Ermiyaas 3:12 - NABUWWA KEE MALIKWA

¹² «Tohuk kalah yok iyyemii, ‹Gexay Israayil-mari yaabbeeni'gidih, kilbat fanah deero ab. Intaamah: YALLI iyyaamah, Imaan maleelah tan Israayil xayloy! Amay yol uduura. Racmatta le Dagelta kinniyooh, sin assacakke way siinil aduureyyok, yol uduura. Tah intam yoo YALLA.

Ermiyaas 3:12 ပူးပေါင်းရင်းမြစ်များ

2 Malikwa 15:29

Fekac malikih suge dabaanal, Assuuriyah malikiy migaaqah Tiglat-Fileeser deqsitahiyya Qiyon kee Aabil-Beet-Maqka kee Yanowac kee Kedes kee Caxor deqsitta magaalooli kee, tonnah kaadu, Gilqad kee Galiil kee Naftaali marih baaxo Israayilik raaqiseh. Woo baaxol suge mara Assuuriya fan seewah bee.

2 Malikwa 17:23

Sarrak ellecabol, isi nabuwwak akah inxicca 'ye innal, isi garik ken xiiriyeh. Tonna-leemiik Assuuriyah-baaxo ken yiskiliqeeh tokke fan seewah ken been. Ta saaku fanah tokkel yanin.

2 Malikwa 18:1

Eela-baxi-Hosiqa Israayil-malik yekkeemih sidochaytô sanatal, Acad-baxi-Ciskiyyaahu Yuudâ-malik yekke.

2 Aydaad 29:10

«Anu taway YALLAY Israayil doore Dagelta kinnihiyya net bagcarrite waa'gidih, bica kaa'lih abam faxa.

2 Aydaad 30:9

YALLAL tuduureenik, sin mara seewah bee mari keenih xuwaaweleeh, isinni buxah yaduuroonay ken axcelon. YALLI maqaane kee racmatta le Yallaay; kaal tuduureenik, sin oggolele» 'yaanamih farmo keenit waden.

Yasaqya 31:6

Israayil maraw, YALLAL uduura. YALLAT darre cabteenih taniinik, YALLAL uduura.

Yasaqya 44:22

Abten dambi kee umaane qamburreh innah siinik eyseerreh. Sin waddem yook, tonna kinnuk yol uduura» iyye.

Ermiyaas 11:6

YALLI too waqdi yok iyyeemih, «Yuudâ-magaalooli kee Yarusalaam magaalah gititte fan gexay, tokkel yan marah yi farmo warisa. Titta lih hayne qahdil aba keenik excem aba keenik inxic» yok iyye.

Ermiyaas 12:15

Woo baaxok ken kalek lakal, keenih xuwaaweyyo. Kulli baaxoh mara keenik le rasuh gacseyyo.

Ermiyaas 3:1

YALLI siinik iyyamaa, «Num gennaaqoytay cabehiyyay marin mari elle digibehiyyal wadir elle digbam maay duuda? Toh bictam hinnaay, elle tekke baaxo kinni way nadaasa takke. Isin tonnah kaadu mango kacnoytit haysitteenik sarra, away yol taduureenim faxxan!

Ermiyaas 3:14

Qagissa heeh iyyamaa, «Imaan maleelay! Yi mara kinnitoonuk, yol uduura. Sin Dagelti yoo. Kulli magaalak num-num siinik beeyyooh, kulli gulubuk kaadu namma-namma num siinik doorru heeh, sarrak Siyon qale fan sin beeyyo.

Ermiyaas 3:18

Too saaku Yuudah-ummatta Israayil-xaylot angaleleeh, sarrak marin baaxoy kilbat le kabul tanihiyyak aduureloonuuh; ken kaxxa abbobtih kulli waqdi ikoytah eceeh en rasu fan gacelon.

Ermiyaas 3:22

YALLI, «Imaan maleelah yan maraw, anu sin urseyyooh, imaan siinit heeyyok, yol uduura» siinik iyya. Ermiyaas iyyemii, «Ummat axcih oobbem liyo. ‹YALLAW, ni Dagelta koo. Nanu koo fan naduureh.

