1 Aydaad 25:1 - NABUWWA KEE MALIKWA

¹ Malik Dawud kee kedoh abbobti, Yallih qibaada elle aban ikkel, woo qibaadak foocat gacca 'yeh absiisu waa maray Leewih yoobokehiyya dooren. Asaf kee Heeman kee Yedutun deqsita sidooca gulub akah dooreenim, *kiraraay *begena kee giyaagib aagaruk, Yalli iyyem sinaamah warsaanamih qaadak ten. Toh abu waa mari ah kaana.

1 Aydaad 25:1 ပူးပေါင်းရင်းမြစ်များ

1 Malikwa 10:12

Suleeman too coox YALLIH Qibaadah-Qari kee isi qarit hayu waa gutqeyna hee. Gad abeenitih kaadu *begena kee kirar akak bicsaana'gidih hee. Too xaqan le coox Israayil baaxo baaheenih masuginnon. Sarrah baahak maraaqinnon.

2 Malikwa 3:15

sarrak «Gexay saareh yaaguren duyye digira num yoh baaha» iyye. Woo num yemeeteh, saareh yaaguren tiya yoogore waqdi, YALLIH *Roocaaniyya Eliisaqal obte.

1 Aydaad 12:28

Saaduk deqsita furraynuy carbil qangih yenehiyya kee kaah mare luk ten qaskarih abbobtik labaatanna kee namma num kaal temeete.

1 Aydaad 13:8

Takkay immay Dawud kee raqqa 'ye mari a sandug elle beyaanamal, Yallih-massakaxxah quuruk loonumuuk argaduk yemeeten. Afak Yallih saare edde haakaay wallitakaay *begena kee kiraraay giyaagib kee karambooy *baanta aagaruk yemeeten.

1 Aydaad 15:28

Tonnal Israayil ummatta takkeemiik, YALLIH Qahdih-Sandug too bical baaheeniih, Yarusalaam guffa haam fanah qililisakaay, baanta kee gaysaay giyaagib kee begenaay kirar aagaruk afracuk baahen.

1 Aydaad 23:2

Dawud, Israayil makaabon kee seeka kee Leewih yooboke marah seeco abeeh ken bahsiiseh.

1 Aydaad 25:2

Naharak dooreenim, Asaf xaylok lab-xayloh fereeyi. Too mari migaaqah Dakkur kee Yuusuf kee Natanya kee Asareela deqsitak yenen. Ta mara amrissaah elle aban inna ken taybulleem, Asafak ten. Asaf Yalli iyyem saarê-gurral warsa'gidih, doorime numuk ten. Asaf amrissam, malikik ten.

1 Aydaad 25:3

Ta marak kalah kaadu tahah doorintem, Yedutun deqsita numih lab-xayloh laceeyik ten. Migaaqah Gedalya kee Xeri kee Yasaqya kee Simqi kee Casabya kee Mattitya deqsitak yenen. Foocat keenik gacca 'teh ken absiisak tenem, ken abbak ten. Oson Yalli iyyem saarê-gurral ummat aysixxiguk yenen. Toh yaysixxigen waqdi begena aagaruk Yalla faylisak candu kaah gacisak yenen.

1 Aydaad 25:9

Ta namma bool kee bacra-taban kee bacra num gulub-gulubuh labaatanna kee affara exxah heenih yenen. Kulli exxa taban kee namma num keenik akkuk teneeh, kulli exxaay isi abba keenik luk ten. Ken migooqaay saami caxxi elle qiden inni, ah kaa. 1. Yuusufuy Asaf buxah marak rade 2. Gedalya 3. Dakkur 4. Xeri 5. Natanya 6. Bukkiyaahu 7. Asareela 8. Yasaqya 9. Mattanya 10. Simqi 11. Qadarel 12. Casabya 13. Sabuuwel 14. Mattitya 15. Yerimot 16. Cananya 17. Yosbakaasa 18. Canaani 19. Mallooti 20. Eliyaata 21. Cootir 22. Giddalti 23. Macdiyot 24. Romamti-Qeder.

1 Aydaad 6:16

Leewi lab-xaylok sidoc luk yen. Ken migaq Gerson kee Kohat kee Maraarik ten.

