Ermiyaas 19:5 - NABUWWA KEE MALIKWA

⁵ Baqal akak iyyaanamay taqbudeenihiyyah isinni lab-xaylo sadgatah elle qiddan arooca bicissen. Too aroocak bagul isinni xaylo sadgata axcuk nuwwih girat carrissan. Annah taniimit asettoonum way makkalinniyooy, way kaadu aba siinik excem hinna. Inkinnah afak edde yaabem hinna.

Ermiyaas 19:5 ပူးပေါင်းရင်းမြစ်များ

2 Malikwa 17:17

Too duyyey yaqbudeenihiyyah isinni xaylok labim kee sayim girat sadgatah qidaanam baahen. Kalluwalle kee ramli qida maral fayu esseren. YALLIH garil dambik loowintaamat aseeniih, YALLAT naqabu ugsen.

2 Malikwa 21:6

Girat isi baxa sadgatah qide. Ramli-qidiyya kee sicri taamah haysiteeh; ginnili kee kalluwallel takku-waytam essere. YALLAL kaxxa dambi lem baaheeh; YALLIH naqbi kay sabbatah lafitak lafte.

2 Aydaad 28:3

Hinnom deqsitta golol gabat bicsen duyyeh qaydarus qeerisak suge. Kaadu girat isi xaylo sadgatah qide. Woh akah abem, Israayil-mari yamaateemik naharal woo baaxol suge maray YALLI yeyyeeqehiyyak raaqisen umâ-yabulih tan qaadah gabbaaqiyyak ten.

Ermiyaas 32:35

Baqal akak iyyan gabak bicsen duyyey yaqbudeenihiyyah, Hinnom-Golo deqsita aracal, sadgat elle aban arac xiseeniih; tokkel migaaqah Molok yalla akah iyyan duyyey yaqbudeenihiyyah sadgatah isinni xaylo yusguuden. Annah tanim anu keenik aba excem hinna. Annah tanim yi kasal way temeetem hinna. Yuudâ-mari annah taniimiy umâ-yabulih tanihiyyay dambi keenil takkehiyyat aseloonum makkalinniyo» 'yaanam iyye.

Yacedkel 16:36

«YALLAY Mulki lehiyya kok iyyaamah: Sara isik kalla hayteh, isi mareytit kee woo Yalli niqba xeet kee cooxuk bicsen duyyey taqbudehiyyah isi xagar teceeh; too xeet kee cooxuk bicsen duyyeh sadgatah isi xaylo qidde.

Yacedkel 20:26

Isinni xaylok naharsi-xaylo, umâ-yabulih xeet kee cooxuk bicsen duyyeh qibaadah arac sadgatah baahah ken abalih, yanoonay ken axcuk suge. Toh keenik akah abak sugem, abeenimik xagar keenik wacarriya'gidiiy ken Dagelta dibuk yoo kinnim yaaxigeeni'gidi.

Yacedkel 38:10

YALLAY Mulki lehiyya Goog giddinaamak iyyaamah, «Too ayro gufta saaku, uma malah malsetto.

Daaniyel 2:29

Malikow, qarkaytol deerih tan waqdi, sarra takku waytam cisaabisak teneeh; Yallay sirrih tanim yaaxige, sarra takku waytam koo yuybulle.