Ermiyaas 23:6 - NABUWWA KEE MALIKWA

⁶ Kay dabaanal Yuudâ-mari waddiimeleeh, Israayil-mari amaanah xiinele. Too malikiy yamaatu waahiyya migaaqah, ‹YALLAY Cakki neh Yekke› deqsitele» iyye.

Ermiyaas 23:6 ပူးပေါင်းရင်းမြစ်များ

1 Malikwa 4:25

Usuk suggu 'yem fan, Israayil kee Yuudah yooboke mari amaanah xiinak suge. Kay dabaanal Israayil kee Yuudâ rasul suggu 'ye mari amaanah yeneeh; numtin amol qinab-xalta-caxa kee *sublayto luk yenen.

Yasaqya 2:4

Mango doolatwah fanat bica abeleeh; baaxooxal yan tittin-way bicsele. Qeebi edde abak sugen seefwa buqre edde aban biriitah korselon. Qeebi edde abak sugen macaxu caxak luud edde yargiqen gileelah gacselon. Tahak wadir doolatwa gaaduh tittah magexxa; ahaysa qeebi tittat aboonuh masilaacsitan.

Yasaqya 32:1

Ayrok teena cakkik tanim aba malik reedele. Too dabaanal abbobtih gacu waa mari qadli le mara akkelon.

Yasaqya 32:18

YALLIH mari isi buxal cisaabak amaanah xiineleeh; gadaamak affoofele.

Yasaqya 33:22

YALLI ni cokmaabe; madqa isih neh yayyaaqe. Ni malik kaa; nee waddu waytam kaa.

Yasaqya 33:5

YALLI fayya le aracal yan Dageltaay; nabna lem kaa. Siyon-qalel qadaalat kee cakkik-tan-maqaane heele.

Yasaqya 35:9

Lubak kee sahda takme garboh alluwwa woo gitat magexxa. Takkay immay Yalli dambi akah cabe maray wadehiyya too gitat gexele.

Yasaqya 42:6

Yoo YALLA koh sectam; kooy yi naqasuh yanihiyyah qadaalatat seecah an. Ko'lih aneyyooh; koo dacriseyyooh; ummat lih qahdi koo le kabuk heeyyo. Baadal tan ummattah ifu koo abeyyo.

Yasaqya 45:17

Israayil ummat YALLI wadeh yan! Israayil ummat tahaysa wadu mawaytaay, qaybi wadiriik ken mayabbixa.

Yasaqya 54:17

Tonna'mmay faxe silac kol baahu waam mali. Koo akah istikiyya hannaanimil, gacissu waytam geetto. Inni naqoosah acayu waam, tamah teeti. Anu keenih acee cakkik tanim, tamah teeti» 'yaanam iyya. Tamah YALLI iyyaama.

Yasaqya 7:14

Tonna'mmay YALLI asta isih sin aybulleele. Baxuwwah tan barra aadiqeleeh, lab-baxa xaleleeh, too awki migaaqah Ammaanuwel deqsitele.

Yasaqya 9:6

Macaay inteenik, awki neh yooboke. Baxi neh yontocowwe. Usuk abbootan gabat le. Migaaqah «Qajiibik yan Fayisi», «Nabaamak Naba Dagelta», «Waara Abba», «Amaan Yamliki» 'yaanam kaah axcelon.

Ermiyaas 29:11

Siinih looweh an maqaaneh adda taaxigem yooy; siinih looweh abbixem, siinih meqe niqmata'kkal, sin biyakta umaane hinna. Takkay immay amaan akak geettoonuuh, isin geenno axcuk qambaalitak sugten maqaane akak geetton.

Ermiyaas 30:10

«Tonna kinnuk, Yaqkuub xayloy yi naqoosay, mameysitinay; Israayil ummatey, niya siinik addigille waytay. Tahat yabtam yoo YALLA. Ama xer baaxoy elle taniinik sin ayyaaqeyyo. Casbi gurrah elle tanin baaxok siinik radu waa mara ayyaaqeyyo. Isinni baaxo fan aduurettoonuuh amaanah xiinetton. Num sin maxagaay sin mameysiisa.

Ermiyaas 31:23

Kaadu YALLAY Nabaamak Nabah, Israayil doore Dagelta kinnihiyya yok iyyeemih: «A mara seewah elle abbaxuk sugen baaxok gacisu waa saaku, Yuudâ-rasu kee Yuudâ-magaaloolil yan mari ah ablele. Too waqdi, ‹Siyon-qaley taahirik tanit YALLI barkat haay. Cakkik-tan-maqaane le Dagelta elle yan aracat YALLI barkat haay› 'yaanam dooqah axcelon.

Ermiyaas 32:37

Duma abeh an bagcarrah ken fixixiseyyooh, baaxo ken cabsiiseyyo'mmay, wadir gaabossa ken heeh, a baaxo ken gacseyyo. Akke gacissa ken heeh, tohuk wadir amaanah ken xiiniseyyo.

