1 Aydaad 23:28 - NABUWWA KEE MALIKWA

²⁸ Taamah keenih yeceenim: Qibaadâ-Qaril YALLIH qibaada aban waqdi, Haaruunuk rade maray seekâ-lago lehiyya faxxinta taamal cataanam kee, Qibaadâ-Qarih daaratwa kee qunxa qarwa dacrisaanam kee, taahirik enna 'ta duyyey Qibaadâ-Qaril tanihiyya saytunusaanam kee, raqqa 'ta taamay Yallih Qibaadah-Qarih addal faxximma 'tahiyya abaanam kee,

1 Aydaad 23:28 ပူးပေါင်းရင်းမြစ်များ

1 Malikwa 6:5

Qibaadâ-Qarik dariifat qunxa qarwa xiseeh; too qarwa iro le kabuk Qibaadâ-Qarit xakabuh raaqak ten.

1 Aydaad 18:17

Yoyadáq-Banaaya kaadu Dawud dacayrih tan qaskar abbah yen. Woo qaskar marin marak ten. Tohuk kalah kaadu, Dawuduk lab-xaylo kay gubal kaxxa abbootan luk ten.

1 Aydaad 23:27

Dawud ken elle farrimma hee'nnal, tohuk wadir Leewih mari qumrik labaatanna guffa haa saaku, Yallih Qibaadah-Qarih-taamat akah gacan innah, migaq isinnik aktubuk yenen.

1 Aydaad 23:29

Yallih sadgatah xayyoosen gaqamboh amo wagtaanam kee, tonnah kaadu, Yallih sadgatah baahan bululih amo wagtaanamih taama keenih yeceen. Tonnah kaadu, kamiir maleh alaysen gasiita kee saliidit yesgellen bulul kee alaysen gaqamboy Yallih sadgatah baahaanahiyyah abbootan ken gabal heen. Qibaadâ-Qaril aban sadgatih duyye miizaanal haanam kee,

1 Aydaad 23:4

Too waqdi Dawud iyyemii, «Too marak labaatanna kee affara alfih num taamah yaallu waam, YALLIH Qibaadah-Qarih addal tan taamaay; kaadu too soddom kee bacra alfi yekke marak laca alfih num taamah yaallu waam, qaada yaktubeenim kee ummatta cakki tittak wayta waqdi, ken kuraanama.

1 Aydaad 28:13

Tohuk kalah kaah warsem macaay inteenik, seeka kee Leewih yooboke mara exxa-exxal akah kurra hee innaay; YALLIH Qibaadah-Qaril keenil tan taama akah aban innaay; wohuk kalah kaadu, Qibaadâ-Qarih addal Yallih sadgat wagga hayta taama edde aban mingilwa kee duyyeeyah amo akah wagtan innah ken missoysaanaah bical haanamih tiyak kaadu isit celtam kaah warse.

2 Aydaad 23:4

Taway abnu waynam macaay inteenik, seeka kee Leewih yooboke mari sabti ayro taama aba'gidih yamaate waqdi, sidooca afah ken heenno. Naharsi afa keenik Yallih Qibaadah-Qarih afal dacayrih gacele.

2 Aydaad 23:6

Too waqdi a taamah taahirik tan seeka kee Leewih yooboke marak kalih mari Qibaadâ-Qari macula. Keeniy ta taamat yanihiyyak kalih mari macula. A mari a taamah taahirroowe mara kinnuk, culam tu mali'mmay, keenik kalih mari macula. Aki mari, YALLI elle iyye innal, Qibaadâ-Qarih afal aadelon. YALLIH yab oggolaanam faxxinta.

2 Aydaad 29:15

Ta mari isi innah yan Leewih yooboke marah daffeyna hee. Aham keenih warseenih isinni kaadu taahirroyseenih. Sarrak malik keenik akah inxicca 'ye innah, YALLIH Qibaadah-Qari taahirroyseenih. Tohim Yallih xinto inte innal aben.

