Yacedkel 14:6 - NABUWWA KEE MALIKWA

⁶ «Tonna-leemik Israayil marak, ‹YALLAY Mulki lehiyya siinik iyyaamah: Ama qaybik tan xeet kee cooxuk bicsen duyyeh qibaada cabba haay yol uduura› keenik inxic.

Yacedkel 14:6 ပူးပေါင်းရင်းမြစ်များ

2 Aydaad 29:6

Ni kaxxa abbobti YALLAY ni Dageltah yanihiyyal luk ten imaan cabeeniih; YALLI anqibinnaanim abak sugen. YALLA hawweeneeniih, kaa elle yaqbuden aracat darre caben.

Yasaqya 2:20

Too ayro dahab kee lakqok bicsen duyyey yalla 'yeenih aqbuduk sugeenihiyya baaxot qideloonuuh; woo duyye elle qiden arac gablâ-kimbir kee hantuuti-dabqi akkele.

Yasaqya 30:22

Dahab kee lakqo bagul akak hayten duyyey aqbuduk sugteenihiyya beyya hayteenih, guddaafa elle qidan gurrah baaxot qidettoonuuh, foocak nek kala 'yaanam axcetton.

Ermiyaas 13:27

Anu innih niqbiyom abah sin uble. Barril, koomaamih amol duyye aqbudih sin uble. Too duyye elle aninnaan ikke, cuggayti barrah dalwah kuula num elle kuula'nnal, isin kaadu too duyye taqbudeeni'gidih too duyye elle aninnaan ikke lakal gexxan. Danan oklô-lakal nikloh elle yarde'nnal, too duyyeh lakal tarden. Yarusalaam maraw, edde taniinim baatik, taahirrowtoonu waytaanam maa saaku?» 'yaanam siinik iyye.

Yacedkel 14:4

«Taway anu keenik axcem keenih waris. Intaamah: ‹YALLAY Mulki lehiyya siinik iyyaamah: Faxe Israayiliiti isi kalbit gabat bicsen duyyeh qibaadat yufkuneeh; too duyyey dambi lem xalta isi misinkacal hayyaay, wadir nabil fayuh yemeetek, tohul yok geyoonu waan raddi keenih waris. Too gabat bicsen duyyey yaqbudeeni manga takkeh gide, umaanek keenil baaheyyom keenih waris.

Yacedkel 18:30

«Away yoo YALLAY Mulki lehiyya siinik axceemih: kulli numuluuy abba hee umaanek abba heeh gidel kaal ackumeyyo. Tonna'mmay edde tanin dambik uduura. Abtan dambit isinni mabaysina.

Yacedkel 8:16

Sarrak Qibaadâ-Qarik adda le kabut raaqa daarat fanah yoo bee. Tokkel, YALLIH Qibaadah-Qarih adda akak culan culma kee sadgat elle aban aracak fanal, labaatanna kee koona num yen. Too labaatanna kee koona numuu, qibaada qarit darre cabak, ayrô-mawqa fan qununnu 'yeh, tawqeh tan ayro aqbuduk yenen.

Yacedkel 8:6

Too waqdi Yalli yok iyyeemih, «Bani-adantow, ama'kkel takkem tablee?» yok iyye. Qagissa heeh, «Israayil mari aba qaybih tan taama ubuley. Tama table qaybik gexxaamah, yi aracay taahirik yanik yoo yeyxeereenih. Ahak sarra amahak gaca qaybi elle yakke arac abletto» yok iyye.

Hosiqa 14:8

Israayil maraw, ahaysa xeet kee cooxuk bicsen duyyeh intit yoo tableenim siinik moggola. Dooqa siinik oggoltaah sin dacrissem yoo. Anxax caxah innah sin silaalissem yoo. Eelli haan barkat siinit haytem yoo» iyye.

Xafanya 3:11

«Too saaku, yi maraw, duma yol bahten yabti-cinak gexxaamah mawacarriytan. Macaay inteenik, kaxxiina kee anaani le mara bayseyyo. Tohuk wadir isin yi qaley taahirik tanihiyyal kaxxiinah qubbuy m'intan.

Zakariyya 1:4

Isinni kaxxa abbobti makkina. Sin kaxxa abbobtih dumî-dabaanal yi nabuwwa yi farmo warisak sugteeh; ‹Edde gexxan uma gitak raaqaay, dambit maasina. Toh intam YALLAY Nabaamak Nabahiyya›, 'yaanam keenik axcuk sugen. Takkay immay oson yi nabuwwah yab ankacisak masuginnoonuuy; anu aba axcem oggolak masuginnon.

1 Samuwel 7:3

Sarrak Samuwel Israayil marak annah iyye, «YALLAL baguuk taduureenim faxxeenik, a duyyeeyay gersi mari yalla 'yeh yaqbudehiyya kee, yalla akak intan Qastarot akak iyyaanamih ceeloy gabat litoonuhiyya wonnah qida. Dudda haytaanam kee, niyak elli haytaanamaak, YALLAL gactaanamaay dibuk kaa uqbuda. Filistiin marih gabak sin cattu waytam, inki Dagelta» keenik iyye.