Yohani 17:23 - ULufingwi uLupwa

²³ Ine indi muhati zyavho, niiwe uli muhati yaane. Nkulaavha kuuti vhavhe ishintu shooka, inga avhantu vhonti vhe vhatanitisile vhamanye kuuti iwe unsonteleziizye, havhili vhamanye kuuti uvhakunzite avhasundikwa vhaane inza vwe unkunzite ine.

Tesitamenti Umupwa 1965

²³ Ine mumwavo vuvo, havilʼiwe mumwanʼine, pe pakuti vavanje ve va vwila ukuva woka mwene, yope ninsi yimanyinsanye ukuti untumile wenewe, ukuti uvakunzitʼavene inza shʼunkunzite nane.

Yohani 17:23 ပူးပေါင်းရင်းမြစ်များ

Yohani 10:38

Ileelo inga nkuzivhomba imbombo zye uTaata waane akuzivhomba, poosye inga mutakwitiha zye nkuyanga, ishi mujendeelele kuzyitiha imbombo izyo. Kwi idala ilyo, pe kwe mumanye kuuti uTaata waane ali muhati yaane, niine indi muhati yaakwe.”

Yohani 13:35

Inga mukukundana, pe avhantu vhonti kwe vhamanye kuuti mwe vhasundikwa vhaane.”

Yohani 14:10

Vhuli, utakwitiha kuuti ine indi muhati ya Taata, woope uTaata ali muhati yaane? Amazwi iga ge nkuvhavhuuzya ntakuyanga ku maha gaane neene, uTaata we ali mu mwane we akuvhomba imbombo zyonti izi.

Yohani 14:23

UYeesu ahamwamula ahati, “Umuntu wonti we ankunzite ine, kwe azivhombelaje imbombo zye nkumulajizya. Woope uTaata waane kwe amukundaje umuntu uyo, havhili ine nu Taata waane tuliyinza ku kwakwe nu kutendama pooka nawo.

Yohani 15:9

Inza vwe uTaata ankunzite ine, vwe niine mbakunzite imwe. Ishi pe mujendeelele kuvha mu shikunzi shaane.

Yohani 16:27

Yeenyi, uTaata uMulungu avhakunzite imwe, mwe pe niimwe munkunzite ine, havhili mwitisile kuuti náfumile ku kwakwe.

Yohani 17:11

Ishi nkwinza kuli iwe, te mbe havhili mu nsi umu. Ileelo avheene kwe vhajendeelele kuvha mu nsi umu. We Taata Mufinjile, nkulaavha uvhaguulile kwi izina lyaho lye umpiiye, inga vhavhe ishintu shooka inza vwe ine niiwe tuli ishintu shooka.

Yohani 17:21

Nkukulaavha kuuti vhonti ivho vhavhe ishintu shooka, inza vwe niiwe Taata uli muhati yaane, niine indi muhati yaaho. Nkuvhalaavhila vhavhe muhati yiitu, inga avhantu vhonti mu nsi vhiitishe kuuti iwe we unsonteleziizye.

Yohani 17:24

“We Taata, nkwanza kuuti vhe umpiiye, vhavhanje pooka niine pe nkuvha, inga vhavhulolaje uvhushindamu vhwe umpiiye, mwe pe wánkunzite kufuma lwe ni nsi yishiili kupelwa.

Yohani 17:26

Mbamanyisiizye izina lyaho, havhili kwe njendeelele kuvhomba vhwevhulo, inga vhakundane inza vwe unkunzite ine, havhili niine imbe muhati zyavho.”

Yohani 17:3

Uvhulanzi uvhwa shiima uvhwo vhukuposheelwa kwi idala ilya vhantu kukumanya kuuti iwe we Mulungu weeka uwa nalyoli, havhili kumanya niine kuuti ne Yeesu Chilisiti ne untumile ku kwavho.

Yohani 17:8

mwe pe mbavhuziizye amazwi gonti ge wámbuziizye. Vhoope vhagaposheleeye, havhili vhamanyile kuuti nalyoli mfumile ku kwaho, havhili vhitisile kuuti iwe we unsonteleziizye.