2 Aydaad 29:5

Tokkel ken lih yaabeh keenik iyyemii, «Isin Leewî-maraw, siinik axcem yok oobbeya. Taahirik isinni haa; YALLAY sin kaxxa abbobti doorehiyya elle yaqbuden qari taahirroysa. Kay Qibaadah-Qari wassakossa haytam inkih wokkek kala.

2 Aydaad 31:11

Tonna-leemiik Malik keenik elle iyye innal, YALLIH Qibaadah-Qaril duyye edde daanisan arac bicseeniih;

2 Aydaad 31:2

Ciskiyyaahu, seeka kee Leewî mara mango ikkel kurra heeh, kulli marahaay aboonu waan rikek tan taama keenil yecee. Tohumuu, cararisan sadgat xayyoosaanam kee, laa kee illi mattacoy amaanah xiinaanamih astah qidaanahiyya xayyoosaanamaay, YALLIH Qibaadah-Qarih addal aban qibaadat yangaleenimiiy, woo Qibaadah-Qarik mango culmal Yallah fayla kee candu gacsaanam taamah keenih yecee.

Qedra 8:29

YALLIH Qibaadah-Qari guffa haytaanam fanah, ta duyye meqe innal daanisay amo akak wagita. Yarusalaam guftan saaku seeka edde tan golih adda beyay miizaanal haa. Tokkel seekak saqoltih yan mara kee, Leewî-kedok saqoltih yan mara kee, tonnah kaadu, Israayil ummattak saqoltih yan marih gabal heetton» keenik exce.

Nacmiya 11:24

Fatacya deqsita num Fursi-Malikih garil Israayil ummatih awlaytuh yen. Fatacyah abba Mesedbal deqsita numuk ten. Fatacya Yuudâ-kedok Dara deqsita gulubuh gacisak yen.

Nacmiya 13:9

Sarrak, «Woo duyye addal akak sugte qari taahirroysa» 'yaanam exce. Wohuk gaba kalen waqdi, «Yallih Qibaadah-Qarih duyyeey, sadgatah daaniseenih sugen daro kee qaydarus wadir elle suge qarih gacisa» 'yaanam exce. Gacseenih.

Ermiyaas 35:4

yakkeenimiik YALLIH Qibaadah-Qari fan ken baahe. Qibaadâ-Qarik Yigdalyaahû-Caanan deqsita nabih darsa edde ten golih adda ken culse. Too goli Qibaadâ-Qarik saqoltih yan mari le golik xaqut yeneeh, kaadu Sallúm-Maqseyaahu deqsita numih golik daga raaqa golik ten. Maqseyaahu Yallih Qibaadah-Qarih taamat kaxxa arac le numuk ten.

Yacedkel 40:17

Sarrak too num Qibaadâ-Qari akak culan afak daarat fanah yoo bee. Tokkel woo irô-kabu raqta gasot xakabuh xisen soddom goli yen. Too soddom golik foocat xeet qalumuh elle heen arac yen.

Yacedkel 41:26

A qarik tattabat taagoota ten. Gidaar akak nakli-tasaawirit bilqiseenih yenen. Qibaadâ-Qarih golitte tonnah too tasaawirit bilqiseenih yenen.

Yacedkel 42:13

Too num yok iyyeemih, «Tama namma qari, taahirik yan namma qari» yok iyye. «Yallih Qibaadah Qari culta seeka kaxxam taahirik tan maaqo elle yakmeenim, tama araca. YALLIH garil taahirik tan maaqok daroy-sadgatah-baahaanahiyya kee, dambi-kalootuh baahan-sadgat kee, edde-asen-qellatih-cakkih-baahan-sadgat elle haanam tokke» iyye.

Yacedkel 42:3

Kabuk teenak tu elle xissiime wayta arac yen. Too arac Qibaadâ-Qari gexxa 'yam xexxaarah akkuk yen. Tabna mitri baguh akkuk yen. Kabuk teenak kaadu qalumuk xisen daaratat af cabak yen. Qari akak xissiimem sidiica rankok ten. Kulli rankoy daga raqtahiyya guba raqta rankok qunxuk raaqak ten.

Yacedkel 44:14

Tahak wadir gaca marih taamay Qibaadâ-Qarih addal abaanahiyyat ken heeyyo.»