Miika 6:7 - NABUWWA KEE MALIKWA

⁷ Sadgatah illik mango alfi baaheey, qadad sinni zeytiy (saliidiy) caxâ-xaylok bicseeni kaah bahnaamah, YALLI ruffa edde maay iyya? Hinnay kaadu abne dambih kaqalsoh, naharsi-baxa, cado inkitanuuk akak cararisan sadgatah naceemih, YALLI ruffa edde maay iyya?» intan sin tekkek,

Miika 6:7 ပူးပေါင်းရင်းမြစ်များ

2 Malikwa 16:3

Duma sugte Israayil amoytiitik kaxxih, Yalli niqbam abak suge. Ayrok teena Acad girat isi baxa sadgatah qide. Usuk woh akah abem, Israayil-mari yamaateemik naharal woo baaxol suge maray YALLI yeyyeeqehiyyak raaqisen umâ-yabulih-tan qaadah gabbaaqiyyak ten.

2 Malikwa 21:6

Girat isi baxa sadgatah qide. Ramli-qidiyya kee sicri taamah haysiteeh; ginnili kee kalluwallel takku-waytam essere. YALLAL kaxxa dambi lem baaheeh; YALLIH naqbi kay sabbatah lafitak lafte.

2 Malikwa 23:10

Hinnom deqsitta goloh addal, yalla axcuk yaqbuden duyyeh qibaadah heen aracay Toofet deqsita foyya keenik abe. Toh keenik akah abem, too aracal duma Molok deqsitaamih sadgatah isinni xaylo girat qidak sugen. Toh elle abe waana'gidih, too arac foyya keenik abe.

2 Malikwa 3:27

Too waqdi naharsi-baxah kaak yan lab-baxay kay arac nagre raarehiyya, magaalat maroh tan gasok bagul, Mooyab yalla deqsittaamay elle yaaminehiyyah sadgatah qide. Israayil mari ah yuble waqdi, naqabut isinni baaxo fanah yuduuren.

Yasaqya 1:1

A kitaabal tanim, Yuudâ-rasu kee Yarusalaam magaalal tan ummattah Yalli, Amóx-Yasaqya le kabuk ruube wacyi. Yalli a farmo ruubem, Quddiyya kee Yootamaay, Acad kee Ciskiyyaahu deqsita mari malikwah suge dabaana.

Yasaqya 40:16

Lubnaan rasul eneyya 'ta, garboh addal tan alluwwa, tikka 'taamak yasguuden way, Yallih sadgatah qidan way, Yallih sadgat duddam hinna. Woo garbol bocok enna 'tam onkoysaanaah yafiilen way, kaxxa sola akak xisan way, Yallih sadgat duddam hinna.

Ermiyaas 19:5

Baqal akak iyyaanamay taqbudeenihiyyah isinni lab-xaylo sadgatah elle qiddan arooca bicissen. Too aroocak bagul isinni xaylo sadgata axcuk nuwwih girat carrissan. Annah taniimit asettoonum way makkalinniyooy, way kaadu aba siinik excem hinna. Inkinnah afak edde yaabem hinna.

Ermiyaas 6:20

Saba deqsita rasuk yoh bahtan qaydarusut anu maca waah? Hinnay kaadu, xer baaxok bahtan qibaadah-haan-sukutit faxam mayyu. Yoh bahtan sadgoota yi garil oggol siinih mali. Cado akak carrisan sadgatay yoh abtaanahiyya siinik mafaxa» 'yaanam siinik iyye.

Ermiyaas 7:31

Isinni xaylok say-urru kee lab-urru sadgatah amol akak carrisaana'gidih, Hinnom Golo deqsitta goloh addal, Toofet deqsita arac bicsen. Aham anu amrisem hinna; yi afqado kaadu inkinnah oggoltam hinna.

Yacedkel 23:37

Ama namma kacbat biili yan. Dalwa lih abeenim, xeet kee cooxuk bicsen duyyeey; qiddeenim, yoh xalen xaylo. Yoh xalen lab-xaylo xeet kee cooxuk bicsen duyyeh bagul sadgatah qiden.

Hosiqa 5:6

Yallih sadgatah illi kee laa qideloonu'mmay, toh tu keenit mahayta. YALLI ken cabeh ikkal, kaa mageyan.

Hosiqa 6:6

Anu siinik faxam, kulli way yoo takcineenimi'kkal, saq sadgatah yoh qiddaanam hinna. Anu inni marak sadgatah qiden saqih xayta carrisaanah qaydarus ruubaanam hinna'mmay, yoo akah yaaxigen innah keenik faxa.

Qaamus 5:22

Cado akak carrisan sadgat kee, daro yi migaaqal sadgatah bahtan way, anu siinik moggola. Gablusen saqih sadgat siinik moggola.

Makaabon 11:39

Namma alsak lakal isi abbal tuduureeh, too waqdi usuk Yallah nadri akah culem abeh. Tonna-leemiik is bikirit tan baxuwwah anih rabte. Israayil marih qaadal, kulli sanatal affara ayro, qunxa baxuw Yeftac-baxáh rookah buxak bacakku gexxa 'yaanah rookitan. Too qaada akak raqtem tokke.

1 Samuwel 15:22

Samuwel iyyemii, «Hay meqehik, YALLI, amri kaak oggolaanam kee, kay sadgatah saqa qidaanamak macah lafitam kot celtaa? YALLIH garil kay sadgatah gabul le maruw qidaanamak, usuk iyyem abaanaah kay yaabat maqal haanam muxxo le.