Yohani 3:17

Yeenya, uMulungu atánsonteleziizye ne Mwana waakwe kuvhalonga avhantu avha mu nsi umu, nkandi kuvhapoha.

Yohani 6:56

Umuntu wonti we akulya umuvhili waane, nu kumwela amavhanda gaane, akujendeelela kuvha muhati yaane, niine nkujendeelela kuvha muhati yaakwe.

1 VaKolinti 1:30

UMulungu wuuyo we avhavhiisile imwe kuvha nu vhuliilani nu Chilisiti uYeesu. Uweene amuvhiisile uChilisiti kuvha vhushindamu vhwitu uvhwa njeele. Havhili kwi idala ilya Yeesu, iswe tuvhaziliilwe kuuti twe vhagolosu pilongolela ilya Mulungu, twe vhafinjile, havhili tutavhuliilwe.

2 VaKolinti 5:21

UMulungu ámuvhiisile uChilisiti we atali nu vhutalamalandu kuvha nu vhutalamalandu ku zyitu, inga kwi idala ilya Chilisiti tuvhe nu vhuliilani nu Mulungu mu vhugolosu vhwakwe.

VaGalati 3:28

Ishi pe kutaliipo kusugaana uMuyuuda na we te Muyuuda, nu muzya nu musatushe, nu mwanaavuli nu mwantanda, mwe pe mwenti muli ishintu shooka mwa Chilisiti uYeesu.

Filipi 3:15

Ishi iswe twe tusimfile mu lwitiho, tusiivhaje ziniizyo. Poosye inga mukusiivha izinji ku nongwa yonti, yoope iyo uMulungu alivhalolesezya apazelu.

Kolosi 1:28

UChilisiti uyo we tukuvhalumbiilila, tukuvhasoha nu kuvhasambiilizya avhantu vhonti ku vhushindamu uvhwa njeele vhwonti. Tukuvhomba isho, inga tuvhaleete vhonti pilongolela ilya Mulungu she vhagomile kwi idala ilya kusopenkana nu Chilisiti.

Kolosi 2:2

Nkuvhomba ishi, inga mwenti amooyo giinyu gagome. Havhili musopenkane pooka ku shikunzi, nu kuvha nu vhumanyi vhwe vhukuuvhapa uvhwanalyoli. Pe mulivhumanya uvhuzigizigi uvhwa Mulungu, kwe kuuti uChilisiti wuuyo.

Kolosi 3:14

Ipiti kuluusya izyo zyonti mukundanaje, mwe pe ishikunzi she shikutuvhiiha swenti mu vhuliilani vhwe vhulunjisile.

1 Peteli 5:10

Ileelo lwe mwayimba ku havhaliilizyo hansi, uMulungu alivhasengaanya nu kuvhasuvhaalizya nu kuuvhapa amaha nu kuvhaavwa kuvha nu lwalo ulwa maha mu lwitiho lwinyu. Uweene wu Mulungu uwa vhwila mu zyonti, ávhiisite kutuushila kwa Chilisiti uYeesu, kuuti mwinjile mu vhushindamu vhwakwe uvhwa shiima.

1 Yohani 1:3

Tukuvhakumusizya inongwa izya Yeesu uyo, we twámuvhwenyi nu kumwivwa, inga muvhe nu vhuliilani pooka niiswe. Mu vhuliilani uvhwo tuli pooka nu Taata uMulungu, nu Mwana waakwe uYeesu Chilisiti.

1 Yohani 3:1

Yeenyi vwe uTaata uMulungu atukunzite nkaani. Akutwita kuuti swe vhaana vhaakwe! Mwe muumwo, nalyoli vwe tuli. Ileelo avhantu vhe vhatakumushindiha uMulungu, vhatatumanyile, mwe pe vhatamumanyile uweene.

1 Yohani 4:19

Iswe tuli ni shikunzi, mwe pe uweene we átalisile kutukunda.

Ishitushizya 3:9

Yeenyi, ndivhaleetela imwe avha mwi isinagoogi ilya Seetano vhe vhakuyitaha kuuti Vhayuuda, ileelo lilenga. Ndivhapela vhinze kukusugamilila nu kumanya kuuti nkukunzite.