Ermiyaas 30:18 - NABUWWA KEE MALIKWA

¹⁸ YALLI kaadu iyyeemih: «Yaqkuubuk radde kedooda le baaxo fan gacseyyo; num numuh keenih xuwaaweyyo. Yarusalaam magaala nammeyhaak xissiimele; teetil suge malik qariy yiddigillehiyya xissiimele.

Ermiyaas 30:18 ပူးပေါင်းရင်းမြစ်များ

1 Aydaad 29:1

Malik Dawud inkih tan ummatak iyyeemih, «Yalli malikih siinih doorem, yi baxa Suleemana. Takkay immay usuk ahayduma qunxa numuuy; taama elle aban innih ixxiga mali. Away xisneh kaa qambaltam, malik-qari hinnaay, Dageltah yan YALLIH Qibaadah-Qari. Tonna-kinnuk mango taama faxxiimele.

1 Aydaad 29:19

Yi baxa Suleeman ku xinto kee amriiy atu intem baguuk aba'gidih, fayxi kaah ucuyaay; a Qibaadah-Qariy xisnê-duyye akah eceehiyya xisa'gidih, fayxi kaah ucuy» 'yaanam axcuk Yalla luk yaabe.

Nacmiya 7:4

Yarusalaam kaxxa magaalak tene'mmay mango mari tet addal mananna. Mango qarwa tet addal xise'kal yenen.

Yasaqya 44:26

Takkay immay yi naqoosa, ‹Annah tanim akkele› akak intem kee yi farmoytit, ‹Yalli nek iyye› axcuk edde yabba 'tem inkih numma akkele. Yarusalaamal ahak sarra ummat dabaaqah gacele. Yuudâ-magaalooli ahak sarra xissiimele. Too magaalooliy abuuruh sugtehiyya ahak sarra xissiimele 'yaanam exceeh; toh akkele.

Yasaqya 44:28

Kooris deqsita numih giddinaamak, ‹Usuk yi aftok baaxo xiinisele› 'yaanam axce. ‹Anu aba kaak axcem abele. Yarusalaam magaala nammayhaak akah xissinta innah amri aceele. Yallih Qibaadah-Qarih-rakiibo xisele› 'yaanam axce» iyye.

Ermiyaas 23:3

«Inni maray baatik saaboh raaqehiyya away fixixih elle abbixe baaxok gacseyyooh, elle yooboken baaxo fan ken gacseyyo. Ken gacsek lakal, isinni baaxol mango xaylo xaleloonuuh andarrelon.

Ermiyaas 29:11

Siinih looweh an maqaaneh adda taaxigem yooy; siinih looweh abbixem, siinih meqe niqmata'kkal, sin biyakta umaane hinna. Takkay immay amaan akak geettoonuuh, isin geenno axcuk qambaalitak sugten maqaane akak geetton.

Ermiyaas 30:3

Macaay intek, Israayil kee Yuudâ-maray yi mara kinnihiyya ken baaxoh edde gacisu waa ayroora amaatele. Ken kaxxa abbobtih ikoytah ecee baaxo fanah ken gacseyyooh; ken baaxo keenih gacseyyo. Tahat yabtam yoo YALLA› 'yaanam kaak iyye.

Ermiyaas 31:23

Kaadu YALLAY Nabaamak Nabah, Israayil doore Dagelta kinnihiyya yok iyyeemih: «A mara seewah elle abbaxuk sugen baaxok gacisu waa saaku, Yuudâ-rasu kee Yuudâ-magaaloolil yan mari ah ablele. Too waqdi, ‹Siyon-qaley taahirik tanit YALLI barkat haay. Cakkik-tan-maqaane le Dagelta elle yan aracat YALLI barkat haay› 'yaanam dooqah axcelon.

Ermiyaas 31:38

YALLI qagseh iyyeemih, «Yarusalaam magaala yi migaaqal edde xissintu wayta ayroora amaatele. Sahda akak yabloonuh xisen Cananal-Qariy amo-xeerik xabba haanamaay, Rukni-Afah deqsita aracah amma 'yaanam edde xisoonu waan wakti amaatele.

Ermiyaas 31:4

Kiciyyo Israayil maraw, ahak sarra sin xiseyyo; ahak sarra karambo xabqet hayya hayteenih farcatah digiretton.

Ermiyaas 31:40

Away baruuga kee guddaafa edde qidan golo kee, Kidroon buyyik daga le kabu raqta booxak xabba haanamaay, Faaris-Afa deqsita aracak ayrô-mawqa le qaxat raqqa 'ta baaxo inkih, yoh caben baaxoy taahirik tani akkele. Too magaala tahak wadir mataddigilaay mabaata» 'yaanam iyye.

Ermiyaas 32:15

YALLAY Nabaamak Nabah, Israayil doore Dagelta kinnihiyyaa, ‹Buxaaxi kee buqre-baaxo kee qinab xala coox elle yaabuke baaxo, wadir edde limmoysoonu waan wakti amaatele› 'yaanam iyyeh yan, kaak exce.

