Ermiyaas 30:10 - NABUWWA KEE MALIKWA

¹⁰ «Tonna kinnuk, Yaqkuub xayloy yi naqoosay, mameysitinay; Israayil ummatey, niya siinik addigille waytay. Tahat yabtam yoo YALLA. Ama xer baaxoy elle taniinik sin ayyaaqeyyo. Casbi gurrah elle tanin baaxok siinik radu waa mara ayyaaqeyyo. Isinni baaxo fan aduurettoonuuh amaanah xiinetton. Num sin maxagaay sin mameysiisa.

Ermiyaas 30:10 ပူးပေါင်းရင်းမြစ်များ

Yasaqya 14:3

YALLI, isin luk sugten biyaakak sin urseleeh; cisabbootiyyak amaanah sin xiinisele. Dirkih sin absiisak sugen gibdi taamak sin ayfoofele.

Yasaqya 35:9

Lubak kee sahda takme garboh alluwwa woo gitat magexxa. Takkay immay Yalli dambi akah cabe maray wadehiyya too gitat gexele.

Yasaqya 43:5

Qagseh iyyemii; «Anu sin lih ani'mmay mameysitina. Ayrô-mawqa le kabul tan sin xaylo siinih gacseyyo; ayrô-culmak bahha sin heeh, sin baaxol tittal sin gacseyyo.

Yasaqya 44:1

«Tonna'mmay Yaqkuubuk rade maraw, yi naqoosay! Israayil ummatey, anu innih doore maraw!»

Yasaqya 44:2

YALLAY sin yuklukeeh ina bagut sin giney sin catahiyya siinik iyyam le. Siinik iyyamaa: «Yaqkuubuk rade maraw, mameysitinaay, yi naqoosa kinniton. Kiciyyo maray anu doorehiyya kinniton.

Yasaqya 46:11

Ayrô-mawqa le kabuk qawita ceela numuh seecah an. Too num xer baaxok kaxxa dadah abak amaatele. Anu abam faxam kay gabat bicseyyo. Taham akkeleemit yaabeh ani'mmay fanat mayseeda.

Yasaqya 46:13

Anu akah exce innah, cakki edde geytimu waa ayro xayih. Yi wadu baahu waa ayro xayih. Yarusalaam edde wadu waa ayro xayih. Israayil ummatah yi qax-maqaane aceeyyo» iyyah yan.

Yasaqya 49:12

Yi ummatta xer rasuk amaatele. Garab kilbat le kabuk amaateleeh, garab ayrô-culma le kabuk amaatele. Garab kaadu gabbi-qaxak Sinim deqsita aracak amaatele» iyye.

Yasaqya 49:25

Takkay immay YALLI, «Toh tekkeemi» 'yaanam iyya. «Sin lih aaminnaan mara lih anu aameyyo. Qaskar gabat yan casbi mari asillimele. Racmatta sinni malik seewah orbisem gabak kaak kalelon. Sin xaylo umaanek anu cateyyo.

Yasaqya 54:4

Qunxuk ten saaku kot rade biyak kot maqagitaay, gubnah innah edde sugte dibuukitiyyak katettoomih sabbatah, ahaysa qaybik maradda'mmay mameysitin; qaybik koo maqidaana'mmay niya isik margaqin.

Ermiyaas 23:3

«Inni maray baatik saaboh raaqehiyya away fixixih elle abbixe baaxok gacseyyooh, elle yooboken baaxo fan ken gacseyyo. Ken gacsek lakal, isinni baaxol mango xaylo xaleloonuuh andarrelon.

Ermiyaas 23:4

Amo keenik meqe'nnah wagittu wayta abbobti keenih heeyyo. Yi mari ahaysa cunxoh marabaay, ‹Maca net akkeleh?› did m'iyyaanaay, fixixih magexan. Ahat yabtam yoo YALLA» 'yaanam iyye.

Ermiyaas 23:6

Kay dabaanal Yuudâ-mari waddiimeleeh, Israayil-mari amaanah xiinele. Too malikiy yamaatu waahiyya migaaqah, ‹YALLAY Cakki neh Yekke› deqsitele» iyye.

