Ermiyaas 4:7 - NABUWWA KEE MALIKWA

⁷ Gablah addak yewqe lubaakih innah, ummatta bayisu waa num aracak ugteh gitat yan. Yuudâ-maraw, sin baaxo abur aba'gidih ugteeh yamaateh yan. Ummatta baysele. Elle sugten magaalooli abuuruh raaqele. Sahdayti addal akak maraaqa.

Ermiyaas 4:7 ပူးပေါင်းရင်းမြစ်များ

2 Malikwa 24:1

Yahoyaakim malikih suge saaku, Baabelon-malikih suge Nabkadnessar Yuudâ-rasu warare. Tohuk wadir Yahoyaakim Nabkadnessar-milkih gace. Sidooca sanatak lakal, kay milkih gacaanam cineh.

2 Malikwa 25:1

Toh yuble waqdi, Baabelon-malik qaskarak tu cabe'kal beyya heeh, Xidkiya malik edde yekke sagalhaytô-sanatak tabanhaytoh alsak tabanhaytoh ayrot, Yarusalaam wararen. Magaalak irol megdebih edde gacan arac haysitta heeniih, sarrak magaalal yan mari akah awqe waa innah, dariifat maro teetik xisen.

Yasaqya 1:7

Elle sugtan baaxo siinik baateeh, magaalooli siinik cararteh. Isin abalih, marin mari tubqureenim baysaah, baaxo siinik abur aban.

Yasaqya 5:9

Anu YALLAY Nabaamak Nabahiyyak inni aytih oobbeemih, «Ama kaxxa qarwa abuuruh raaqeleh, sahdayti addal akak maraaqa.

Yasaqya 6:11

Too waqdi anu kaak exceemih, «YALLAW, ah magide fan sugtu waytaamaay?» exce. Too waqdi usuk yok iyyeemih, «Magaalooli inkih abuuruh raqqaay foyya tikka intam fanah akkuk sugeleeh, tonnah kaadu, qarwa sinaamak foyyah raqqaay baaxol sugtem inkih bayya intam fanah akkuk sugele.

Ermiyaas 2:15

Sinam lubooka siinil akah tekkem maay taaxigen? Baaxo siinik abur aben. Dabaaqah elle sugten magaalooli siinik carariseeniih tu elle ane wayta baaxoy haanah tani siinik aben.

Ermiyaas 22:6

«Yi garil, malik-qari Lubnaan qaleela kee Gilqad rasi qaxah leh gide le. Takkay immay too qax-maqaane le qari bayissa heeh, abur kaa abeyyoomuh inni migaaqal xiibita.

Ermiyaas 22:7

Anu malik-qarih ruubu waa mari, godmat aagaruk, kaat tan qamidway *sariidak bicseeni kitittiffa heeloonuh, girat qidelon.

Ermiyaas 25:38

YALLI, qansarite lubaakay gablah addak yewqeh innah, ken baaxot dadho abe. Kay bagcarra kee carbi baaxo abuuruy lac sinniih num sinni abte.

Ermiyaas 25:9

kilbatak sinam baaheyyooh, Baabelon malikiy migaaqah Nabkadnessar deqsitaah yi naqasuh yanihiyya siinit ruubeyyo. Ta mara bahha heeh, a baaxo kee a baaxol yan mara kee dariifal yan marat inkih ruubeyyo. Keenit tekkem yabalu waa mari hagga axcele. Buruten maray baaxot qideenihiyya ken abeyyo. Sarrah akak ugute waan baatih ken bayseyyo. Tahat yabtam yoo YALLA› iyye.

Ermiyaas 26:9

YALLI, ‹A Qibaadah-Qarik Siilok abem abeyyo› iyyeeh, ‹A magaala num dabaaqah elle gace waa abur abeyyo› iyye; akah intem macaay?» axcuk, yakkeenimiik kaa dadhen.

Ermiyaas 27:8

Takkay immay usuk ta abbootan gabat lem fanah, doolat takkuu, faxe mara takku, usuk fillal siinik haa *madmad (kambar) oggole waah kay amri cinu waa mari yenek, too mara usuk seefit ken selam fan carbi kee qulul kee dalkat ken digaaleyyo.

Ermiyaas 33:10

YALLI qagissa heeh, iyyeemih, «Ummat intaamah, ‹A baaxo bacarih tan baaxoy num kee lac elle deedaltahiyya tekkeh tan› 'yaanam iyyan. Toh keenik numma. Yuudâ-magaalooli kee Yarusalaam gititte sinaamak nummah foyyah raqteeh, lac kee num addal akak maraaqinna. Takkay immay ahak sarra,

Ermiyaas 34:22

Yarusalaamat nammayhaytô qeebi abaana'gidih, uduura keenik axceyyooh; too waqdi aduureloonuuh, qeebi teetit abelon. Qeebit tet abbixeloonuuh, tet carriselon. Yuudâ-magaalooli bacarih tan baaxoy num sinniih lac sinni abeyyo. Tahat yabtam yoo YALLA› 'yaanam keenik inxic» iyye.

