Ermiyaas 11:13 - NABUWWA KEE MALIKWA

¹³ Yuudâ-mari yalla 'yeenih yaqbuden duyyek mangah ken magaalooli tikki 'tah gide lon. Yarusalaam mari kaadu umâ-yabulih taniimiy Baqal akak iyyaanahiyyah sadgat elle abaana'gidih bicsen arooca, mangah ken magaalah gititte takkeh gide takke.

Ermiyaas 11:13 ပူးပေါင်းရင်းမြစ်များ

2 Malikwa 23:13

Tonnah kaadu, Malik-Suleeman duma Yarusalaam magaalak ayrô-mawqal, Umaane-le-qale deqsitta qalek gabbi-qaxat raqta'kkel, ableh-uma duyyeeyah-qibaadah, axcihiiy, Sayda-marak-say-yallay Qastarot deqsitta kee, Mooyab-marih-yallay Kamos deqsita kee, Qammon-marih-yallay Milkom akak iyyaanah qibaadah heeh suge mansafitte foyya abe.

2 Aydaad 28:25

Sadgat elle abaana'gidih, Yuudal enna 'ta magaaloolil duyye elle yaqbuden aroocay fayya lehiyya xise. YALLAY kaak duma usuk akak rade kay kaxxa abbobti doorehiyyah naqabu isil oobise.

Yasaqya 2:8

Ken baaxol xeet kee cooxuk bicsen duyyeeyay yaqbudeeni kibuk tan. Too duyyey isinni gabak bicseenihiyya yaqbudeenih, gabat oren duyyeh gomboh radan.

Ermiyaas 11:17

«Yoo YALLAY Nabaamak Nabahiyya duma Israayil kee Yuudâ-mara caxah innah uysubukeh suge'mmay, ta saaku bala keenil oobiseyyo. Toh keenik akah abu waam, umaamay dambi lehiyya baahaanaah, Baqal akak iyyaanamay yaqbudeenihiyyah sadgat abaanaah, naqabu yot culsan» 'yaanam iyye.

Ermiyaas 17:1

YALLI iyyemii, «Yuudah-ummatey, isin edde tanin umaane birti-kalamat tunkuttubeh tan. Afqadok bagul siinik tunkuttubeh tan. Edde tankuttubem, birti-kalamay af akak gibdi-xaak yanihiyya kinniih; elle siinik tunkuttubem, afqado kee sadgat-bagul-akak-abtan-arooca.

Ermiyaas 18:15

Yi mari yoo cabba heeh tu xiqe sinni gabak bicsen duyyey yallah loonuh qaydarus ruuban. Meqe gitay kataate raareenihiyyak, too duyyeh qibaaday edde yaniini ken raaqisseeh, makot ken beyte. Ken kaxxa abbobti kataatak sugte gita cabba heenih, makot yan gitat gexaanam dooriten.

Ermiyaas 19:4

Macaay inteenik, yoo maaqilteeniih, yot darre cabteeniih, yalla axcuk taqbuden duyyey xeet kee cooxuk bicseenihiyyat baaxo wasak abten. Taham duma sin kaxxa abbobti aaxaguk sugtem hinnaay; isin, Yuudâ-malikwak, kaadu aaxaguk sugteenim hinna. Tohuk kalah kaadu, a baaxo tu baahe wee marih qabalat bayissen.

Ermiyaas 19:5

Baqal akak iyyaanamay taqbudeenihiyyah isinni lab-xaylo sadgatah elle qiddan arooca bicissen. Too aroocak bagul isinni xaylo sadgata axcuk nuwwih girat carrissan. Annah taniimit asettoonum way makkalinniyooy, way kaadu aba siinik excem hinna. Inkinnah afak edde yaabem hinna.

Ermiyaas 2:28

Anu siinik axceemih: Yalla akak intan duyyey isinni gabak bicisseenihiyya ankel tan? Ta duyyey yalla akak intaanahiyya mangah sin magaaloolik madagok, gadaamittaanaah caalat siinil uma waqdi, sin akah cate waytam macaay? Sin edde wadan dudda maay lon?

