Daaniyel 12:1 - NABUWWA KEE MALIKWA

¹ «Too malaykattuy meqe-sarot sartanah yani yok iyyeemih, ‹Too saaku woo qande le malaykattuy Mikaayil deqsitaah ku ummatta dacrisahiyya amaatele. Kaxxa gibdaabini edde yan wakti sugele. Ummatta tunkullukeemik xabba haanamaay akke, sinaamat way akke wayte gadaama akkele. Too saaku ku ummattak migooqa Yallih kitaabal akak tunkuttube mari inkih cattiimele.

Daaniyel 12:1 ပူးပေါင်းရင်းမြစ်များ

Yasaqya 4:3

Too wakti baatik saaboh raaqe maray Yarusalaamal yani, taahirik yan mara akkele. Too maray Yalli Yarusalaamal raaqaana'gidih doore, migooqa akak tunkuttube mara.

Yasaqya 9:7

Kay abbootan osak oseleeh, ambaxe sinni amaan gacele. Dawud korsil gaceleeh, kay baaxol ellecaboh ayro fanah dardaarah anuk, qadli kee cakkih yan gitat xiinisele. Taham YALLAY Nabaamak Nabahiyya isi mara yaysiiseemih fayxi kee, keenih le kaxxa kacanuk akkele.

Ermiyaas 30:10

«Tonna kinnuk, Yaqkuub xayloy yi naqoosay, mameysitinay; Israayil ummatey, niya siinik addigille waytay. Tahat yabtam yoo YALLA. Ama xer baaxoy elle taniinik sin ayyaaqeyyo. Casbi gurrah elle tanin baaxok siinik radu waa mara ayyaaqeyyo. Isinni baaxo fan aduurettoonuuh amaanah xiinetton. Num sin maxagaay sin mameysiisa.

Ermiyaas 30:7

Kaxxam uma ayro amaatele. Too ayroh innah tan ayro way matamaata. Yaqkuubuk rade mari too ayro abam waagisele'mmay, tohuh rabak cattiimelon» iyye.

Yacedkel 13:9

Able ween wacyi ‹Nubleh› iyya maray sahda makot beyahiyyaw, sin digaalu waah an. Isinni baaxo fanah mataduuran. Yi mari mabloh maro hayu waa saaku, wokkel mageytimtan. Israayilih yooboke marih loowot magactan. Anu YALLA kinniyom too saaku yok aaxigetton» iyye.

Yacedkel 34:24

Yoo YALLAY Mulki lehiyya, innih, ken dacrisa Dagelta akkeyyooh; Malik Dawud innah yan malik ken xiinisa'gidih abba keenik abeyyo. Taham exceh, edde maqagita.

Yacedkel 5:9

Anu niqibyo dambiy abba haytehiyyak gexxaamah, ahaydumah kot abe weeh, sarrak kot abak raaqe wayu waah an digaalah koo digaaleyyo.

Daaniyel 10:13

Fursih doolatat dacayrih yan malaykatti labaatanna kee inki ayroh gide amaate yoo kalak suge. Woo Fursih-doolatak gexe yoo kalak yeneenimih sabbatah, Mikaayiliy malaykah abbobtik numuk teena kinni, yoo cata'gidih yemeete.

Daaniyel 11:45

Usuk isi kaxxa sirooqa bad kee taahirik tan qaley qaxmeqehiyyak fanal heele. Ellecabol rabele'mmay, rabak num kaa macata› yok iyye.

Daaniyel 7:10

Muxxa giray weeqi innah caxittahiyya kay foocal caxitak ten. Tokkel alfitte yakke mari kaah taamitak yen. Mangah loowo akak amixxige wayta mari kay foocal soolak kaah taamitak yen. Too waqdi cokmi buxal daffeyna tekkeeh kitooba fakeenih.

Daaniyel 9:12

Nee kee ni abbobtik abeyyo intem abteh. Yarusalaam magaala a addunyah bagul enna 'ta magaaloolik inkih digaalah lafteh.

Ayyuqel 2:2

Too ayro baaxol data qamburreey gaanibiy kaxxa dite le radele. Casri sinni qanaytuy baaxol oobehiyyak gexxaamah, qaleeli amballayuk maraaqa. Tah duma akke wayteeh, sarra akke waytu waytam kinni.

Malaaki 3:16

YALLIH meysi le maray kaa yaynabehiyya ahamat titta lih yaabeeh; YALLI ken yab ankaciseh, ken yab yoobbeh. Tohuk gexxaamah Yallih garil too marih migaq Yalli kassitih maktuubuk yabbixe.