Ermiyaas 50:29 - NABUWWA KEE MALIKWA

²⁹ YALLI iyyemii, «Gaysê-baxi qalaamal yaaxigen marak, ‹Ugutay, Baabelon marat qeebi aba› inxica. Magaala keenik marot haay num keenik awqe kala. Oson sinaamal bahha heenim keenil baaha. Oson sahda edde abbaxuk sugen xintot ken haa. Toh keenik aba akah axcem, yoo YALLA aaxaguk masuginnoonuuy, kaxxiina xagarat hayya heenih, anu faxe waam abak sugen. Anu YALLAY *kudduusuk yaniih Israayil ummat doore Dagelta kinniyo.

Ermiyaas 50:29 ပူးပေါင်းရင်းမြစ်များ

Yasaqya 37:23

Atu xaafteeh qayto edde abtem iyya takkale? Kaxxiinah amo qaraanal elle haytem iyyaay? Caddi akah abe waytem, iyya kot celta? A ceele-waytam akak axcuk sugtem, Israayil doore Dageltay *kudduusuk yanihiyya kinnim mataaxiga'nnaa?

Yasaqya 47:10

Isinni makari kee uma-taamat kaxxam takkaleeniih, ‹Nanu abnam tablem matan› 'yaanam intan. Litoonum takkalen kas kee ixxiga makot sin beyteeh, ‹Nanu nanih; nek sa tu matan› 'yaanam intan.

Ermiyaas 25:14

A saaku oson yibbixen baaxooxah mara naqoosah loonu'mmay, oson isinnih, marin naqoosa edde yakkoonu waan ayro tanih. Marin naqoosa ken abeyyo. Oson sinaamal bahha heenim keenil baaheyyo› 'yaanam iyye» keenik iyye.

Ermiyaas 48:26

YALLI kaadu iyyeemih, «Mooyab mari yot missoowaanam faxak suge'mmay askireloonuuh, isinnih aben alliyot amboroorokelon. Sinam keenil anqaasah rabele.

Ermiyaas 49:16

Sahda nek meysitta axcuk kaxxiinittaanah immay, sin kaxxiina sin aylahisseh. Dabaaqah elle tantoonum, xixxaqak kibuk tan boolok bagu. Dabaaqah qawiitak kaxxih fayya le aracal tantoonu'mmay, anu addah sin oobiseyyo. Tahat yabtam yoo YALLA› » keenik iyye.

Ermiyaas 50:24

Baabelon maraw, qeebi edde abteenim yoo'mmay, a saaku anu siinih hee ofloh addat radden. Oflo siinih haytem yoo kinnim aaxige'kal, edde radden.

Ermiyaas 50:26

Kulli gambik tet fanah ama. Tet addal tan riigitte faka. Orobte daro inki aracal elle gaaboysan innah, tet addal tanim inki aracal gaaboysak tittak bagul haay, bayisa. Tu tet bagul macabinay inkih bayisaay abuuruh caba.

Ermiyaas 50:32

Sin doolatay kaxxiinah moyya qaraanal haytahiyya andafoofelele. Tondofoofoleh annikissele. Tohuk wadir num sin muugusa. Sin magaaloolit gira ruubeyyo. Keenil sugga 'tem inkih too girah gadda akkele» iyye.

Ermiyaas 50:9

Kilbat le kabul tan qande le doolatwa titta geysissa heeh, keenit ruubeyyo. Too mari ken abbixele. Too mari keenil hawiseloonuh, qeebil keenik ayselon. A mari admol yimixxige maraay gaysê-baxa qideenik wadir, irbak boohak mahoxsan.

Ermiyaas 51:24

«Tonna'mmay Israayil maraw, isinni namma intih abalih, Baabelon-mari Siyoonul baahe umaanek gexxaamah, ken digaaleyyo. Tahat yabtam yoo YALLA» iyye.

Ermiyaas 51:3

Too saaku ken qaskar gaysê-baxa qiddam keenih maqambaalina; hinnay kaadu silac haysitaanam keenih maqambaalina. Furrayna kinni-way macabinaay inkih tan qaskar selli keenik haa.

Ermiyaas 51:49

Baabelon mari duma mango mara qideeh; takkay immay a saaku, Israayil marat aben qidiyyah baati keenit akkele. Tahat yabtam yoo YALLA» iyye.

Ermiyaas 51:56

Naqboyti Baabelon baysa'gidih yamaateh yan. Kay qaskar Baabelon-qaskar abbixeleeh; gaysê-baxa keenik aggilelon. YALLI, atu bahteemih koo digaala Dagelta. Cane keenik gacseleeh; ken digaalele.

Daaniyel 11:36

« ‹Suuriyah malik isih faxxa heem abak sugele. Yallitte akak inxicci 'yaanamak nabiyoh axcuk tirtirisele. Yallittek naba Dagelta kinni way, uma'nnal xaafele. Yalli kaa digaalla haam fan toh abak sugele'mmay, Yalli hununuh abeyyo inxicca 'yem abele.

Daaniyel 4:37

Tonna leemiik yoo Nabkadnessar qaraanal yan Malik faylisaah kaa assakaxxeh. Usuk le nabnat yaabah, usuk abba heem inkih cakkik taniimiiy, kay giti cakki gita. Kaxxiina le marak kaxxiina kalu dudda le» 'yaanam iyye.

Daaniyel 5:23

qaraanal yan Goytak giddih tan taamah taamitteeh; kay qarik dannabah orbisen kobbaayiy kee sacnittel, koo kee ku xintoh miracwaay ku agabu kee caggô-gubbih caggoh ginnaaqot lito agabu, qinabak bicsen kamri tooqoben. Too waqdi yalla axcuk dahab kee lakqooy nacaas kee biriitaay coox kee xeetik bicissen duyyey tu aabbe waytah tu able waytah tu aaxige waytahiyya faylisse. Yallay koo wadaah koo qidaah atu abba haytem inkih gabat lehiyya massakaxxinnito.

Qobadya 1:15

«Yoo YALLI kulli numul abeemih mekelu waa ayro xayih. Edomuh yooboke maraw, isin sinaamak abba hayteenim siinit akkele. Sin abini siinil aduurele.