Nacmiya 9:1 - NABUWWA KEE MALIKWA

^1-2 Too alsak labaatanna kee fereyhaytoh ayro, Israayil ummatta aben dambih nadaamah soomaana'gidih gaaboowen. Ken akke waa marin marak yexxeereeniih, sartanah *qabuudut gacca 'yeenih, abeenih yanin nadaamak gexxaamah, amol bullaaqe isinnik caxen. Sarrak solla yeenih ken kee keenik dumal ken kaxxa abbobti abba hayte dambit yaaben.

Nacmiya 9:1 ပူးပေါင်းရင်းမြစ်များ

2 Samuwel 1:2

Nammayhaytoh ayrok wadiril furraynuh yan awkii, Saawul macaxi mafdagah luk suge aracak, amol siisa heeh rookak gexxaamah sara isik qanxiseh, yemeete. Dawud fanah yemeeteeh kay assakaxxiyyah qansah baaxo xagam fan baaxok bagul qununna 'ye.

2 Aydaad 20:3

Toh yoobbe waqdi Yacoosafat cunxo hayteeh, YALLAL gita essereemit yemeete. Sarrak inkih yan rasul sinaamak sooma iyyeeh amri yecee.

2 Aydaad 7:10

Tohul ciggilta ayroy sanatak malcinhaytoh alsaay ayrok labaatanna kee sidochaytoh ayro kinnihiyyat Suleeman, yemeete mara, le baaxo fanah rubsuuse. Amma 'ye mari inkih, YALLI Israayil ummatay isi marah tanihiyya kee, Dawud kee Suleemanat hee barkat yubleenimih sabbatah, kaxxam ruffa iyyen.

Qedra 8:21

Acawa fan caxita dorih garil elle kobxen ikkel, ummattal amri oobiseeh, keenik exceemih, «Yalla kinni ni Dagelti a safar nel yaymaaquuy, nee kee ni xaylooy neddereemik inkih Yarusalaam fan amaanah nee gufsa'gidih, kaah soomaay rammita» keenik exce.

Qedra 8:23

Tonna leemiik soomneeh, abna safaral Yalla kinni ni Dagelti nee dacrisa'gidih, dooqa abne. Yalli kaadu too dooqa nek raabiteh.

Aster 4:16

Inteemih, «Suusâ magaalal yan Yahuud marak inkih mododa inxic. Soomaay yoh kaadu dooqa aba inxic. Sidooca bar kee laqoh tu maaqabinaay makmina keenik inxic. Yoo kee yi taamat yan baxuw kaadu toh abenno. Tohuk lakal xintol umam kinnim aaxigeh immay, tohuh, malik fanah gexeyyo. Tohuh, rabi yol yemeetek, yamaatay» 'yaanam kaah rubte.

Aster 4:3

Inkih tan rakaakayitteh adday aham amrih elle oobiseenihiyyal yan Yahuuduh ubukka 'ye mari inkih tah yoobbe waqdi, kaxxa rookah rookiten. Yakkeenimiik soomeeniih, weeqeeniih, boogiseenih. Mango mari keenik sartanah qabuudut gacca 'yeh, gomboduk bagul deerih gacen.

Yasaqya 22:12

Too ayro YALLAY Dagelta kinnih, Nabaamak Nabahiyya iyyemii, «Weeqaay boogisa. Amo isinnik moolaay sartanah *qabuddat gaca» 'yaanam siinik iyye.

Ayyuqel 2:12

YALLI iyyaamah, «Away kinni way baguuk toobitaay sooma. Abteenimih weeqay yol uduura.

Yoosuwa 7:6

Too waqdi Yoosuwa abeh yan wariggah sara isik qanxiseeh; YALLIH Qahdih-Sanduguk foocal gommoh rade. Israayil makaabon kaadu toh abteeh; tokkel aben arka yaybulleeni'gidih amol siisa luk magrib tikki 'yam fan gommoh sugen.

Makaabon 20:26

Israayil mari tah yuble waqdi, kaxxa qaadiyyah qaadeeniih Beetal fan gexxa 'yeenih, tokkel daffa 'yeenih YALLAL weeqak asen. Too ayro bari tikka 'yam fanah maaqo afah maxaginnon. Tokkel too ayro YALLAH cado akak cararisan sadgat kee amaanah xiinaanamih astah aban sadgat aben.

1 Samuwel 4:12

Benyam kedoh yooboke numuy woo qeebik yisillimehiyya tokkek arduk, Siilô magaala fan too ayrot edde yemeete. Tekkeemih abeh yan rookah gital sara isik qanxiseh yeneeh, amol kaadu siisa luk yen.

1 Samuwel 7:6

Oson too waqdi yakkeenimiik wokkel gaaboowen. Lee quleenih, YALLAH mattaco takke'gidih woo lee baaxol caxen. Sarrak too ayro soomuh asen. «YALLAW, dambi lem kol bahneh nan» iyyen. Samuwel makaabantu yekkeh; Israayil fanal sittin-way rada waqdi keenik elle kalak yenem, Mixfa deqsitta magaalak ten.