1 Aydaad 6:39

Heemanah ramad le numuy Asaf deqsitak migda le kabuk kaak soolak kaa catak yen. Asaf akak rade marih migooqa ah teeti. Asaf Barkiyyâ-baxaay, Barkiyya Simqâ-baxaay

1 Aydaad 6:44

Keenih ramad le maray Maraarik radehiyya Heemanak guri kabul soolak ken catak yenen. Keenik foocal yan num Etan deqsitak yen. Etan Keesi-baxaay, Keesi Qabdi-baxaay, Qabdi Malluk-baxaay

1 Aydaad 9:33

Yallih Qibaadah-Qarih addal saare abak yen mari, Leewih yooboke marak ten. Too marak abbobtih yen mari bar kee saaku too taama luk yeneemih sabbatah, gersi taama keenih maacannon. Too mari Qibaadâ-Qaril ten golitteh addal dabqah gacen.

2 Aydaad 23:1

Laca sanat tokket kaa sugseenik lakal, sek-Yoyadaq, «Tahaysa kay qaadak tuk teena abnam tayse» 'yaanam iyye. Sarrak qaskar abbobtik laca num lih bica haysite. Tohumuu, Yaroocám-Qadarya kee Yahoocanán-Ismaaqil kee Yoobád-Qadarya kee Qadaayá-Maqseyaahu kee Dikrí-Alisafat deqsitta qaskar abbobtik ten.

2 Aydaad 23:13

Woo baaxol qaadah akah abak sugen innah, Yallih Qibaadah-Qaril yan qamiddih garil, soola malik tuble. Bool-abbobtih ten qaskar kee *baanta yaagure maray maraasiyot kaa yabbixehiyya tuble. Kaadu farcatak yan maray waxxaq iyya kee baanta yaagurehiyya tuble. Qibaadâ-Qaril saare aba mari elle digran duyye luk a qaffaydak foocat yen. Toh tuble waqdi, Qatalya niya teetik baxaqteeh sara isik qanxisseeh, «Gano leelaay, gano leelaay! Ah gano!» inte.

2 Aydaad 23:18

Sarrak Yoyadaq seeka kee Leewih yooboke mara YALLIH Qibaadah-Qaril aban taamah abbootanat hee. Ta mari Malik Dawud ken edde hee taama kee, Muusal obte xinto elle inta innal, YALLIH sadgatah baahan saqih cado cararisaanam taamah luk yenen. Tohuk kalah, Malik Dawud elle iyye'nnal, Yallih saare qiidih asan saakih qaffaydah abbootan keenih yecee.

2 Aydaad 23:9

Yoyadaq, Malik Dawud macaxu kee goobuy Yallih Qibaadah-Qaril daanat sugtehiyya qaskar abbobtih yecee.

2 Aydaad 31:2

Ciskiyyaahu, seeka kee Leewî mara mango ikkel kurra heeh, kulli marahaay aboonu waan rikek tan taama keenil yecee. Tohumuu, cararisan sadgat xayyoosaanam kee, laa kee illi mattacoy amaanah xiinaanamih astah qidaanahiyya xayyoosaanamaay, YALLIH Qibaadah-Qarih addal aban qibaadat yangaleenimiiy, woo Qibaadah-Qarik mango culmal Yallah fayla kee candu gacsaanam taamah keenih yecee.

2 Aydaad 34:12

A qarih xisne abe mari amaanat kee digga le marak ten. Leewih yooboke marak affara num oson aben taamak amo wagitak ten. Too affara numuk namma num migaaqah Yacat kee Qobadya deqsitak ten. Maraari deqsita gulubuh aabakuk yenen. Gersi namma numuh tu gactekiiy, migaaqah Zakariyya kee Masullam deqsitak yenen. Kohat deqsita gulubuh aabakuk yenen. Leewih yooboke mari yakkeemiik fayla wagga haytaamal dudda le ixxiga le marak ten.

2 Aydaad 35:15

Leewih marak Asaf gulubut raaqa maray Yallih fayla abahiyya dumaak Dawud kee Asaf kee Heeman kee Yedutun keenih heeh suge aracal gacen. Yedutun Malik Dawuduh Yallak temeete farmo baahak yen nabik ten. Qibaadâ-Qarih afal dacayrih mari isi arac macabinnay dacayrit elle yeedeeh; Elle-Tatriyyi-Qiidih taama Leewih mari ken aftok keenih abe.

