1 Malikwa 18:26 - NABUWWA KEE MALIKWA

²⁶ Oson too awur beeniih usgudday niyyassa heenih, maacak xabba haanamaay dohri tikka 'yam fan dooqa abak sugen. Anay fayya haak, «Baqalow, innam nek oobbey, innam nek oobbey» iyyeeniih; toh lih kaadu, woo kaah sadgat elle abaana'gidih xisen aracat meekitak, way kaqitakaay way kaadu argaduk aseeni'mmay, keenil gacsem matan.

1 Malikwa 18:26 ပူးပေါင်းရင်းမြစ်များ

1 Malikwa 18:24

Too waqdi Baqal-nabuwwa isinni yalla kallacoonay, anu kaadu YALLA kallaceyyo. Too dooqa abna waqdi, gira ruubinnaan Yalli nummah Yalla kinnim aaxigenno» iyye. Ummatta, «Taham meqeemik, takkay» iyyen.

1 Malikwa 18:25

Sarrak Eliyyas Baqal-nabuwwak iyyemii, «Isin mangitoonumih sabbatah, isinni awur naharat beyay usguuda. Too waqdi bocot gira maruubina; isinni yalla kallaca» keenik iyye.

1 Malikwa 18:27

Dohri yekke waqdi, Eliyyas keenil anqaaseh iyyemii, «Aykee sin yalli xayuk yaabbeh mayanak, dooqah anay fayya hayteenih abe wayten. Sin yalli away cisaabat aniiy, taamah agxeh aniiy, safarah rikek teena gexe yekke kaa tekkek, anay fayya kaah haa. Inaaqat yanim takkehik, kaadu kaa ugusa» axcuk, anqaasah ken lih yaabe.

Yasaqya 37:38

Ayrok teena yalla iyyeh yaqbude duyyey Nisrok deqsittahiyya, wohuh bicsen qarih addal aqbuduk suge waqdi, kay xaylo nammayay migaaqah Adrammelek kee Sarxer deqsitta amma 'teh seefit kaa qiden. Sarrak Araarat deqsita rasu fan yoowwen. Kay aracal Isar-Caddon deqsita kay baxi malik yekke.

Yasaqya 44:17

Wohuk raqte bocoh tu gactek, yaqbuden ceelo akak bicissa haah, foocal akak qibaadah gomboh radan. Dooqah too ceelo kallacaanaah, «Yi dagelti kook, yoo wad» 'yaanam iyyan.

Yasaqya 45:20

YALLI iyyamaa: Baadal tan ummattak saaboh raaqe maraw, titta fanah gacaay inki aracal gaaboowa; inkih yoo fanah amay. Cooxuk bicsen duyyey yaqbudeenihiyya ukkuqqa heeh baaxo meksiisa mari, kas cabe mara. Oson too duyyey hebeltô-tu'xiq sinnihiyya yaqbudeeniih ta duyyek, ‹Nee wada› iyyan.

Yasaqya 46:7

Gexan ikke yelleenik, quukah sunkul beyan. Aracak teenal oobissa haanaah sooliseenih caban. Elle soolisen ikkek tangayyeeh rooci lem hinnaay, gaba tet esgeyya haytam fanah, elle soolisen ikkel elle sugta. Too waqdi, ‹Yoo cateey yoo wadeey! Koo aleelitek› axcuk dooqa foocal akak aban! Too duyye taabbeeh tuk teena elle gacissam hinna.

Ermiyaas 10:5

Too cooxuy yalla akak iyyaanahiyya cabcab elle yooboke aracal, woo cabcab kimbir yakmeemik kimbir akak meysita'gidih, sartan edde hayya heenih sahdayti gurral soolisen caxxih bis le. Afak mayaaba; mayangayyaay magexa. Aracak arac ken beyaanam faxan waqdi, sunkul hayya ken heenih quukah beyan. Hay, siinil baaham maliiy siinih xiqam malik, akak mameysitina» siinik iyyah yan.

Daaniyel 5:23

qaraanal yan Goytak giddih tan taamah taamitteeh; kay qarik dannabah orbisen kobbaayiy kee sacnittel, koo kee ku xintoh miracwaay ku agabu kee caggô-gubbih caggoh ginnaaqot lito agabu, qinabak bicsen kamri tooqoben. Too waqdi yalla axcuk dahab kee lakqooy nacaas kee biriitaay coox kee xeetik bicissen duyyey tu aabbe waytah tu able waytah tu aaxige waytahiyya faylisse. Yallay koo wadaah koo qidaah atu abba haytem inkih gabat lehiyya massakaxxinnito.

Yoonas 1:5

Baddi mari wariggiteh kulli numuuy isih le yallal cato essere. Sarrak doonik sutimik cattinta'gidih, amol teetik suge quuka badal qiden. Oson tohut yanin waqdi, Yoonas doonikik addah culla 'yeh kaxxa xiinih xiineh yen.

Cabakkuk 2:18

A xeet kee cooxuy taqbudeeni maca siinih xiqtaah? Tet le marah mannah tanim xiqta? Ah sahdayti isi gabak bicseemi'kkal tu siinih xiqtam hinnaay, deedalak sa akak geytaanam manton. Yaqbuden duyye bicse mari, isi gabat bicseemiy afak yaabe waytahiyyal yaamineh!

Cabakkuk 2:19

Woyyow siinit takku waytaamow! Caxxa kee xaay gabak orra heenih bicseenihiyyak «Xiinik uguta» intan. Ta xeet kee coox siinih warsa sirri maay le? Siinih tu warsam hinna'mmay xeet kee coox isih rooci mali. Bagul dahab kee lakqo akak haytaanah immay tohuh rooci mali.

Xafanya 1:9

Yalla maleela taqbude duyyeeya keenik kaxxih yaqbude mara digaaleyyooh; too maray gita maliinot sahdak geyya haa duyyet isinni dageltih qari bilqisahiyya digaaleyyo» iyye.

1 Samuwel 5:3

Maaca dibroh yemeeten waqdi, oson Daagon akak iyyaanamay yaqbudeenihiyya, YALLIH Qahdi addat akak yan Sanduguk foocal gommoh raddeh keenih sugte. Ugussa heenih, elle suge ikkel akah suge innah, soolissa heenih caben.