2 Malikwa 23:14 - NABUWWA KEE MALIKWA

¹⁴ Yoosiyaahu taahirik tan qamidwa akak iyyan qamidway xeetik bicseenihiyya yiggiggileh. Aseera deqsittaamay yaqbudeenihiyyah astah heenih sugen gurumuuda yiggileh. Too duyyeeya elle sugte arac sahdayti lafoofit buule.

2 Malikwa 23:14 ပူးပေါင်းရင်းမြစ်များ

2 Malikwa 18:4

Qibaada elle abak sugen aroocay fayyat raqtahiyya bayseeh; taahirik tan qamidwa akak iyyan qamidway xeetik bicseenihiyya bututtukka heen. Aseera deqsittaamay yaqbudeenihiyyah astah heenih sugen gurumuuda yiggiggileh. Muusa nacaasak bicseh cabe abeesah-ceeloy migaaqah Nacustan akak iyyeenihiyya kaadu bututtukka hee. Too abeesah ceelo yaggileenimik duma, Israayil mari woo abeesah ceeloh assakaxxiyyah qerto akah ruubak sugen.

2 Malikwa 23:16

Sarra wonna wagga hee waqdi, koomah amol kabaara yuble. Woo kabaarak lafoofi yeyyeeqeh tokkel suge mansafay sadgat elle abeenihiyyak amol cararise. Tonnah abak mansaf foyya keenik abe. Toh akkelem duma Yarobqam, too mansafal sadgat aba'gidih soolak suge waqdi, YALLI nabih afak kaak iyyeh suge. Sarrak Yoosiyaahu kaadu wonnah wagga hee waqdi, aham akkeleemit dumî dabaanal yaabe suge nabih kabri yuble.

Yasaqya 27:9

Tonnal dambi keenik katele. Israayil mari edde ase umaanek qafu geen saaku aham akkele: sadgatah xeetik bicsen mansaf, bardak bicsen xisneh innah, iggilla heelon; riira akkele. Aseeral yaaxigen gurmuuday qibaada akah abak sugeeni, qaydarus elle ruuban mansaf soolak maraaqa; bayele'kkal.

Yasaqya 44:19

Yaqbuden ceelo isi gabak bicsa mari, «Naqbude ceelo akak bicisna cooxuk garab girâ-bocoh haynaah, maaqo edde alasnaah; garabak kaadu yalla axcuk naqbude ceelo ninni gabak bicisna. Taham mannal takku bictaama? Boco naqbudem mannal takku bictaama?» 'yaanam axcuk, edde iyyan kas kee cubbi malon.

Yacedkel 6:5

Israayil marak raysa too oson yaqbuden xeet kee cooxuk bicsen duyyeh foocal qideyyo. Lafa keenik sadgat elle aban aracak foocal caacayat ruubeyyo.

Miika 1:7

Xeet kee coox kee biriitak bicsen duyyey aqbuduk sugeenihiyya riira akkele. Woo duyyeh qibaada elle aban qaril tan xiiqareh-xiinah yan agabuh acayuk sugen duyyet inkih gira gexele. Too yaqbuden duyyeeyah ceelo bayele. Woo duyye naqboytiitih keenik yan mari keenik beeleeh; too duyyey beenihiyya isinni yallitteh ceelo elle yaqbuden qarwal tan xiiqareh-xiinah aceelon» iyye.