2 Aydaad 5:12

Leewih ubukka 'ye marak saare abak ten Asaf kee Ceeman kee Yedutun akak axcuk yenen labha kee, oson akah yooboken gulubut raaqak yen mari inkih, too saaku sartanah *baftak bicsen meqe sarot gaceeniih; sadgat elle aban mansafak ayrô-mawqa le kabut, kirar kee *begena digirak giyaagib aagaruk soolen. Bool kee labaatanni seekiy *baanta aagaruk ken xaqut soolak yenen.

2 Aydaad 8:14

Isi abbah raatat gexakaay usuk fiiriseh cabe gita kataatak, kulli saaku seekal tan taama kee, Leewih yooboke maray Yallih saare abta kee tonnah kaadu seeka elle catehiyyah, too taama elle kuran innal, keenih warse. Tonnah kaadu, duma kay abba Dawuduy Yallih numuh yenehiyya fiiriseh cabe gita kataatak, Yallih Qibaadah-Qarih afal dacayri abu waa mara heeh, too marah Yallih Qibaadah-Qarih afoofak kulli afal gacu waa maral, taamak tanim kee elle aboonu waan inna keenih yescesse.

Qedra 6:18

Muusal oobe kitab elle inxicca iyya'nnal, seeka kee Leewih yooboke mara, butta-buttah hayya heenih Yarusalaamal Yallih Qibaadah-Qarit aboonu waan taama keenih warsen.

Nacmiya 11:17

Mattanya kaadu Yarusalaamal dabaaqah gace marak numuk teenah yen. Mattanyah abba Miika deqsita numuk teneeh; Miikah abba Dabdi deqsita numuk ten. Asaf deqsita numih gulubuk yenen. Mattanya Yallih Qibaadah-Qaril Yalla faylisak aban saare edde haa numuk ten. Bakbukya deqsita num kaadu Yarusalaamal dabaaqah gace marat yen. Mattanya kee kaa'lih yan mari saare edde haa waqdi, Bakbukya kee kaa'lih yan mari saare kaah akkaquk yen. Leewih yooboke marak Qabda deqsita num kaadu Yarusalaamal dabaaqah gace marat yeneeh, abba kaak Sammuqa deqsita numuk ten. Sammuqa abba Galal deqsita numuk ten. Akak radeenim, Yadutan deqsita numuk ten.

Nacmiya 12:24

Casaabiya kee Sereebiya kee Yaasuwa kee Binnuy kee Kadmiyal deqsita num Leewih yooboke marak foocat anuk, ken missoyseeniih butta-buttal ken heen. Ta mari namma buttah gacca 'yeh, Malik Dawuduy Yallih numuh yenehiyya elle abak yen innal, Yallih saare aba mara kee yakkuqe marah gacca 'yeenih, Yalla faylisak yenen.

Nacmiya 12:27

Yarusalaamat maroh ten gasoy tiddigilleh sugtehiyyah xisnek gaba kalen saaku, Leewih yooboke marah seeco aben. Keenih akah seeceenim, ruffa axcuk edde asaana'gidiiy, Yallah candu edde gacsaana'gid kee Yalla edde saarisaana'gidik ten. Too saarel, kirar kee begenaay giyaagib aagaruk Yalla saarisak, candu Yallah gacsen.

Yacedkel 40:44

Sarrak too num adda le kabut raaqa daarat fanah yoo bee. Tokkel adda kabu raaqa daaratat namma goli uble. Too golik tiyak teeni kilbat le kabut raqta culmak garit yeneeh, gabbi-qaxa fanah afkunuk yen. Tiyak teeni kaadu gabbi-qaxat raqta culmak garit yeneeh, kilbat le kabu fanah afkunuk yen.

1 Samuwel 10:5

Tohuk lakal Gibqa-Eelohim deqsitta magaalay Filistiin-qaskar elle tinfidiggeh tanihiyya fan amaatetto. Too magaalak culmal butta takke nabuwway Yallih sadgat elle aban koomak roorul obtahiyyat garayetto. A nabuwwa *begena kee karambooy fooxima kee kirar aagarukuuy argadukuuy nabuwwah innah yaabakaay xongolak koh sugelon.