Nacmiya 9:16 - NABUWWA KEE MALIKWA

¹⁶ «Ni kaxxa abbobtih tu gactek, ku yab moggolinnoonuuy, kaxxiinah filla qaraanal heeniih isinnih faxeenim aben.

Nacmiya 9:16 ပူးပေါင်းရင်းမြစ်များ

2 Malikwa 17:14

Takkay immay ken yab cinak sugeeniih; isinni kaxxa abbobtik kaxxih, YALLAL maamininnoonuuy, kay yab ayti akak taabbe mara makkinnon.

2 Aydaad 29:6

Ni kaxxa abbobti YALLAY ni Dageltah yanihiyyal luk ten imaan cabeeniih; YALLI anqibinnaanim abak sugen. YALLA hawweeneeniih, kaa elle yaqbuden aracat darre caben.

2 Aydaad 30:8

Oson akah sugen innal, aabbe cina mara makkinay; YALLIH amri oggola. Away Yarusalaamal yan Qibaadah-Qariy YALLI kulli way taahir abehiyyal ama. YALLIH bagcarrak cattintaana'gidih, kaay sin Dagelta kinnihiyya uqbuda.

2 Aydaad 36:13

Baabelon-abbay Nabkadnessar deqsita Xidkiya malik abe saaku, kay yab yaabbu waamih tiyal, Yallih migaaqal dirkih kaa xibsiiseh suge'mmay, Xidkiya kay yab moggolinna. Fiirik geerah YALLAY Israayil doore Dageltah yanit baaqid mahannaay; toobitta 'yeh kaal yaduureenim cineh.

Nacmiya 9:10

Masri malikil ablewayni astooti kee qagabak tanim bahte. Kay gubal yan mara kee kay baaxoh maral yakkeenimik qagabah tan able waynuh tanim bahte. Toh keenik akah abtem, kaxxiinah filla qaraanal heeniih ku ummattal umam baahak sugeenimih sabbata. Tohuk wadir too saaku kok yontoobbe migaq uxih ta saaku fan yantaabbeh.

Nacmiya 9:29

Atu aba intam abe weenik, keenit takku waytaamih garci keenih kalteh. Ku xinto kataata mari isinni rooci wadele'mmay, too mari, ku xintok sah giti ane waam aabbih, kaxxiinitak ku xinto cineenih, keenih warisah darre kot caben.

Yasaqya 48:18

Yi amri oggoltaanamal, weeqayti gurral amaan siinil oobak yeneeh; yi foocal cakkik yan mara akkuk teneenih, too cakki kaadu, baddi-afal tamuttuke haffoh innal, qande siinih acayuk yen.

Yasaqya 48:4

Yab ayti akak cule waah, xixxaqay lee adda akak cule waytah bis litoonum aaxaguk en.

Yasaqya 63:10

Keenih tu gactek, kay yab cineeniih kay Roocaaniyyay *kudduusuk tanihiyya qaadiseenih. Tonna leemiik YALLI naqboyta keenik yekkeeh, isih qeebi keenit abe.

Ermiyaas 19:15

Keenik excemii, «YALLAY Nabaamak Nabah, Israayil doore Dagelta kinnihiyya siinik iyyam ankacisa. ‹A magaala kee teetil yan maraay tet dariifal tan magaaloolil yan maral, duma siinil oobiseyyo exce balak tu macabay siinil oobiseyyo. Keenil akah oobisu waam, yi yab aabbe waah aba keenik excem abe waa mara yekkeeniih; tohuk gexxaamah, bala siinil ruubeyyo› siinik iyyah yan» keenik exce.

Ermiyaas 2:31

«Siinik axcem yok toobbeenik sin esseru waak ankacisay! Anu bacarih tan baaxoy num bakaarak elle waddiime waa, siinil ekkem maa saakuu? Ditey baaxo akah able waytaanahiyya siinil ekkem maa saakuu? ‹Ahaysa currik yan mara kinninooh; ninnih fanxem abenno ikkal, ku fanah manamaata› 'yaanam akah intaanam macaay?

Ermiyaas 7:26

Takkay immay tohuh, yi yab yaabbeeh anu axcem ankacisa num siinit mayan. Mako litoonuh, yab oggola mara hinniton; sin kaxxa abbobti edde sugte dambik lafitta 'ya dambit assan», siinik iyya.

Yacedkel 5:6

Takkay immay Yarusalaam mari yi amri cineh, raqqa 'te baaxooxah marak umaaneh lafitaanam isinnik yuybulleenih. Yarusalaam yi amri cinteeh anu aba axcem abe cinteh. Tet dariifal enna 'ta baaxooxah marak yabti cinah lafittam tet kinnim isik tuybulleeh.