh inni migaaqal xiibita'mmay, tahak wadir tu yoo esseri sin maha.

Yacedkel 20:31 ပူးပေါင်းရင်းမြစ်များ

Yasaqya 1:15

Dooqah kulli way gaba fayya haytaanamah gaboobi siinik qabalat tutlukeh tani'kkal, siinik moggolaay racmatta le intih sin mabla.

Yasaqya 57:5

Kaxxa cooxih gubay yalla akak intan duyye elle taqbudeenihiyyal, mango dalwa abtaanaah; xixxaqak tan gablooli kee goloolah addal, isinni xaylo sadgatah qiddan.

Ermiyaas 14:12

Soom kee dooqa abaanamah yol weeqaanamah, aban weeqa keenik moggola. Sadgatah cado akak carrisan saq qidaanamah, hinnay kaadu, dooqak keenih orobta'gidih daro yeceenimih, yi garil oggol keenik mali. Ken wadam hinnaay, carbi kee qulul kee dalkat ken seleyyo» 'yaanam yok iyye.

Ermiyaas 19:5

Baqal akak iyyaanamay taqbudeenihiyyah isinni lab-xaylo sadgatah elle qiddan arooca bicissen. Too aroocak bagul isinni xaylo sadgata axcuk nuwwih girat carrissan. Annah taniimit asettoonum way makkalinniyooy, way kaadu aba siinik excem hinna. Inkinnah afak edde yaabem hinna.

Ermiyaas 7:31

Isinni xaylok say-urru kee lab-urru sadgatah amol akak carrisaana'gidih, Hinnom Golo deqsitta goloh addal, Toofet deqsita arac bicsen. Aham anu amrisem hinna; yi afqado kaadu inkinnah oggoltam hinna.

Yacedkel 16:20

«Yoh xalte xaylok say-urru kee lab-urru xeet kee cooxuk bicsen duyyeh sadgatah tecee. Yol luk sugte imaan cabtem koo maxiqinnaay;

Yacedkel 16:36

«YALLAY Mulki lehiyya kok iyyaamah: Sara isik kalla hayteh, isi mareytit kee woo Yalli niqba xeet kee cooxuk bicsen duyyey taqbudehiyyah isi xagar teceeh; too xeet kee cooxuk bicsen duyyeh sadgatah isi xaylo qidde.

Yacedkel 20:26

Isinni xaylok naharsi-xaylo, umâ-yabulih xeet kee cooxuk bicsen duyyeh qibaadah arac sadgatah baahah ken abalih, yanoonay ken axcuk suge. Toh keenik akah abak sugem, abeenimik xagar keenik wacarriya'gidiiy ken Dagelta dibuk yoo kinnim yaaxigeeni'gidi.

Yacedkel 20:3

«Bani-adantow, yoo YALLAY Mulki lehiyya axcem keenih waris» yok iyye. Keenik intaamah, «Isin akah temeeteenim, yi fayxi essertaana'gidi inna? Anu waara Dagelta kinniyooh, fayu yok essertaanam siinik mafaxa. Tah intam yoo YALLAY Mulki lehiyya» iyye.

Yacedkel 23:37

Ama namma kacbat biili yan. Dalwa lih abeenim, xeet kee cooxuk bicsen duyyeey; qiddeenim, yoh xalen xaylo. Yoh xalen lab-xaylo xeet kee cooxuk bicsen duyyeh bagul sadgatah qiden.

Yacedkel 33:30

YALLI kaadu iyyeemih, «Bani-adantow, ku mari magaalat maroh tan gasoh xaqu kee isinni qarwah afal yangoorowen waqdi, ku yaabat yaabaanaah, ‹YALLAK yemeete yab ankacisnu waynak nee beya› sittak iyyan.

Qaamus 8:12

Ummat inkih, kilbat le kabuuk gabbi-qaxa kee ayrô-mawqa kee ayrô-culma le kabul, bad kee barril meekitelon. YALLIH qangarah goranah kulli ikkel qayyaawelon. Takkay immay yi qangara mageyan.

Zakariyya 7:13

Anu ken lih yaabe waqdi, yoo aabbe cineenimih sabbatah, ken dooqa moggoliyyo. Tah intam yoo YALLAY Nabaamak Nabahiyya.