Ermiyaas 29:11

Siinih looweh an maqaaneh adda taaxigem yooy; siinih looweh abbixem, siinih meqe niqmata'kkal, sin biyakta umaane hinna. Takkay immay amaan akak geettoonuuh, isin geenno axcuk qambaalitak sugten maqaane akak geetton.

Ermiyaas 3:18

Too saaku Yuudah-ummatta Israayil-xaylot angaleleeh, sarrak marin baaxoy kilbat le kabul tanihiyyak aduureloonuuh; ken kaxxa abbobtih kulli waqdi ikoytah eceeh en rasu fan gacelon.

Ermiyaas 30:3

Macaay intek, Israayil kee Yuudâ-maray yi mara kinnihiyya ken baaxoh edde gacisu waa ayroora amaatele. Ken kaxxa abbobtih ikoytah ecee baaxo fanah ken gacseyyooh; ken baaxo keenih gacseyyo. Tahat yabtam yoo YALLA› 'yaanam kaak iyye.

Ermiyaas 30:7

Kaxxam uma ayro amaatele. Too ayroh innah tan ayro way matamaata. Yaqkuubuk rade mari too ayro abam waagisele'mmay, tohuh rabak cattiimelon» iyye.

Ermiyaas 33:16

Too saaku Yuudâ-mari waddiimeleeh, Yarusalaam magaalal yan mari amaanah xiinele. Yarusalaam magaala migaaqah too saaku, ‹YALLAY Cakki neh Yekke› 'yaanam deqsitele.

Yacedkel 16:52

Tonna-leemiik isih abte qaybih isih lakmisetto. Ku dambi kaxxa dambi kinnuk, ku maqanxix abem kee ku qaybi tittal wagga haan waqdi, ku dambih garil ken dambi foyya. Ku maqanxix ku garil tu'qellat sinni marak loowimem abaluk, abte umaanet wacarriyaay; isih abte qaybih lakmis» iyye.

Yacedkel 38:11

Cato sinni baaxoh maray carbi able weeh, amaanah xiinaah, gaso sinni magaaloolil yanihiyya qeebit tabbixeemil malsetto.

Daaniyel 12:1

«Too malaykattuy meqe-sarot sartanah yani yok iyyeemih, ‹Too saaku woo qande le malaykattuy Mikaayil deqsitaah ku ummatta dacrisahiyya amaatele. Kaxxa gibdaabini edde yan wakti sugele. Ummatta tunkullukeemik xabba haanamaay akke, sinaamat way akke wayte gadaama akkele. Too saaku ku ummattak migooqa Yallih kitaabal akak tunkuttube mari inkih cattiimele.

Hosiqa 2:18

«Too saaku alak alaakulleyti yi mara xage waa'gidih, qahdi heeyyo. Carbi edde abba haan silaacak seef kee gaysê-baxa baaxok ayyaaqeyyo. Yi ummat amaanah xintay 'yaanam axceyyo.

Hosiqa 2:20

Siinih cule xagna siinil mamaka. Akah exce'nnah, inni mara sin abeyyo. Too saaku YALLA kinniyom yoh aaxigetton» iyye.

Hosiqa 6:11

«Tonna'mmay sin tiyah tu gactek Yuudâ maraw, sin edde digaalu waa wakti eexegeh aniih, abba haytaanamah sin digaaleyyo» iyye.

Ayyuqel 2:21

Baqurê-baaxoy, YALLI nabam koh abem ubulaay, ahaysa mameysitinaay ruffu 'xic.

Miika 4:9

Yarusalaam maraw, kaxxa weeqah macah weqtan? Lacawat tan barrah innah macah iihissan? Malik aalle waytaanamah maay weqtan? Sin fayisak suge mari siinik rabeemih annah gactaanah?

Zakariyya 3:10

Too ayro kulli num siinik qinab coox kee salfa le caxâ-miru xala cooxih gubal gacca 'teenih, cuggaaneh siinik yan marah qibnaytiinoh isinni buxal xigla abettoonuuh; amaanah xiinetton. Tah intam yoo YALLAY Nabaamak Nabahiyya› 'yaanam iyyah yan» iyye.