Ermiyaas 24:10 - NABUWWA KEE MALIKWA

¹⁰ Duma ken kaxxa abbobtih ecee baaxoy away oson elle yaniinihiyyal saabo cabba haanam fanah, way carbiiy, way qululuuy, way kaadu dalka keenit ruubak, sella ken heeyyo› 'yaanam yok iyye» iyye.

Ermiyaas 24:10 ပူးပေါင်းရင်းမြစ်များ

1 Malikwa 14:15

YALLI Israayil digaalele. Israayil mari dori-qaxal tooboke bayrey caacay kabuk kabul yasgayyeh innah gacelon. Duma ken kaxxa abbobtih ikoytah yecee baaxoy away elle yaniinihiyyak ken ayyaaqele. Fuurat weeqaytuk woo kabul ken fixixisele. Toh keenik akah abu waam macaay intek, YALLAT naqabu culseeniih, Aseera deqsittaamay yaqbudeenihiyyah astah heenih sugen gurumuuda soolisen.

Yasaqya 51:19

Kaxxa bala siinil obte. Baaxo siinik carbit baate; ummatta siinik qulul kee carbit tembexe. Takkay immay siinil yamaateeh taqdiyya siinih gacsa mari mayan.

Ermiyaas 14:12

Soom kee dooqa abaanamah yol weeqaanamah, aban weeqa keenik moggola. Sadgatah cado akak carrisan saq qidaanamah, hinnay kaadu, dooqak keenih orobta'gidih daro yeceenimih, yi garil oggol keenik mali. Ken wadam hinnaay, carbi kee qulul kee dalkat ken seleyyo» 'yaanam yok iyye.

Ermiyaas 15:2

‹Anke genxoo?› kok iyyeenik, keenik intaamah, YALLI iyyem ah teeti: Sahdak garab dalkat siinik ambaxeloonuuh, tonna leemiik tokke gexelon. Sahdak garab carbit ambaxeleeh, tonna leemiik too mari tokke gexele. Sahdak garab qululuh ambaxeleeh, too mari kaadu tokke gexele. Garab kaadu marin baaxo seewah beelon.

Ermiyaas 16:4

Kaxxa dalka keenit ruubeyyooh; too dalkat ambaxelon. Keenih rookitaah ken yaagaqu waa mara mageyan. Raysa keenik guddaafah innah qangalaylak cabelon; yakkuqe num mageytima. Carbit rabe kee qululuh ambaxi akkelon. Lafa keenik haada kee garboh alluwwah maaqo akkele.

Ermiyaas 19:7

« ‹Ta aracal Yuuda kee Yarusalaam mari abba haa mala keenik foyya abeyyo. Ken naqboytit qeebih keenik aysiiseyyo. Carbit ken qidsiiseyyo. Raysa keenik guma kee garboh alluwwah maaqo abeyyo.

Ermiyaas 21:9

Ama magaalah addal raaqu waa mari carbi kee qulul kee dalkah rabele. Takkay immay magaalah addak eweqqa 'yeh magaala marot yabbixe maral gaba yecee num rabak cattiimeleeh, isi rooci wadele.

Ermiyaas 27:8

Takkay immay usuk ta abbootan gabat lem fanah, doolat takkuu, faxe mara takku, usuk fillal siinik haa *madmad (kambar) oggole waah kay amri cinu waa mari yenek, too mara usuk seefit ken selam fan carbi kee qulul kee dalkat ken digaaleyyo.

Ermiyaas 29:17

Too marih tiyak yoo YALLAY Nabaamak Nabahiyya axcemii, Anu qeebi kee qulul kee dalka keenit ruubeyyo. Toome *sublâ-xayloy ankamme wayta ken abeyyo.

