2 Aydaad 6:20 - NABUWWA KEE MALIKWA

²⁰ A qarik bar kee loqo amo akak wagit. A qaril «Yoo aqbudeloonu» 'yaanam inteh teneeh; tonna kinnuk, anu a qari fan ufkunna exceh abah an dooqa yok raabit.

2 Aydaad 6:20 ပူးပေါင်းရင်းမြစ်များ

2 Malikwa 19:16

YALLAW, ayti yoh ucuyaay yaaba yab yok oobbey. YALLAW, net takkem ubul. Sanceerib kooy waara Yalla kinnihiyyak xaafuh inxicca iyyem oobbey.

2 Aydaad 16:9

YALLI afqadook kaa yaamine marah qande yecee'gidih, inkih yan baadat cubbi le. Tonna'mmay ku tiyah tu gactek, duqur-taamat asseeh; tonna-leemiik ta saakuuk wadir carbi ku amok makata» kaak iyye.

2 Aydaad 20:9

Xisen waqdi iyyeenimihii, ‹Digaalah carbi net yekkek, dalkay sahdat taban-tabtahiyya nee tibbixek, hinnay kaadu, qulul nel rade yekkekii, a Qibaadah-Qariy koo elle yaqbudeenihiyyah foocal solla inneh dooqa abenno. Gadaama nee tabbixe saaku koo kallacitnek, atu woo kallaci neh oggolettooh, nee wadetto› 'yaanam iyyen.

2 Aydaad 6:19

YALLAW, yi Dageltaw, anu ku naqasu kinniyok, aba dooqa yok oobbeyaay, koo akah kallacam yoh duudus.

2 Aydaad 6:40

«Yi Dageltaw, a arac dacrisay; a aracal aban dooqah ayti ucuyaay aban kallaci macinin.

2 Aydaad 6:5

‹Inni mara Masrik eyyeqqa heemiiy akke, Israayil baaxol yoo elle yaqbuden qari elle xisan magaala dooreh masuginniyo. Yi mara miraacisu waa num duma dooreh masuginniyo.

2 Aydaad 6:6

A saakuh tu gactek, yoo elle yaqbuden qari xisaana'gidih, Yarusalaam magaala dooreh aniih; kaaduuy, Dawudow, yi ummat xiinissa'gidih koo doore› 'yaanam kaak iyyeh suge» iyye.

2 Aydaad 7:15

Yi migaq elle waara'gidih, innih dooriteeh taahir abe qari kinnuk, ta qari yi dacayrih xiineleeh; a qaril abba haan dooqah ayti aceeyyo. Yi inti kee yi afqado kulli waqdi kaa dacrisele.

Nacmiya 1:6

Yooy ku naqasu kinni wagga heey! Anu ku naqoosah bar kee laqo aba dooqah ayti ucuyaay yok oobbey. Nanu Israayil marak dambi le taamah taaminnem aaxigeh. Yoo kee anu akak rade yi kaxxa abbobti dambi le taamat asne.

Daaniyel 6:10

Daaniyel a amri yontocowweem yeexege waqdi, isi buxah gexeeh amô-qari yewqe. Too qarih taagat Yarusalaam magaala fan afkunuk yen. Too taagataak dumaak akah abak yene'nnah, fakimit yan taagatih garik gulubuh gacca 'yeh, kulli saaku ayrol sidiica adda Yalla kallacak dooqa abak suge.