Hosiqa 13:15 - NABUWWA KEE MALIKWA

¹⁵ Israayil ummat away wir intam celtaamah; ayrô-mawqa le kabuk bacarih tan baaxok ruubu waa laqin caacay ken kafsele. Too caacay buyyitte kee qelwa keenik kafsele. Keenit muquk sugtem inkih beele.

Hosiqa 13:15 ပူးပေါင်းရင်းမြစ်များ

Yasaqya 14:21

Masgaada qimbisa! A malikih xaylo, ken kaxxa abbobti abte dambik gexxaamah, ambaxele. Keenik num xintoh abba mayakkaay, hinnay kaadu, baaxô-bagul mango magaala maxisan.

Yasaqya 17:13

Doolatwa baddi haffoh innah habbuy inta. Takkay immay Yalli ken yassacakku waa waqdi, qaleh amok caacay baahe siisah innah, wadir gacelon. Silayti baahe caffih innah wadir aduurelon.

Yasaqya 27:8

Ken tinqibeeh, baaxok teyyeeqe. Ayrô-mawqak silisse caacot, baaxok, YALLAW, ken tiskiliqeh.

Yasaqya 41:16

Qaraanal siisah innah ken fikiikisetton; silayti qaraanal ken beele. Caaco baaxol ken fuluulukusele. Toh tabloonu waytan waqdi, YALLAT ruffa axcetton. Israayil doore Dageltay *Kudduusuk yanihiyya assakootetton. Tahat yabtam yoo YALLA» 'yaanam iyye.

Ermiyaas 20:5

Oson buxal luk suggu 'yeenimiy edderra heenik tu macabaanay, inkih keenik beelon. Buxal luk suggu 'yen duyyek tu macabaanay keenik buubelon. Yuudâ-malikwa buxah addal luk sugte duyye inkih, kaadu isinni baaxo fan keenik beelon.

Ermiyaas 4:11

YALLI Yarusalaam mara lih edde yaabu waa uddur yemeeteh. Iyyu waamah, «Laqin caacayay xagar cararisahiyya bacarih tan baaxok sin fan ruubeyyo. Yamaatu waa caacay qunxa caacayay caffa gabat beya hinna.

Ermiyaas 4:12

A caacay akak yamaatu waam yoo kinnuk, kaxxa caacaya. A saaku anu inni ummattal innih ackumeyyo» keenik axcele.

Ermiyaas 51:1

YALLI iyyeemih, «Baabelon-rasu kee Baabelon marat sinam baysa caacay ruubeyyo.

Ermiyaas 51:36

Tonnal YALLI Yarusalaam marak iyyemii, «Yarusalaam maraw, siinil baaheenimih adda anu innih wagteyyo. Sin naqboytit siinil bahtem, anu keenil gacseyyo. Baabelon leek raceyna kafseyyo. Ken weeqaytu lee cabsiiseyyo.

Yacedkel 17:10

Ubkak toobokeh immay mango saaku kafe'kal maay sugelee? Ayrô-mawqak yamaate caacay tet yaagure way, malaqaymumta'nnaa? Woo elle tani ikkel makafta'nnaa?› siinik iyya» iyye.

Yacedkel 19:12

Yallak naqabuk gexxaamah, bagcarritak suge mari buxuxuk sibba tet heeniih; wonnah baaxot tet qideeni. Bacarih yan rasih kabuk amaatuk sugeh yan caacay xaylo teetik kafissa hee. Tet ludway maqar luk tene bututtukku teetik inte; kafteeh girâ-boco tekke.

Daaniyel 11:8

Oson yalla 'yeenih yaqbuden duyyeey birtak bicsen ceeloola kee, dahab kee lakqok bicsen duyye Masri fan dannabah beele. Tohuk lakal dago sanootah Suuriyah malikit qeebi maaba.

Hosiqa 10:1

«Israayil mari qinab caxay mango xaylo xaltah innal yeneeni'mmay, gaddaliino osak keenih elle ossaamal, yalla akke sinni duyyeh qibaada elle aban arooca xisen. Baaxo keenih allaggoowak allaggowteeh mango daro kee caxâ-miri aabakuk keenih elle yoobokeemil, xeetik bicsen qamidway yaqbudeenihiyyat aban bilqa lafitak laften.

Hosiqa 2:3

Siinik cintek, sara teetik kalla heeh, tooboke saaku qasunuk akah sugte'nnah, qasunuk tet heeyyo. Kafte baaxoy tu elle aabuke waytah innah tet heeyyo. Bakaarah rabele.

Hosiqa 9:11

Israayil mari luk yen kaxxa nabna, bar yublen soonoh innah, saaku mamaacissa. Tahaysa xaylo maxalaanaay, agbi keenik mayaadiqaay; mayandarran.

Yoonas 4:8

Ayro laqte waqdi, Yalli ayrô-mawqa le kabuk laqin caacay ruubeeh; Yoonas ayrô-dahan kaxxam kaa biyaakeemih sabbatah damaysiteh. Tohih sabbatah isi bagul, ahak rabam yoh aysuk ten, iyyeeh, «Aniimik rabam yoh tayse» 'yaanam afak kaak tewqe.

Naacum 2:9

Magaalal mango gaddaliino tanik, «Lakqo buuba! Dahab buuba!»