Ermiyaas 3:24

Duyyey naqbudehiyya qaybik sah neh xiqtam mali. Too qibaaday abnehiyyah sabbatah, ni kaxxa abbobti nagrah neh cabte midir nek yembexeh. Ninni xaylo wayneh. Ni kaxxa abbobti dumî-dabaanaak akah taqabba 'tem inkih wayneh.

Ermiyaas 3:25

Nee kee ni kaxxa abbobti, YALLAY ni Dageltah yanihiyyah amri dumaak cinak sugne. Qunxaanek xabba haanamaay a saakuh amma 'yaanam, YALLAY ni Dageltah yanihiyyal dambi lem bahne. Abne qaybi nee yabbaxay; edde asne qaybi, sartan gurrah, xagar nek buulay› 'yaanam axcih oobbe» iyye.

Ermiyaas 32:35

Baqal akak iyyan gabak bicsen duyyey yaqbudeenihiyyah, Hinnom-Golo deqsita aracal, sadgat elle aban arac xiseeniih; tokkel migaaqah Molok yalla akah iyyan duyyey yaqbudeenihiyyah sadgatah isinni xaylo yusguuden. Annah tanim anu keenik aba excem hinna. Annah tanim yi kasal way temeetem hinna. Yuudâ-mari annah taniimiy umâ-yabulih tanihiyyay dambi keenil takkehiyyat aseloonum makkalinniyo» 'yaanam iyye.

Ermiyaas 44:21

«Sin kee sin kaxxa abbobtiiy, sin malikwa kee siinik saqoltih yan mara kee, wohuk kalah tan ummata, Yuudâ-magaalooli kee Yarusalaam-gititteh addal abak sugen sadgat YALLI mahawweeninna'mmay, hawweenem makkalina. YALLI isin woh abak sugteenim aaxige waak yenem makkalina.

Ermiyaas 44:5

Takkay immay too farmoh ayti acayuk masuginnoonuy, baaqid yok edde mahannon. Isinni uma taamak akah maadayinnoonuuy; coox kee xeetik bicsen duyyeh sadgat abaanamak maadayinnon.

Ermiyaas 48:35

Mooyab mari yallah le duyye elle yaqbuden aracal aban sadgat kee, too duyyeh qibaadah ruuban qaydarus ahak wadir ayseedeyyo. Tahat yabtam yoo YALLA» 'yaanam iyye.

Ermiyaas 7:9

Garqa abtaanaah, sahda qiddaanaah, dalwa abtaanaah; diraabay taceenihiyya numma sinaamat celsissaana'gidih, xiibittaanah. Baqal akak intan gabak bicissen ceeloh dooqa axcuk qaydarus rubtan. Duma aaxige waak sugten duyyeeya Yalla axcuk taqbuden.

Yacedkel 16:24

kulli gitih xaqul too duyye elle taqbude arooca hayya hayteeh;

Hosiqa 10:1

«Israayil mari qinab caxay mango xaylo xaltah innal yeneeni'mmay, gaddaliino osak keenih elle ossaamal, yalla akke sinni duyyeh qibaada elle aban arooca xisen. Baaxo keenih allaggoowak allaggowteeh mango daro kee caxâ-miri aabakuk keenih elle yoobokeemil, xeetik bicsen qamidway yaqbudeenihiyyat aban bilqa lafitak laften.

Hosiqa 12:11

Gilqad deqsita aracal kaxxa umaanet asa mari ambaxele. Gilgal rasul awurwa sadgatah qidaanah immay sadgat elle aban arac gubbik bagul gaaboysen qalum akkele» iyye.

Hosiqa 9:10

Yalli iyyeemih, «Israayil ummat naharak gee saaku, bacaril tooboke qinab caxah bis luk yenen. Sin kaxxa abbobtiy isin akak raddeenihiyya, coox elle yaabuke waktil naharat xalte *sublaytoh bis luk yenen. Takkay immay Faqor deqsitta qale yemeeten saaku, Baqal akak iyyan duyye Yallah haysiten. Ableh uma qibaadat gacca 'yeenih, uma ceelot aseenimih sabbatah, uma mara yekken.