Ermiyaas 32:44

Ahak sarra tama baaxol sinam baqurê-baaxo limmoyseleeh; limo elle abbaasiten inni, sarra sumaq keenih yakke'gidih, waraakitil aktubelon. Too limo elle tekke inna kaadu sinam foocal abbaasitelon. Taham elle takku waytam, Benyam rasu kee Yarusalaam dariifal tan gaandoodi kee Yuudâ-rasul tan magaalooli kee, kaxxa qaleela kee mango koomaami le baaxol geytinta magaaloolih addal akkele. Yuudâ-rasuk gabbi-qaxat raqta magaaloolil kaadu toh akkele. Ahak sarra ken baaxoh ken gacseyyo. Tahat yabtam yoo YALLA» 'yaanam iyye.

Ermiyaas 33:11

sahda qililo elle abah aabbetton. Digibih sinam elle digirah abletton. Anu keenih abe maqaaneh candu gacsaana'gidih, yi Qibaadah-Qari sadgat baaha mara abletton. Sadgat baahan waqdi, yi Qibaadah-Qarih addal, ‹Ummatey, YALLAY Nabaamak Nabahiyya faylisa! YALLI maqaane le Dageltak, candu kaah gacisa! YALLIH kacni mayambaxak, tohul candu kaah gacisa› 'yaanam axcuk, candu yoh gacselon. Ken baaxo fanah ken gacissaay gaddaloola ken abba heemih candu yoh gacselon. Tahat yabtam yoo YALLA» 'yaanam iyye.

Ermiyaas 33:7

Israayil kee Yuudah yooboke mara, seewah ken been baaxok, ken baaxo ken gacseyyooh, duma akah suggu 'yen mara ken abeyyo.

Ermiyaas 46:27

«Yaqkuub xayloy, yi naqoosay, mameysitina. Israayil ummatey, niya siinik addigille waytay. Ama xer baaxoy elle taniinik sin ayyaaqeyyo. Casbi gurral elle tanin baaxok siinik radu waa mara ayyaaqeyyo. Isinni baaxo aduurettoonuuh, amaanah sin xiiniseyyo. Num sin maxagaay sin mameysiisa.

Ermiyaas 49:39

Takkay immay ken baysek sarra ken gacseyyooh, akah sugen gaddaleela ken abeyyo. Tahat yabtam yoo YALLA» 'yaanam iyye.

Ermiyaas 49:6

Takkay immay sarrî-dabaanal Qammon mara akah sugen gaddaleelah gacseyyo. Tahat yabtam yoo YALLA» iyye.

Yacedkel 36:11

Ummat kee lac aymaggeyyo. Mango xaylo xalettoonuuh, dumak amaggetton. Dumak akah sugten innah tanoonay sin axceyyo. Dumak fuli gaddaliino siinit heeyyo. YALLA kinniyom too saaku yok aaxigetton.

Qaamus 9:14

Israayiliy yi ummat kinnihiyya le baaxoh gacseyyo. Tiddigille magaalooliy abur tekke wadir xiseloonuuh; addal dabaaqah akak gacelon. Qinab aysubukeloonuuh, qinabak bicsen kamri attaaqabbelon. Mango coox aysubukeloonuh xaylo akak akmelon.

Zakariyya 1:12

Too waqdi YALLIH-malaykatti, YALLAK iyyeemih, «Nabaamak Naba YALLAW, taham fanah Yarusalaam magaala kee Yuudâ magaaloolil tan ummatah malcina-tabanih sanatih gide naqabut sugte. YALLAW, ahaysa ku racmatta keenil obtu waytam maa saaku?» iyye.

Zakariyya 1:16

Ahaysa Yarusalaam emeeteh aniih, teetih racmateyyo. Yi Qibaadah Qari nammeyhaak xiseloonuuh, Yarusalaam kaadu nammeyhaak xissiimele. Tah intam yooy YALLAY Nabaamak Nabahiyya› 'yaanam siinik iyya, keenik inxic» yok iyye.

Zakariyya 12:6

«Too ayro Yuudâ-kedoh abbobti caffa takme gira abeyyo. Axaw axawah heen qaysot gexxa gira ken abeyyo. Dariifal keenik enna 'ta doolat inkih bayselon. Yarusalaam marah tu gactekiiy amaanah raaqelon.

Zakariyya 12:7

«Dawuduk rade mara kee Yarusalaamal yan mari, Yuudah yooboke maray raqqa 'yehiyyak nabnah ayse waana'gidih, yooy YALLAH yani naharsi nasri Yuudâ marah aceeyyo.

Zakariyya 14:10

Gabaq deqsita aracay kilbat le kabut raaqak xabba haanamaay, Rimmon deqsita aracay gabbi le qaxat raaqahiyyah amma 'yaanam fan booxa akkele. Yarusalaam magaala dariifal teetik tan baaxok fayya axcuk raaqele. Magaalak exxa Benyam-Culma deqsitta afak xabba haanamaay, duma magaala akak culak sugen af elle suge arac fan gexak, Rukni-Afah deqsita arac fan gufele. Sahda akak yabloonuh xisen Cananal-Qariy amo-xeerik, malik buxah marih qinab kamri axmuumuk elle bicisak yenen arac fan gufele.