Ermiyaas 3:5

‹Yalli kulli saaku net mabagcarrita. Ahaysa nee mayanqiba› intan. Afak toh intaana'mmay, tohuh, aaminnaan taamah abittok maraaqinniton» 'yaanam siinik iyya.

Ermiyaas 3:7

Too uma-taamak lakal, yol aduureloonum akkaluk suge'mmay, yol maaduurinnon. Yuudâ-mari, anu Israayil mara xiiriyeeh; innik ken eyxeerem yubleenih. Ken akah eyxeerem, ken uma-taama kinnim yubleenih. Takkay immay keenik maysinnoonuuy, keenik kaxxih, uma-taama-leela yekken.

Ermiyaas 30:11

Anu sin lih aniih, siinit takkeemik sin wadeyyo. Ama fixixih sin elle abbixe baaxooxah mara inkih bayseyyo'mmay, sin inkitanuuk mabaysa. Adabi akak geytan digaalah sin digaaleyyo. Celta digaala siinit abeyyooh; annaak gexxoonay sin maxca. Tahat yabtam yoo YALLA» iyye.

Ermiyaas 31:20

«Israayil ummatey, kulli marak kacanuh akah lafta xayloh yok tanin. Sin gide kacanuh numuh massalliyyo. Isin abtan umaanet yaabah immay, tohuh, sin kasa waqdi siinih xuwaawah. Afqado sin fanah liyooh siinih racmateyyo. Tah intam yoo YALLA.

Ermiyaas 31:21

Akak gexxen gital asta haay caba. Woo gita cubbusay raaqa. Taduuren saaku, too astal, akak temeeten gita kassa heetton. Israayil maray kiciyyohiyyaw, isinni magaalooliy cabteenihiyyah uduura.

Ermiyaas 31:8

Kilbat le kabuk ken baaheyyo; baaxô-maggaraqak ken gaaboyseyyo. Inti-maleela kee iba-maleelaay, xalay edde xayyoowe agabu kee xalaayal lacawat yan agbih agantah amaatelon. Manguk andabbelon.

Ermiyaas 33:26

Hununuh toh elle abba hee innal, Yaqkuubuk rade mara kee, inni naqasu Dawud lih hee qahdi, way bayi mahaa. Dawuduk rade marak num dooreyyooh; too num, Abraahim kee Iscaak kee Yaqkuubuk rade marih amol dardaariseyyo. Inni marah uxih racmateyyooh, ahak sarra gaddaleela ken abeyyo› 'yaanam iyye.

Ermiyaas 4:1

YALLI siinik iyyaamah, «Israayil maraw, yol taduureenim faxxeenik, yol uduura. Anu faxe waa duyyey isinni gabak bicisseenihiyya taqbudeenim cabaay; yi qibaadal digga axcuk,

Yacedkel 11:17

«Anu keenik inxic axcem keenih waris. ‹Fixixih sin elle abbixe baaxooxak sin gacseyyo. Israayil baaxo ahaksa siinih aceeyyo.

Yacedkel 33:11

‹Waara YALLAY Mulki lehiyya kinniyooh, inni migaaqal xiibita'mmay, uma taama le num isi uma taamah rabam kaak mafaxa. Woo uma taama cabba heeh mano kaak faxa. Israayil-xayloy, uma taama cabaay, manok raba madooritina› keenik inxic» iyye.

Yacedkel 39:25

YALLAY Mulki lehiyya iyyeemih, «Anu a saaku, Yaqkuubuk rade marah racmateyyo. Ahak sarra akah sugen gaddaleela ken abeyyo. Inni migaaqay taahirik yani dacriseyyo.

Hosiqa 6:1

Ummat intaamah, «Ahaysa YALLAL nadaaru wayna. YALLI nee biyaakeh immay nee qaffoysele. Nee mudeh immay dale neh urusele.

Zakariyya 1:4

Isinni kaxxa abbobti makkina. Sin kaxxa abbobtih dumî-dabaanal yi nabuwwa yi farmo warisak sugteeh; ‹Edde gexxan uma gitak raaqaay, dambit maasina. Toh intam YALLAY Nabaamak Nabahiyya›, 'yaanam keenik axcuk sugen. Takkay immay oson yi nabuwwah yab ankacisak masuginnoonuuy; anu aba axcem oggolak masuginnon.