Ayyuqel 2:13 - NABUWWA KEE MALIKWA

¹³ Qaadiyyah sara isinnik qanxissaanam xiqtam mali. Abten umaaneh nadaamitta 'xicay qado baguuk yol uduura» yaanam iyye YALLI. YALLAY sin Dagelta kinnihiyyal uduura. YALLI maqaane leeh, racmatta le Dagelta. Kaxxa kacanu yaybulle Dagelta kinni. YALLI dagoomut mabagcarrita; digaalat mayasissikaay sahda abta umaaneh sahdah qafu aba Dagelta.

Ayyuqel 2:13 ပူးပေါင်းရင်းမြစ်များ

2 Samuwel 1:11

Dawud toh yoobbe waqdi, kaxxam qaadeeh sara isik edde qanxise. Kay mari kaadu toh abe.

1 Malikwa 21:27

Eliyyas yaabak gaba kale waqdi, Acab sara isik qanxiseh baaxot qideeh, sartanah *qabuddat gace. Maaqo cineeh xiinih qabuddal gace. Tohuk wadir fooci kaak dattowwa 'yeh cisabbootak gexe.

2 Malikwa 22:11

Malik, Yallih-xinto elle tan kitab iyyam yoobbe waqdi, hagga 'yeh wariggah saro isik qanxise.

2 Malikwa 22:19

toobitteeh, yoh isi nabsi rammisse. Yarusalaam kee Yarusalaam maral baahu waam toobbe waqdi, nadaamah sara isik qanxisseeh weqteh. Too waqdi abteh tan dooqa kok oggoleh. Yarusalaam tiyah tu gactek, Yarusalaam ableh-uma ceelot gacele. Sahda titta abaarta way, Yarusalaamat tekkem siinit takkay, akak inxicca 'ta umaane teetil baaheyyo.

2 Malikwa 5:7

Israayil-malik a warkat yikriye waqdi, sara isik qanxiseh, «Suuriyah-malik a num uruseyyom mannah yakkale? Qidaah wada Yalla yoo maay yakkale? Usuk umaane yok faxam qellu leemik tanih matan» iyye.

2 Malikwa 6:30

Malik ah yoobbe waqdi, niya kaak tiddigilleh sara isik qanxiseh. Magaalat maroh tan gasoh garil yan mari malik xagaral le sartanak guba *qabudda haah kaa yublen.

2 Aydaad 6:27

too dooqa, elle tan qaraanaak keenik raabit. Israayil ummattay ku naqoosah tanihiyya abte dambik qafu keenih ab. Edde gexan meqe-gita ken baris. A baaxo, ku baaxoy ku marah ikoytah teceehiyya kinnuk, rob tet mawaysiisin.

Nacmiya 9:17

Koo yaabbeenim cineeniih, atu abte ablewaynuh tan taama hawweeneenih. Kaxxiinak gexxaamah, wadir Masri naqoosinnah ken gacisu waa abba dooren. Atu tohuh, yi Dageltaw, racmatta kee maqaane le Dageltay qafu abahiyya kinnito. Naqabut asissike waah, sahdah kaxxa kacanu yaybulle Dagelta kinnito. Tohih sabbatah booxal qidda heeh darre keenit macabinnito.

Yasaqya 57:15

Macaay inteenik, daga raaqa *kudduusuk yan Dageltay kulli way waarahiyya iyyaamah: «Elle anim daga raaqah kudduusuk yan araca'mmay, toh lih kaadu yoh rammitaah toobita mara lih anyo. Ken lih akah anim, kibaal kee niya keenit haa'gidi.

Yasaqya 58:5

Soomtan waqdi, isinni biyaktaanah amo bayreh innah addah qunuunussu haytaanaah; sartanah *qabuudu xagarat haytaanah gombod baaxol caxxa hayteenih deerih elle gactan. Soomuh litoonum tahaa? Anu a soom siinik assakootem maay takkalen?› keenik axce.

Yasaqya 66:2

Ahim inkih anu innih gineeh, tonnal tekke. Takkay immay anu kiciyyom, rammitaah dambik toobita maray anu excem yok meysitak oggolahiyya.

Ermiyaas 36:7

Macaay intek, YALLI, bagcarra keenil baahu waam edde keenih warseh yeneeh; too bagcarra cunxo keenit qiddeemih taagah, aben umaanek yaduureeniih YALLA kallacaanam takkeh» 'yaanam kaak iyye.

Ermiyaas 41:5

Seekem kee Siilo kee Samaariya deqsitta magaaloolik bacra-tabanih num yemeete. Too mari deben isik mollaay, tonnah kaadu, sara isinnik qanxissa heenih yemeeten. Xagar kaadu isinnik toobiyeenih yemeeten. Yemeeten waqdi, Yarusalaamal YALLIH Qibaadah-Qaril sadgatah xayyoosoonu waan daro kee qaydarus gabat luk yemeeten.

Ermiyaas 42:10

‹Ama elle tanin rasul elle teedeenik, qarih innah sin xiseyyo ikkal, sin maggila. Caxah innah sin daabiseyyo ikkal, ahaysa buxuxuk sin masiiba. Siinil oobisem afqado yok biyakteh.

Yacedkel 9:4

«Ama Yarusalaam magaalak rike macabinay, adda akak tabba 'xicaay; addal teetik yakkeh yan umâ-yabulik gexxaamah, bagi keenik ankakammuk cisabboote marak qansak bagul asta hayis» iyye.

Hosiqa 14:1

Hosiqa iyyeemih, «Israayil ummatey, YALLAY sin Dagelta kinnihiyya fanah uduura. Edde tanin dambi baati siinih xale.

Yoonas 3:9

Tonnal Yalli bagcarra cabba heeh neh racmatak xuwaawam takkeh. Tonnal kaadu rabak cattiimenno» iyye.

Yoonas 4:2

Tohuk gexxaamah YALLA fan dooqa abe. Dooqah iyyemii, «YALLAW, anu ku farmo gabat luk buxak ugte saaku, ah abtu waytaamih cunxoh inni bagul luk suge. Isbaaniya baaxo akah kudem tohu. Atu kulli way maqaane kee racmatta le Dagelta kinnitom kok aaxigeh. Dagoomut mabagcarritaay digaalat matasissikaay kaxxa kacanu taybullee. Sahda abta umaanek sahdah qafu aba Dagelta kinnitom kok aaxigeh.

Miika 7:18

«Kok sa Yalli mayana. A saaku ku digaalak cattiime marah qafu abte. Akak aduure wayta naqabuh matanqiba. Amurruqe sinni kacanu nee taybulluyem koo ruffa hayta.

Naacum 1:3

YALLI giffa 'ta qande le'mmay, tohuh dagoomut mabagcarrita. Takkay immay umaane aba mara digaale'kal macaba. Isih elle gexa kabul caacay kee caaco ugusa. Siisa sahdah ibat elle ugutta'nnal, qamburre kay ibih gubat ugutta.