Nacmiya 12:27 - NABUWWA KEE MALIKWA

²⁷ Yarusalaamat maroh ten gasoy tiddigilleh sugtehiyyah xisnek gaba kalen saaku, Leewih yooboke marah seeco aben. Keenih akah seeceenim, ruffa axcuk edde asaana'gidiiy, Yallah candu edde gacsaana'gid kee Yalla edde saarisaana'gidik ten. Too saarel, kirar kee begenaay giyaagib aagaruk Yalla saarisak, candu Yallah gacsen.

Nacmiya 12:27 ပူးပေါင်းရင်းမြစ်များ

2 Samuwel 6:12

Malik Dawud Yallih Qahdi addat akak yan Sanduguk gexxaamah, YALLI Yoobad-Edom kee kay buxah marat barkat hee 'yaanam yoobbe waqdi, gexeh, woo Sandug Yarusalaam fan baahe. Gital too Sandugih-bahti kaxxam assakaxxayuk africuk yemeeten.

1 Malikwa 8:63

Amaanah xiinaanamih astah aban sadgatah, Suleeman laak labaatanna kee namma alfi yusguudeh. Illi kee wadarak bool kee labaatanni alfi yusguude. Israayil ummatta kee malik toh akah abeenim, a sadgat, YALLIH Qibaadah-Qarih orba sadgat yakke'gidik ten.

1 Aydaad 13:8

Takkay immay Dawud kee raqqa 'ye mari a sandug elle beyaanamal, Yallih-massakaxxah quuruk loonumuuk argaduk yemeeten. Afak Yallih saare edde haakaay wallitakaay *begena kee kiraraay giyaagib kee karambooy *baanta aagaruk yemeeten.

1 Aydaad 15:12

Too mari kaal yemeete waqdi keenik iyyeemih, «Isin Leewih marak saqoltih tantoonuuh; tonna-leemiik isinni kee isinni kedoh xayloh taahirik gactaanama. Tohuk gaba kalla haytan waqdi, YALLAY Israayil doore Dagelta kinnihiyyah Qahdih Sandug elle yani'kkek gexxeenih anu akah bicse siraq fanah baahetton.

1 Aydaad 15:16

Dawud kaadu Leewih abbobtih amri yeceeh iyyeemih, «Leewih yooboke marak Yallih saare abu waa mara ixiga. Tonnah kaadu, *begena kee *kiraraay giyaagib tassa axcuk yaaguru waa mara ixiga» 'yaanamih amri yecee.

1 Aydaad 15:28

Tonnal Israayil ummatta takkeemiik, YALLIH Qahdih-Sandug too bical baaheeniih, Yarusalaam guffa haam fanah qililisakaay, baanta kee gaysaay giyaagib kee begenaay kirar aagaruk afracuk baahen.

1 Aydaad 15:4

Sarrak kaadu Leewih yooboke marah seeco abe. Tonnah kaadu Haaruunuk rade marah seeco abe. Gaaboowen waqdi,

1 Aydaad 16:42

A namma num, ahak kalah kaadu, Yallih saare aban waqdi baanta kee giyaagib kee wohuk kalah tan duyyeeyay Yallih saareh yaagureenihiyyah abbootan luk yen. Yedutunuk lab-xaylo Qibaadâ-Qarih-afoofi dacrisak ten.

1 Aydaad 16:5

Tohuk abbah Asaf heeh kay gubal Zakariyya hee. Yaqiiyal kee Samiraamot kee Yaciyel kee Mattitya kee Aliyab kee Banaaya kee Yoobad-Edom kee Yaqiiyal *begena kee kirar yaagureenimih taama keenih yecee. Asaf kaadu giyaagib yaagureenim taamah luk yen.

1 Aydaad 23:5

Kaadu too soddom kee bacra alfik affara alfih num taamah yaallu waam, Qibaadâ-Qarih afah dacayri kee, affara alfih num kaadu YALLA saarisu waa mara akkele. Kaa saarisan waqdi, yaaguren duyyey anu keenih bicsehiyya aagaruk abelon» iyye.

1 Aydaad 26:31

Yeriyaahu deqsita num kaadu Cebroonuk radda 'ye marih abbootan kee saqoolinna luk yen. Dawud malik edde yekke morootomhaytô sanatat, Cebroonuk rade marih qaadak adda wagita mara heen. Too numih durruyyat elle tani'nna yaaxigeeni'gidih aben kusaaqisiyyal, Yaqder deqsitta magaalay Gilqad deqsitta baaxol geytintahiyyal, kaxxa ixxiga kee cubbi le maray Cebroonuk raddehiyya yanim geytinte.

2 Aydaad 29:25

Malik Ciskiyyaahu, Gaad deqsita nabiy YALLI Malik Dawuduh ruubehiyya kee nabi Naatan Malik Dawuduk ab axcuk sugtem abe. Ciskiyyaahu, Leewî mara kirar kee *begena digirak, giyaagib aagaruk, YALLIH Qibaadah-Qarih addal hee.

2 Aydaad 29:30

Malik kee baaxoh abbobti, Leewî marak, «Malik Dawud kee nabi Asaf tuktube YALLIH saare aba» iyyen. Too mari inkih gulubuh gacca 'yeh ruffa axcuk too saare abeeniih, YALLA yuqbuden.

2 Aydaad 5:13

Yakkeenimiik inki adda akkaquk YALLA saarisan waqdi, *baanta kee giyaagib kee, wohuk kalah tan duyyey saareh yaagureenihiyya luk aagaruk aben. YALLIH saareh iyyeenim, «YALLI maqaane le Goytak, candu kaah gacisa, ummatey! YALLIH kacni mayambaxak, tohul candu kaah gacisa» axcuk Yalla faylisen. Too waqdi, garciik qamburre YALLIH Qibaadah-Qarik adda inkih bulteh.

2 Aydaad 7:6

Too waqdi seeka, keenih yeexegen aracal solteeh, Leewih yooboke mari kaadu foocah keenit afkanuk soole. Too waqdi Leewih yooboke mari saareh yaaguren duyyeeyay Dawud keenih bicsiise yoogoren. Dawud abeh cabe saare edde heen. Saareh iyyeenimii, «YALLIH kacani mayamurruqa, kay kacani waarah yan kacanu» axcuk YALLA saarisen. Too waqdi raqqa 'ye mari soolak yeneeh; seeka baanta aagaruk ten.

Qedra 6:16

Tohuk lakal seeka kee Leewih yooboke mara kee, wohuk kalah tan Israayil-ummattay marin baaxoy elle sugtehiyyak tuduurehiyya kaxxam ruffu 'yeenih; too ayro Qibaadah-Qari Yallih taamah taahirroyseenimih farcatah asen.

Nacmiya 11:20

Raqqa 'ye maray Israayilih yaabukehiyyak, seeka kee Leewih marih agantah, kulli num keenik Yuudâ-magaaloolik isinni kaxxa abbobti elle sugte aracal dabaaqah gacen.

Nacmiya 12:43

Too saaku mango sadgat abeeniih, kaxxam ruffa iyyen. Akah ruffa iyyeenim, Yallak geen kaxxa farcik ten. Too saaku aben qaffaydat agabu kee urri yengeleeh; oson ruffok gexxaamah aban xongolo xer baaxo fan antaabbuk ten.

Nacmiya 8:17

Seewah ken elle beenih sugen baaxok yuduure mari inkih daboyta xissite. Tannah tanim Nuun-Yoosuwa yen dabaanak wadir ummatta abteh masuginnaay, too saaku ummatta kaxxam ruffu 'teh asse.