Ayyuqel 3:9 - NABUWWA KEE MALIKWA

⁹ Kaadu qagseh iyyemii, «Taham baadal tan ummatah warisa. ‹Qeebih bical gaca. Qeebi abta gaadileh seeca. Qaskar gaaboosaay gaaduh uguta.

Ayyuqel 3:9 ပူးပေါင်းရင်းမြစ်များ

Yasaqya 34:1

Baaxol enna 'ta doolatway, inkih yoo fanah ama! Xayyoowaay, axcem yok ankacisa! Baadal tan ummatey, yi yaabah ayti ucuya! Baaxo axcem yok taabbay; baaxô-bagul yan mari yi yab cubbusay. Addunya kee addunyak eweqqa 'tam yi yaabah ayti tacaay.

Ermiyaas 31:10

Baaxoh ummatey, YALLI siinik iyyam ankacisa. Usuk iyyam badak afal yan xer baaxoh marah warisa. Isi mara fixixih elle yabbixe baaxok gaaboysele. Illit duwah yan num duwah edde yan illi elle duwa'nnal, ken duweleeh ken dacrisele.

Ermiyaas 50:2

«Xaagu ummatah inkih warisa: ‹Baabelon qeebit yibbixeenih› inxica. Tah elle yaaxigoonu waan asta uybulluya! Xaaguk tu macabinay ummatah warisa. ‹Baabelon-mari yallah leemiy Marduk migaq akah abaanahiyya luk sugte qande bayteh tan. Oson yallah loonum qaybit radde. Qibaadah bicsen tasaawiriy umâ-yabulih yanihiyyal qaybih tanim baahen› keenik inxica.

Ermiyaas 51:11

YALLI Baabelon baysam faxaah, tohuk gexxaamah Meediya deqsitta baaxoh malikwa keenit ruubah yan. Kay Qibaadah-Qarit aben umaaneh sabbatah, keenil obtu wayta bala bical tanik, carbi amrissa qaskar, «Gaysê-baxa arbaqa (samlisa)» inta. «Goobwa haysita» inta.

Ermiyaas 51:27

«Qaskarey, qeebi qimbissaanamih qalaamatih saro gubaak fayya haa! Baaxo inkih akah taabbe'nnah, *baanta ugura. Baabelon marih qeebih ummat bical haa! Araarat kee Minni kee Askanad doolatak, qeebi qimbisa inxica. Gaadu miraacisu waa gaadi abba haysita. Qeebih faarisik mangah qanayti gid takkem ruuba.

Ermiyaas 6:4

Too waqdi, «Yarusalaam tabbaxoonuh bical gaca! Wallaqenti yakke waqdi qeebi teetit abennok bical gaca» axcelon. Carri yakke waqdi, «Ahaysa bari yekkeh yaniih udurrunneh nanik, bar keenit abnay; inkih yan bar nee xiqelek. Magaalat koositih bicsen arooca baysenno» axcelon.

Yacedkel 38:17

YALLAY Mulki lehiyya iyyeemih, «Atu, dumaak Israayilih tooboke inni nabuwwah afat, wakti gufa saaku Israayil marat qeebi aba num ruubeyyo akak exceh suge num kinnito» iyye.

Yacedkel 38:7

Bica kok axce. Qaskar inkih, atu ken amrisa waqdi, bical gactay.

Miika 3:5

YALLI sinam duquurussa nabuwwah farmo ruube. Oson guquluh lakqo keenih yecee marak, ‹Tu sin maxagtaay, amaanah xiinettoonu› iyyaanaah; lakqo keenil kalita marak, ‹Carbi siinit akkele› iyyan.

Caggay 2:7

Baadal tan doolatwa asgayyeyyooh; luk sugen gadda keenik akke bahha heeyyooh; yi qari gaddaliinok kibbiimele.

Zakariyya 14:2

YALLI Yarusalaamat qeebi abaana'gidih doolatwa inkih gaabossu heeh, baahele. Yarusalaam carbit abbixelon. Qarwat sugga 'te duyye buubelon. Agabu cayliselon. Ummatak garab seewah beelon. Garab magaalal elle cabelon.

Zakariyya 14:3

Tohuk lakal YALLI dumî-dabaanal akah abak suge innah, too doolatwat qeebi abuh ugtele.