Ermiyaas 46:5 - NABUWWA KEE MALIKWA

⁵ Takkay immay afak toh iyyaanamah, cunxoh wadir-wadir aduurih ken able. Qeebil gacah ken able; cunxoh kaxxam aawwih ken able. Quuruuk foocah yardeenimik sah, wadirih mawagtan.

Ermiyaas 46:5 ပူးပေါင်းရင်းမြစ်များ

Yasaqya 13:8

Yakkeenimiik wariggiteloonuuh; biyak ken abbixele. Xalay edde xayyoowe barrah innah emreqeeqedelon. Wariggah mariiy mara keenik wagga heeleeh wacarriyih fooci keenik gombod ceelele.

Yasaqya 19:16

Too ayro, Masri mari agbi innah gilic leela akkele. YALLAY Nabaamak Nabahiyya ken digaala'gidih gaba fakem yabloonu waan waqdi, cunxitelon.

Yasaqya 42:17

Xeet kee coox yaqbudeeh elle yeemeneeh; gabak bicsen duyyek, ‹Ni dageltit siini› iyya mari, qaybit radeleeh, kaxxa wacarriy ken abbixele.»

Yasaqya 5:25

Tonna leemiik YALLI isi marat bagcarriteeh, isi gaba ken yuybulleeh ken digaale. Qaleeli yengeyyeeh, rabe marih raysi guddaafah innah gititteh addal rade. Tohuh, Yallih naqbi maxamcaay, ken edde digaaluh ruube gaba wadir magacsa.

Ermiyaas 20:10

Sinam tutuc axcih aabbe. ‹Kulli-ikkel-cunxo-qidek, a num doolat abbobtih warisnay› 'yaanam axcih ken aabbe. Yi kataysis aylahu yok wagitta. ‹Ayrok teena aylahissa kaa hayneh kaa abbixennooh cane kaal gacsenno› iyyan.

Ermiyaas 46:15

Kaxxa yallah luk sugten Afis migaq le awur akah kudem macaay? Afah akah radem macaay? YALLI kaa yootoke.

Ermiyaas 46:21

Oson maalut xaamen qaskar arooduh awur innah gacteh tani'mmay, qeebil masoolaanaay, awyah hayya heeloonu'kkal, qeebi maaban. Edde digaalimoonu waan ayroy YALLI bala keenil oobisu waahiyya xayyowteh.

Ermiyaas 49:29

Siraqwa kee illi keenik dannabah orbisa. Siraq addal lon reebuh haan sara keenik beya. Siraq addal elle haanamak tu macabinay dannabah keenik beya. Gaala kaadu keenik buuba. Too waqdi ‹Kulli ikkel cunxo net qidan!› 'yaanam axcelon.

Ermiyaas 49:5

Yoo YALLAY Dagelta kinnih, Nabaamak Nabahiyya siinik iyyaamah: Kulli kabuk umaane siinit ruubeyyo. Too waqdi kulli num siinik kudmah hayya heeleeh; baaxo cabetton. Kulli num siinik isi roocih megloh kudele. Sarrak luk sugten qaskar gaabossa heeh titta fanah baaha num mageytan.

Ermiyaas 6:25

Barri genxu manalliila; gitittel ibah genxam kaadu manalliila. Macaay inteenik, ni naqboytit silac leeh, kulli ikkel nee meysiisaanaah marot nee yabbixen» iyyen.

Yacedkel 32:10

Anu kol baahu waam ummatal hagga akkele. Yi seef ken fan kinisu waa saaku malikwa meysih axaxitele. Celemih elle tan aracak koo kalu waa saaku ken roocih meysi ken abbixele» iyye.

Yacedkel 39:18

‹Qaskar raysak cado akmettoonuuh, baad abbobtih qabala aaqubetton. Yakkeenimiik, maruw akkiiy ida akki reyta akkiiy, hinnay kaadu, ariiqo bahsiisen awur akki elle yasguuden innal, ken asguudelon.

Naacum 2:8

Yiddigille dorak caxitte leeh innah, ummat Nanawê-magaalak gexxa. «Ummatey, mardina» keenik iyyaanamah, moggolaanay bisoh kudan.

Naacum 2:9

Magaalal mango gaddaliino tanik, «Lakqo buuba! Dahab buuba!»

Xafanya 1:14

YALLIH cokmih ayroy kaxxa ayro kinnihiyyah mamaata nabam xayiih, too ayroh mamaata sissikih. Too ayro uma weeqa abeloonuh, cunxitelon. Kaxxa agiirinna luk sugte labhak kinni way qeebil af awqeleeh, waagiselon.