2 Aydaad 30:6 - NABUWWA KEE MALIKWA

⁶ Farmoh ruuben mari, malik kee malik gubal taamita mari keenik elle iyye innal, inkih tan Yuuda kee Israayil rasu gexeeniih; yuktuben warkat akriyuk, keenik iyyeenimih, «Israayil maraw, YALLAY Abraahim kee Iscaakaay Yaqkuub doorehiyyal uduura; toh abteenik, siiniy away Assuuriyah marih gabak cate mara kinnihiyyal aduurele.

2 Aydaad 30:6 ပူးပေါင်းရင်းမြစ်များ

1 Malikwa 18:36

Sadgat edde aban uddur gufe waqdi, nabi Eliyyas Yallih-sadgat-elle-abaana'gidih-bicsen-aracih-garih amma 'yeeh iyyemii, «YALLAW, Abraahim kee Iscaakaay Yaqkuub doore Dageltaw, atu Israayilil Yalla kinnitooh, anu kaadu ku naqasu kinniyom ta saaku ken iysixxig. A saaku anu abah anim atu yok aba intem kinnim ken iysixxig.

2 Malikwa 15:19

Migaaqah Tiglat-Fileeser deqsita numuy Assuuriyak malikih yenehiyya Israayil rasu warare. Manacem soddom kee affara alfih kiilo lakqok kaah yecee. Too lakqo kaah akah yeceem, woo malik cato kaah yakke'gidiiy, tonnah kaadu, kay abbootan diggoowaah, nagay cayla baaha'gidik ten.

2 Malikwa 15:29

Fekac malikih suge dabaanal, Assuuriyah malikiy migaaqah Tiglat-Fileeser deqsitahiyya Qiyon kee Aabil-Beet-Maqka kee Yanowac kee Kedes kee Caxor deqsitta magaalooli kee, tonnah kaadu, Gilqad kee Galiil kee Naftaali marih baaxo Israayilik raaqiseh. Woo baaxol suge mara Assuuriya fan seewah bee.

1 Aydaad 29:18

YALLAW, ni kaxxa abbobtih yen Abraahim kee Iscaak kee Israayil elle aamanuk sugte Dageltaw, a saaku lino meqe niya kulli way isi marih afqadot haay. Ken afqado koo fan hayisay.

1 Aydaad 5:26

Tonna leemiik Israayil doore Dagelti, Assuuriya deqsitta baaxoh malikiy Ful deqsitahiyyat ken baysaamih fayxi hee. Woo malik kaadu Tiglat-Fileeser deqsita migaaqal amixxiguk yen. Too waqdi Ruuben-kedo kee Gaad kedoh yooboke mara kee Manassê-kedoh yooboke marak garab seewah beenih, Calac kee Cabor kee Haara kee Goodan deqsita weeqayti garil tan baaxol ken gacsen. A saaku fanah tokkel yanin.

2 Aydaad 28:20

Tiglat-Fileeser deqsita Assuuriyah malikiy usuk farmo akah ruubehiyya yemeeteh immay, usuk kaak faxe cato hinnay, gibdaabina kaal baahe.

Aster 3:13

Kutbe-abeenit toh uktubba heenih gaba kalen waqdi, a farmoy yuktubeenihiyya gabat le mari, farmo-elle-tan-waraakit gabat luk, rakaakayitte fan arduk gexen. Too yuktuben farmoy too mari gabat beehiyyal tenemii, «Sanatak inikhaytoh alsay migaaqah Adar deqsitahiyyak taban kee sidochaytoh ayroh addat Yahuuduh ubukka 'ye marak furrayna takkuu, baxuw takkuu, idoola takkuu, agabu takkuu, urru takku num keenik macabinay yakkeenimiik ken qida» 'yaanam elle ten. «Oson edderra heenim keenik buuba» 'yaanam kaadu elle ten.

Aster 8:14

Malik elle amrissa hee innal, too waraakit elle ruuben mari malik-buxah-faarisil koori hayya heenih amot akak gacca 'yeenih kaxxam xoxbisak gexen. Too amri kaadu inaytâ-magaalah ten Suusal inkih yontoobbe.

Yasaqya 1:9

YALLAY Nabaamak Nabahiyya, Yarusalaamal yekkeh yan wararak marak garabak rooci cate waamal, Yarusalaam magaala Sodom kee Gomorrak kaxxih, inkitanuuk baye rarte.

Yasaqya 6:13

Baaxô-bagul bool yakke marak tabna num raqtaamah, naqboytit qagitak baaxo warareleeh, baaxot gira ruubelon. Takkay immay yirgiqen caxak buxux elle raaqe'nnal, taahirik yan dariyyuy sarra yaabuku waa raaqele» yok iyye.

Ermiyaas 29:1

Sarrak Ermiyaas, seeka kee nabuwwaay ummatak saqoltih yan mara kee, raqqa 'ye maray Yarusalaamaak Baabelon-rasu fan seewah orbiseenihiyyah warkat yuktubeh ruube.

Ermiyaas 3:14

Qagissa heeh iyyamaa, «Imaan maleelay! Yi mara kinnitoonuk, yol uduura. Sin Dagelti yoo. Kulli magaalak num-num siinik beeyyooh, kulli gulubuk kaadu namma-namma num siinik doorru heeh, sarrak Siyon qale fan sin beeyyo.

Ermiyaas 4:1

YALLI siinik iyyaamah, «Israayil maraw, yol taduureenim faxxeenik, yol uduura. Anu faxe waa duyyey isinni gabak bicisseenihiyya taqbudeenim cabaay; yi qibaadal digga axcuk,

Ermiyaas 51:31

Baabeloonut takku wayta baati malikih warsaana'gidih, mariiy kabuk kaa fan arduk amaatele. Baabelon inkitanuuk tintixibbixem kaah warselon.

Yacedkel 33:11

‹Waara YALLAY Mulki lehiyya kinniyooh, inni migaaqal xiibita'mmay, uma taama le num isi uma taamah rabam kaak mafaxa. Woo uma taama cabba heeh mano kaak faxa. Israayil-xayloy, uma taama cabaay, manok raba madooritina› keenik inxic» iyye.

Hosiqa 14:1

Hosiqa iyyeemih, «Israayil ummatey, YALLAY sin Dagelta kinnihiyya fanah uduura. Edde tanin dambi baati siinih xale.

Hosiqa 6:1

Ummat intaamah, «Ahaysa YALLAL nadaaru wayna. YALLI nee biyaakeh immay nee qaffoysele. Nee mudeh immay dale neh urusele.

Zakariyya 1:4

Isinni kaxxa abbobti makkina. Sin kaxxa abbobtih dumî-dabaanal yi nabuwwa yi farmo warisak sugteeh; ‹Edde gexxan uma gitak raaqaay, dambit maasina. Toh intam YALLAY Nabaamak Nabahiyya›, 'yaanam keenik axcuk sugen. Takkay immay oson yi nabuwwah yab ankacisak masuginnoonuuy; anu aba axcem oggolak masuginnon.