2 Malikwa 18:14 - NABUWWA KEE MALIKWA

¹⁴ Too saaku Malik-Ciskiyyaahu Assuuriyah-malikiy Laakis magaalal yenehiyyah farmo ruube. Too farmol iyyemii, «Umam bahtem yoo kinnim innik eexegeeh; atu faxinnaanim koh aceeyyok, ahaysa ku maganak qeebik yok sol» 'yaanam kaak iyye. Malik Sanceerib tohul gacsemii, «Hay tonnal, lakqok tabna alfih kiilo takkem kee, dahabak kaadu alfih kiilo takkem yoh rub» 'yaanam kaal gacse.

2 Malikwa 18:14 ပူးပေါင်းရင်းမြစ်များ

1 Malikwa 20:4

Malik Acab tohul kaal gacsemii, «Yi-amoyta-Malik-Banihadadak, ‹Atu intam meqeeh; eelli haam inkih kuumuuy; koh aceeyyo› kaak inxica» 'yaanam kaah ruube.

2 Malikwa 10:5

Tonna-leemiik malik-gasoh-abbaay magaalâ-xintoh-abbaay makaabon kee malikik-rade-marat dacayrih yen marak inkih, titta geyya heenih farmo kaah ruuben. Iyyeenimii, «Nanu ku taamat gaca mara kinninooh, atu aba axcinnaanim abnuh bical nan. Nanu malikih num mahaynak, atu taysem kot ceelinnaanim ab» 'yaanam farmoh kaah ruuben.

2 Malikwa 14:19

Yarusalaamal sahda Amaxya qidimil malisse. Toh yoobbe waqdi Amaxya woo magaala cabeh Laakis deqsitta magaala fan megloh gexe. Takkay immay rabah kaah malse mari lakat kaak gexeh kaa qide.

2 Malikwa 15:20

Manacem woo lakqo Israayil gaddaleelak gaaboyseeh, kulli numuluuy kontom garsi keenik hee. Manacem too lakqo kaah yecee waqdi, Assuuriyah-malik Israayil baaxo cabeh, isi baaxo fan yuduure.

2 Malikwa 18:7

YALLI kaa'lih yeneeh; usuk abba hannaanim inkih gabal kaak bicak ten. Usuk Assuuriyah-malikih yab oggolaanam kee kay xintoh gubat gacaanam raabite cineh.

2 Malikwa 19:8

Tohuk lakal taaxige qaskar-abbay Assuuriyah-malikih farmo baahehiyya, Assuuriyah-malik Laakis-magaalak gexeeh, wokkel xayi Libna-deqsitta-magaalal qeebit yan 'yaanamih xaagu yoobbe waqdi, wokke fanah gexe.

Ermiyaas 34:7

Usuk too farmo warsa'gidih yemeete waqdi, Baabelon-malikih-qaskar Yarusalaam magaala tabbixe'gidih, qeebi teetit abak sugte. Tohuk kalah tan Yuudak namma magaalay gaso maroh edde taniih, migaaqah Laakis kee Qadeeka deqsittahiyyay tohum fanah antixibbixe'kal sugtehiyya yabbixeeni'gidih, qeebi edde abak sugen.