Hosiqa 2:20 - NABUWWA KEE MALIKWA

²⁰ Siinih cule xagna siinil mamaka. Akah exce'nnah, inni mara sin abeyyo. Too saaku YALLA kinniyom yoh aaxigetton» iyye.

Hosiqa 2:20 ပူးပေါင်းရင်းမြစ်များ

Yasaqya 2:4

Mango doolatwah fanat bica abeleeh; baaxooxal yan tittin-way bicsele. Qeebi edde abak sugen seefwa buqre edde aban biriitah korselon. Qeebi edde abak sugen macaxu caxak luud edde yargiqen gileelah gacselon. Tahak wadir doolatwa gaaduh tittah magexxa; ahaysa qeebi tittat aboonuh masilaacsitan.

Yasaqya 62:4

Ahak wadir maaqilen magaala kok m'iyyan; ku rasuk abuuruh raaqe rasu 'yaanam m'iyyan. Ku migaq «Yalli ruffu akak iyya magaala» deqsitele; ku rasih migaq «Meqe rihimih rihimte barra» deqsitele. Macaay intek, YALLI isih baqli bis koh aallele.

Ermiyaas 24:7

Anu yoo edde yaaxigen kas keenih aceeyyooh, tohuk wadir isinnih yoo aaxigelon. Yi mara akkeloonuuh, anu kaadu ken Dagelta akkeyyo. Macaay inteenik, oson tikka 'yaanamaak yol aduurelon.

Ermiyaas 30:10

«Tonna kinnuk, Yaqkuub xayloy yi naqoosay, mameysitinay; Israayil ummatey, niya siinik addigille waytay. Tahat yabtam yoo YALLA. Ama xer baaxoy elle taniinik sin ayyaaqeyyo. Casbi gurrah elle tanin baaxok siinik radu waa mara ayyaaqeyyo. Isinni baaxo fan aduurettoonuuh amaanah xiinetton. Num sin maxagaay sin mameysiisa.

Ermiyaas 32:41

Keenih aba maqaane ruffu yoo heele. A rasuk way akah aarre waan innah, nagay yan daabisiyya keenit abeyyo. Tahamaay, keenih liyoh an xuwaawah abu waama.

Ermiyaas 9:24

Yoo yaaxigeeh, anu faxam yasmite num yenek, toh kaxxam kinnim yaaxigeemiiy amo elle yamqeemi. Niyaateh meqem tohu. Macaay inteenik, anu sahdah liyo kacni, yambaxe kacanu hinna. Cakki kee qadaalatak tan abto aba Dagelta kinniyooh; yoo ruffu haytam tamaha. Tahat yabtam yoo YALLA kinni» iyye.

Yacedkel 16:62

Ko'lih haysite qahdi wadir aqusbuuseyyo. Too saaku abba hayte umaane koh cabeyyo. Koh tu gactek, abba hayte umaane isik aaxaguk tut mayabta. Too saaku YALLA kinniyom yok aaxigetto. Ahat yabtam yoo YALLAY Mulki lehiyya» iyye.

Yacedkel 16:8

« ‹Sarra aki saaku wokkek gaca waqdi, dadalteeh baxuwwa tekkem kok uble. Qasunuk kok yan xagaral inni saroh exxa koh hayya heeh, koo kiciyyom koh warseh. Tokkel kol digibeyyoomuh qahdi koh culeeh; koo abiteeh yim tekke. Tahat yabtam yoo YALLAY Mulki lehiyya› iyye.

Yacedkel 34:25

Ken amo amaanah akah xinta'nnah, inni kee ken fanal xagana haysiteyyo. Ken baaxol enna 'ta alluwwa bayseyyo. Tonnal yi illi inkih meysi maleh bacarih tan baaxo kee garboh addal amaanah xiineleh dacrele» iyye.

Yacedkel 34:27

Coox caxâ-miru keenih xalele; buqrek daro orbisitelon. Kulli num isi baaxol amaanah keenik xiinele. Yi marak axawah edde yanin silsilat kalla heeh, naqoosah ken le marak currih ken ayyaaqu waa saaku, YALLA kinniyom yok aaxigelon.

Yacedkel 38:23

Nabna le Dageltay taahirik yanihiyya kinniyom mango baaxoh mara tonnal aybulleeyyo. Oson YALLA kinniyom tonnal yok aaxigelon» iyye.

Hosiqa 13:4

YALLI iyyeemih, «Anu YALLA kinniyooh, sin Dagelta kinniyo. Masrik sin bahtem yoo. Yook sa Yalli mayana. Sin cattam dibuk yoo.

Hosiqa 2:19

Israayil ummatey, num barral akah rihima'nnah, anu innih sin haysiteyyo. Cakki kee qadaalatat sin xiiniseyyo. Ahaysa kulli way kacanu kee xuwaawat sin xiiniseyyo.

Hosiqa 6:6

Anu siinik faxam, kulli way yoo takcineenimi'kkal, saq sadgatah yoh qiddaanam hinna. Anu inni marak sadgatah qiden saqih xayta carrisaanah qaydarus ruubaanam hinna'mmay, yoo akah yaaxigen innah keenik faxa.

Miika 4:3

YALLI baaxooxal yan tittin way bicsele. Kaxxa doolatway qande leh fanat bica abele. Qeebi edde abak sugen seefwa buqre edde aban biriitah gacselon. Qeebi edde abak sugen macaxu caxak luud edde yargiqen gileelah gacselon. Ahak wadir doolatwa gaaduh tittah magexxa; ahaysa qeebi tittat aboonuh masilaacsitan.

Zakariyya 9:10

Israayil mari le faaris-gaariiray carbi edde abaanahiyya keenik bukkuseyyo. Yarusalaamak carbi edde aban faroosa kaleyyo. Carbi edde aban gayse kee gaysê-xaylo ken waysiiseyyo. Sin malik baadal tan ummat wagrisele. Kay abbootan badak a af kee woo af takke baaxo duudusele. Furaat weeqaytuk xabba haanam kee baaxô-maggaraqah amma yaanam duudusele» iyye.