Ermiyaas 6:20 - NABUWWA KEE MALIKWA

²⁰ Saba deqsita rasuk yoh bahtan qaydarusut anu maca waah? Hinnay kaadu, xer baaxok bahtan qibaadah-haan-sukutit faxam mayyu. Yoh bahtan sadgoota yi garil oggol siinih mali. Cado akak carrisan sadgatay yoh abtaanahiyya siinik mafaxa» 'yaanam siinik iyye.

Ermiyaas 6:20 ပူးပေါင်းရင်းမြစ်များ

2 Samuwel 15:12

Usuk sadgat kabuk teenak abeeh, kabuk teenak kaadu Giilô-magaalal yan Acitoofal deqsita numuy Malik Dawuduh fayu acayuk yenehiyyah farmo ruube. Waqlak wadir malikil malsen mala digga baahak bahteeh; Absalaam kataata mari amagguk yemegge.

1 Malikwa 10:10

Is sarrak Malik Suleemanah gabat bahte mattaco kaah teceeh; affara alfih kiilo yakke dahabaay, mango caxâ-sifa kee bilqah haan xeetiy limo gibdihiyya kaah tecee. Caxâ-sifa, kaxxam mango caxâ-sifay ahaydumah Yarusalaam baaxol numuh antacawwime wayteh teneeh sarrah antacawwime waytehiyya.

Yasaqya 1:11

YALLI iyyamaa, «Isin, ‹Yallah abna› axcuk abtan mango sadgoota yot tu xiqtam maay takkalen? Isin, sadgatah abna axcuk, cado akak cararissan illih sadgat kee aroodissen saqih xayta akak carrissan sadgatak cayyeh. Laa kee illi kee wadar qabalay kulli way caxxaanahiyyat ruffu maxca.

Yasaqya 60:6

Kulli kaalibik koo fan amaatelon. Miidiyan kee Qeefa rasuk mango soosá luk kol amaateloonuuh, kok deraafit raqta baaxol too soosák amaggeleeh; Sabâ-garik dahab kee qaydarus gaalal quukah le mari amaatele. Too mari, anu abe kaxxa taamat yaabak, yoo fayliselon.

Yasaqya 66:3

«Sahda isih faxxem abbaasitta. Sadgatah saq qidaanam kee sahda qidaanam keenil inki gide. Anaqtu qidaanam kee kuti filla yaggileenimiiy, daro sadgatah baahaanam kee ceray qabala sadgatah caxaanam keenil inki gide. Qaydarus qeerisaanam kee, deedaltam yalla 'yeenih yaqbudeenim keenil inki gide. Yalla umâ-yabulih yan gital yaqbudeeniih, tohut ruffa iyyan.

Ermiyaas 14:10

YALLI tohuk a maral gacseemih: «Yok kudaanaah umaaneh abittok isinni nabsiyya maraaqisan. Tonna leemiik ken inqibeeh, aben umaane keenit macabay, ken akah digaaleyyo» 'yaanam iyye.

Ermiyaas 14:12

Soom kee dooqa abaanamah yol weeqaanamah, aban weeqa keenik moggola. Sadgatah cado akak carrisan saq qidaanamah, hinnay kaadu, dooqak keenih orobta'gidih daro yeceenimih, yi garil oggol keenik mali. Ken wadam hinnaay, carbi kee qulul kee dalkat ken seleyyo» 'yaanam yok iyye.

Yacedkel 20:39

YALLAY Mulki lehiyya kaadu iyyeemih, «Taway Israayil maraw, xeet kee cooxuk bicsen duyye taqbudeenim ableh ani'mmay, tamahat geytaanam ablettoonuk abbaasita. Tamahah, gexak teneeniik, yi amri duudusettoonuuh, xeet kee cooxuk bicsen duyyeh abtan sadgootak aadetton. Yi migaaqay taahirik yanihiyya nadaasa mabtan.

Yacedkel 27:22

Saba kee Raqmak yemeete badaaqat-aba-mari kaadu, ko'lih badaaqat abak yenen. Atu tellemmoh keenit kalta duyyet milaaguh, giffa 'ya caxâ-sifa kee limok mangoomuh yan xeet kee dahab koh edde acayuk sugen.

Hosiqa 8:13

Yi migaaqal sadgatah saq qidan. Qiden saqih cado yakmen. Takkay immay yooy YALLA kinni ken inqibeh, ken faxah maan. Oson baahen dambi aaxaguk ken akah digaaleyyo. Akak yemeeten Masri fan ken gacseyyo.

Hosiqa 9:4

Too baaxoy kenim akke waytahiyya gexoonu waan saaku, qinabak bicsen kamri YALLIH sadgatah acayuk maraaqan. Sadgatah saq qidaanamah YALLI keenik maraabita. Tonnah yan sadgat woo saaku akminnaan numul caraamu akkele. Rabe numih migaaqal yakmen maaqoh gide keenil akkele. Satqak bagi kibah yakmen maaqoh gidek keenih loowimele. Oson sadgatah qidan saqih cado, YALLIH Qibaadah-Qaril aban sadgatah keenik moorobta.

Malaaki 1:10

YALLAY Nabaamak Nabahiyya iyyeemih, «Yoh sadgat elle abtan aracal tu xiqe sinni gira urussaanamak, gira akah uruse waytan innah, qibaadah qarih afoofi siinik alfa num geenniyoy faxe raare. Isin abtaanam ruffu yoo mahaytaay; sin sadgat moggola.