Ermiyaas 50:36 - NABUWWA KEE MALIKWA

³⁶ Oson ginnili kee kalluwalleh lon marat qeebi aba! Too waqdi kaxxa duquurah sugeenim aaxigelon. Ken qaskarat qeebi aba! Ahak sarra kaxxa cunxo keenit radele.

Ermiyaas 50:36 ပူးပေါင်းရင်းမြစ်များ

2 Samuwel 15:31

Dawud, «Acitoofal Absalaam marat yengele» 'yaanam yoobbe waqdi, YALLA kallaceeh, iyyemii, «YALLAW, Acitoofal fayu foyya ab» iyye.

2 Samuwel 17:14

Too waqdi Absalaam kee Israayil mari yakkeemiik, «Acitoofal-fayuk, Cusaay-fayi yayseh yan» iyyen. YALLI woh akah abemii, Acitoofal baahe meqe-fayu kataate waana'gidiiy Absalaamal bala obta'gidi.

2 Aydaad 25:16

Yaabak fanat kaak radda 'yeh, too tiyak malik kaal gacseemihii, «Malikih fayu yecee num koo abtem iyyaay? Ahaysa yab eyseed; cintek, rabi gadda akketto» kaak iyye. Nabi fayuk kaak yeedeeh immay, qangara kaat heeh, iyyeemihii, «Ta saaku Yalli baati koh loowem ableh an. Toh elle ablemii, umaanek ta axxul lem abba hayteh, away yi fayu cintaamal kok ableh an» kaak iyye.

Yasaqya 43:14

YALLAY sin wadahiyya iyyam le. Israayil doore Dageltay *Kudduusuk yani siinik iyyamaa: «Sin taagah, Baabelon fan amri ruubeh an. Oson inkih dabbô-mara akkeloonuh, ken maraakibiy kaxxam edde yakkaleenihiyyat kudelon.

Yasaqya 44:25

Ginnili kee kalluwalle dirableela kinnoonum aybullee. Faal qida mara kee cutuk-beya duquura kinnoonum aybullee. Sahda le ixxiga, iggima kinnim keenik aybullee.

Ermiyaas 48:30

Yoh tu gactek, anu oson sahdat aban bura kee, isinni nabsit yakkaleenih gide keenik ableh ani'mmay, woh tu keenih maxiqta. Abeenim inkih gaba kalele. Tahat yabtam yoo YALLA» 'yaanam iyye.

Ermiyaas 49:22

Bosrâ-magaalal yan marat ken naqboytit, qawi galwa fakka hayteh tamaate way sahdak gital duyye elle qawta'nnal, ken qawelon. Too saaku Edom qaskar meysih lacawat tan barrah innah gacelon» 'yaanam Yalli iyye.

Ermiyaas 50:30

Tohuk gexxaamah, too takku wayta ayro, furrayna magaalak gitittel keenik qidelon. Qaskar kaadu keenik selelon. Tahat yabtam yoo YALLA» iyye.

Ermiyaas 51:23

Illi kee illi duwat yan mara edde qidsiisak sugem, sin gaba. Buqre-abe mara kee buqre edde aban faaris edde selak sugem kaadu sin gaba. Xintoh abbobti kee ken doolatak saqoltih yan mara edde bayisak sugem sin gaba.

Ermiyaas 51:30

Baabelon qaskaray agiirah tenehiyya qeebih gaba marubta. Isi megdebil elle soolak raaqele. Niya keenik addigilleleeh, agbi innah qeebik soolak raaqelon. Cayli keenik boolaatele. Baabelon magaalah culmay birtak bicseeni addigillele. Qarwat gira ruubelon.

Ermiyaas 51:32

Dora fanah elle tabak sugen gititte ken naqboytit keenik tibbixeeh. Gade elle tan baaxot gira ruuben. Toh tuble qaskar kaxxa cunxoh cunxitte, 'yaanamih xaaguh kaah warselon.

Naacum 2:8

Yiddigille dorak caxitte leeh innah, ummat Nanawê-magaalak gexxa. «Ummatey, mardina» keenik iyyaanamah, moggolaanay bisoh kudan.

Naacum 3:13

Assuuriyah qaskar meysih agabu akkele. Cuduud dacrissa qaskar matanaay; naqboytit akak elle waasinta innal matan. Koositih bicsiten aroocat gira gexele.

Naacum 3:7

Hagga axcuk, ‹Nanawê-magaala abuuruh raqteh matanaa!› axceloonuh, ‹Teetih xuwaawa mari mayana› axcelon. Teetih qaada mara magenniyo» iyye.