Ermiyaas 33:15

Too waktil, Dawuduk rade marak cakki gita gexa numuy Dawud-Luddal muggaaqisaanahiyya ruubeyyo. Too num cakkih tanim abaah, qadaalatat taamita malikih heeyyo.

Ermiyaas 33:16

Too saaku Yuudâ-mari waddiimeleeh, Yarusalaam magaalal yan mari amaanah xiinele. Yarusalaam magaala migaaqah too saaku, ‹YALLAY Cakki neh Yekke› 'yaanam deqsitele.

Yacedkel 21:27

Baati temeeteh! Finqi yemeeteh! Ahaysa akah tani'nna bayseyyo. Takkay immay too baati, dardaarinnah doore num yamaatem fanah sugele. Usuk yamaatu waa saaku, too dardaarinna kay gabal heeyyo› 'yaanam iyya.

Yacedkel 28:26

Too baaxol amaanah xiinelon. Tokkel buxaaxi xissiteloonuuh, qinab coox abqurelon. Cuggaaneh keenik yan maray ken bursutak suge digaaleyyooh; Israayil amaanah xiinele. Too waqdi anu YALLAY ken Dagelta kinniyom aaxigelon.

Yacedkel 38:14

Tohuk gexxaamah Yalli Goog warisu waa farmo yol ruube. Yok iyyeemih, «Yi Israayilih ummat amaanah elle xinta ikkel,

Yacedkel 48:35

Inkih tan magaalah gaso affara tattabak xexxaarah sagla alfih mitri akkele. Ta magaalah migaq tahak wadir ‹YALLI-akkel-yani› deqsitele» 'yaanam iyye Yalli.

Daaniyel 9:24

Ku magaalay taahirik tani kee ku ummattah, waktik malcina-tabanih waqdi malciin-gide keenih yeexege. Too waktih addat Yalli aben umaane kaleleh, dambi cabeleh, amri-cinak qafu abele. Tonnah kaadu, way kate sinni qadli gaceleeh; yublen suwaawur kee akkele akak inxicca 'yeenim inkih nummak maaciseleeh; taahirik tanim askutelon.

Daaniyel 9:7

Goytaw, atu kulli way cakkik tanim abta. Neh tu gactek, nanu kulli way qaybih aninnaanim ninnil bahna. Neey Yuudah yooboke mara kee Yarusalaam mara kee, tonnah kaadu, inkih yan Israayil maray xayi'kke kee xer ikkel yanihiyyay ko'luk yen imaan cabeemih sabbatah atu baaxot fixixih rubtehiyyak inkih, qaybit radnam numma.

Hosiqa 1:11

Yuudâ mara kee Israayil-mari wadir kaadu angaleleeh inki mara akkelon. Inki amoyta haysitelon. Isinni baaxol gaddaleela akkelon. Yidraqel-ayro, kaxxa ayro akkele.

Hosiqa 1:7

Yuudâ marah tu gactek, keenih xuwaaweyyo. Yoo YALLAY ken Dagelta kinni ken cateyyo. Ken elle catu waam, carbi abitto hinnaay, seef kee gaysê-baxa hinnaay, faaris kee faaris amot yan mara hinnay, inni qandet ken cateyyo» iyye.

Hosiqa 2:18

«Too saaku alak alaakulleyti yi mara xage waa'gidih, qahdi heeyyo. Carbi edde abba haan silaacak seef kee gaysê-baxa baaxok ayyaaqeyyo. Yi ummat amaanah xintay 'yaanam axceyyo.

Qobadya 1:17

«Takkay immay Yarusalaamal tan Siyon qaleh amol sugu waa mara cattiimele. Too arac taahirik yan arac akkele. Yaqkuubuk rade mari isi baaxoy ikoytah luk sugehiyya geele.

Qobadya 1:21

Yarusalaam mari, Qiisoh yooboke marak qeebil ayseleeh, baaxo keenik xabba heenih keenil ackumelon. YALLI too saaku isih, malik keenik akkele» iyye.

Xafanya 3:13

Israayil ummatak saaboh raaqe mari tahaysa sahdal umam mabaaha. Diraabat mayaabaanaay, sahda maduquurusan. Yakmeeniih yaaqubeenim ken mawaysiisa. Ken xagtam matanaay, numuk mameysitan» 'yaanam iyya.

Zakariyya 10:6

«Yuudâ mara maqar bahsiiseyyo. Israayil ummat umaanek cateyyo. Keenih xuwaawaah; tohih sabbatah ken baaxo ken gacseyyo. Duma keenil baahem edde hawwenna haan maqaane keenih abeyyo. YALLAY ken Dageltah yanihiyya kinniyooh; yoo fanah aban dooqa keenih oggoleyyo.

Zakariyya 3:10

Too ayro kulli num siinik qinab coox kee salfa le caxâ-miru xala cooxih gubal gacca 'teenih, cuggaaneh siinik yan marah qibnaytiinoh isinni buxal xigla abettoonuuh; amaanah xiinetton. Tah intam yoo YALLAY Nabaamak Nabahiyya› 'yaanam iyyah yan» iyye.