Ermiyaas 29:18

Carbi kee qulul kee dalkat qayyaawissa ken heeyyo. Kulli doolatay keenit tekkem tabalu waytahiyya inkih, taham waagissa heele. Fixixih ken elle abbixe baaxoy innih ken ruubehiyyal, taham akkih yable mari kaxxa wariggah wariggitele. Bursutan maray ilaq le ken abeyyo. Woo-marat tekkem siinit takkay axcuk, sinam abaaroh haysitan mara ken abeyyo.

Ermiyaas 32:24

« ‹Baabelon-mari Yarusalaam-magaala yabbixe'gidih, tet gasoosat xakabuh coox kee xeet tittin bagul heen. Addal teetik yan mari carbi kee qulul kee dalkâ-gadda yekkeeniih, tohuk gexxaamah ellecabol Baabelon malikil gaba ecee'kal maraaqan. Tah atu inteemiiy; away akah table'nnah, atu inxicca elle inte'nnal tekkeh.

Ermiyaas 32:25

Tonna'mmay YALLAW, Mulki le Dageltaw, Yarusalaam tanna le mabbuuxut tanim abalih, «Sahda sumaaqah hayya haay baqurê-baaxo ku qammih baxak xaamit» yok inteeh; toh abeh› 'yaanam exce» iyye.

Ermiyaas 34:17

« ‹Tonna'mmay isin toh abteenik, hay, ta saaku, yooy YALLAH yani siinik axcemii: «Isinni mara ruubaay curri ken aba» siinik exce'mmay, yi yab cinteenih. Tahaysa isinnih dooritten curriyyat siinil ruubeyyo. Toh ma curriyyata inteenik, carbi kee dalka kee qulul rabtaana'gidih, siinil ruubu waa curriyyata. Baadal enna 'ya mari anu siinil baahem yaabbu waa waqdi, kaxxam wariggitele.

Ermiyaas 42:17

Yi yab cinna heeh, Masrik manaadiya iyyu waa maral, carbi kee qulul kee bala keenil ruubeyyooh edde selliimelon; num keenik maraaqa› siinik iyya.

Ermiyaas 42:22

A yab cinteenik, siinit takku waytam siinih warisu waa. Taway gexxaanam faxxan baaxol, qulul kee carbi kee dalkah ambaxettoonum siinih warsa» keenik iyye.

Ermiyaas 5:12

Yallih-mari YALLA cineeh, iyyeenimih, «YALLI abaamah lem mali. Nanu kaadu ahaysa gibdaabinah linom mannu. Ahaysa carbi kee qululuh nabalu waynam mannu.

Ermiyaas 9:15

Tonna leemiik yoo YALLAY Nabaamak Nabah, Israayil doore Dagelta kinnihiyya ta marak abu waam koh warisu waa. Qeero le maaqo ken askameyyo. Summik tan lee ken afqeyyo.

Ermiyaas 9:16

Duma ken kee ken kaxxa abbobti able wayteeh aabbe wayte baaxoy oson kaadu ahaydumah aabbe weeniih able weenihiyya fanah ken ruubeyyo. Tokkel aaxige waan marih addal ken fixiixiseyyo. Saabo cabba haanam fanah, ken seltu wayta qaskar keenit ruubeyyo» iyye.

Yacedkel 33:27

«Wohuk kalah keenik intaamah, ‹Yoo waara YALLAY Mulki lehiyya inni migaaqal xiibita'mmay, ama abuuruh tan magaaloolih addal yan mari ambaxele. Magaalak irol yan mara alluwwâ-gadda abeyyo. Qaleela kee gablah addat yombooqoreh yan mara biyak gadda abeyyo.

Yacedkel 6:11

YALLAY Mulki lehiyya yok iyyeemih, «Israayil marah gamoomitaay keenih qaad. Israayil mari abe umaaneh kaxxa boogeh boogis. Carbi kee qulul kee dalkah ambaxelon.

Yacedkel 7:15

«Giti addal tanim carbiiy; buxah addal tanim dalka kee qululu. Baaxok yawaqu waa num carbit rabele. Buxah addal sugu waa num, dalka kee qulul gadda akkele.