Ermiyaas 4:29

Qeebih faras amot yan mara kee gaysê-xaylo gabat le mari abah yan mamaatah xongolo yaabboonu waan waqdi, magaalal sugu waa mari kudele. Marak garab garbo elle tani'kke fan kudeleeh, garab booloh amot yan xeetih gubat culelon. Magaalooli inkih abur akkeleeh, num addal akak maraaqa.

Ermiyaas 44:2

«Keenik intaamah, ‹Yoo YALLAY Nabaamak Nabah, Israayil doore Dagelta kinnihiyya, Yarusalaam-magaalal oobise bala kee, raqqa 'te Yuudâ-magaaloolil ruube bala isinnih tubleenih. A saaku woo arac num kee lac sinni abuuruh yan.

Ermiyaas 46:18

«Malik akak 'yaanam, yoo YALLAY Nabaamak Nabahiyya. Waara Yalli yoo immay siinik axcemii: Taabor qale qaleelak xeeruk elle raqtaah, Karmel qale kaadu badak fayya luk elle raqta'nnah, siinit carbi aba numih qande kulsah too bis luk siinik raaqele.

Ermiyaas 49:19

«Ordon garboh addak garciik yewqe lubak lac elle gilisa'nnal, ken giliseyyo. Ken baaxok ken xiiriyeyyo. Tohuk wadir too baaxol innih doore abba heeyyo. Yoo eleelu iyyi duudaa? Yol saduh gactu duddam iyyaay? Yi foocal soolu duuda amoyti mayan.

Ermiyaas 5:6

Ta umaanek gexxaamah, garboh addak tewqe lubookah gadda akkelon. Bacaril tan suula ken kitittifele. Kabqi oson elle yanin magaaloolih dariifal ilaalisak suggu 'yeh; yawqen waqdi ken kitittifele. Toh keenit akah takku waytam, aban dambi keenik yemeggeh. Ayrok ayro uma taamat qagitak maacisan.

Ermiyaas 50:17

YALLI kaadu qagseh iyyemii, «Israayil mari illiy lubak soole kaleeh yayraddehiyya yekken. Naharak Assuuriyah malik cado keenik yokmeeh; sarrak Baabelon malik lafoofi keenik yiggiggile.

Ermiyaas 50:44

Yalli qagseh iyyemii, «Ordon garboh addak garciik yewqe lubak lac elle gilisa'nnal, Baabelon-mara giliseyyo. Ken magaalak ken xiiriyeyyo. Tohuk wadir too baaxol innih doore abba heeyyo. Yoo eleelu iyyi duudaa? Yol saduh gactu duddam iyyaay? Yi foocal soolu duuda amoyti mayan.

Ermiyaas 8:16

Neh qeebih yamaate mari Daan deqsitta magaala gufeh yan. Ken faaris abah yan xongolo nel radda. Oson edde yanin faaris abah yan xongoloh, inkih tan baaxo axaxittah tan. A mari akah yamaatem, ni baaxo kee tet addal enna 'tam baysa'gidiiy ni magaala kee tet addal yan mara sela'gidi» 'yaanam iyyan.

Ermiyaas 9:11

YALLI yok iyyemii, «Yarusalaam yiddigille abur abeyyo. Wakri dabaq tet abeyyo. Yuudâ-magaalooli abuuruy num sinniih lac sinnihiyya abeyyo» 'yaanam iyye.

Yacedkel 12:20

Away ummat kibuk elle tan magaalooli abur akkele. Inkih tan baaxo num sinniih lac sinni bacari akkele. YALLA kinniyom yok taaxigoonu waytaanam, too saaku, keenik inxic» yok iyye.

Yacedkel 21:31

Yi naqabu siinil oobisu waa waqdi, kaak yawqe girah huuri le inna abletton. Racmattak tifa sinniih, umaane abaanamak meysite sinni marih gabal sin heeyyo.

Yacedkel 32:2

«Bani-adantow, darraqah takke boogey Masri marah aboonu waanahiyya ah teeti. Doolatwa fanat qande le lubak is takkale. Takkay immay dori addat ibak gaba tasgayye xabaadoh gide kinnito. Lee ibat kalla abteeh, darraqosseh.

Daaniyel 5:19

Usuk nabna le numuk yeneemih sabbatah, mango baaxoh mara kee mango meelah yoobokeeh mango afah yaaba mari kaak aben meysi kaak axaxitak sugen. Qidam faxa num qidak sugeeh, wadam faxa num wadak suge. Qawratat qidam faxa num qidak sugeeh; yassakaxxem faxa num assakaxxuk suge.

Daaniyel 7:4

«Naharsi ali lubak ceelak yen. Takkay immay gabilleemah innah galwa luk yen. Woo ala wagitak suge waqdi, galwa kaak kalen. Sarrak woo ala xinkiyya heeniih, too waqdi sinam innah salafti namma ibah soole. Tohuk lakal sahdayti-le-kas kaat heen.