Yakobu 3:13 - ULufingwi uLupwa

¹³ Ishi kuli limwe, inga kuli umuntu we ali nu vhushindamu uvhwa njeele, avhulolesye vhwenevhwo ku lujendo lwakwe ulwinza. Havhili avhombaje imbombo ku vhutonsu vhwe vhukufumiilana nu vhushindamu uvhwa njeele.

Tesitamenti Umupwa 1965

¹³ Wʼunanu kulʼimwe uwanjele, wʼasheṿile? Wʼalolesyʼimbombo zyakwe izya lujendʼulwinza, muvutelefu vwa njele.

Yakobu 3:13 ပူးပေါင်းရင်းမြစ်များ

Matayi 11:29

Mwitishe kulongolwa niine, ngati nkambaku zye zipinyiilwe ni ijooko, musambiilile kuli ine, mwe pe ine ne mutonsu havhili njisiizye mu mwoyo waane, pe niimwe kwe muvhe nu vhutehamu mu mooyo giinyu.

Matayi 21:5

“Muvhavhuuzye avhantu avha mu nkaaya iya Sayuuni kuuti, ‘Yeenya, uMwene wiinyu akwinza kuli imwe. Uweene mutonsu, alimbiiye pa ndogomi, indogomi inyaana.’”

Matayi 5:5

Vhalosiitwe avhatonsu, mwe pe uMulungu aliivhapa insi.

Matayi 7:24

“Pe ishi, umuntu we akugatejeelezya amazwi gaane nu kugalema, aliivha ngati muntu uwa vhushindamu uvhwa njeele we ázenzile inyumba yaakwe pi iyalaawe.

1 VaKolinti 6:5

Nkuyanga vhwevhulo, inga mulole insoni. Ishi pahati yiinyu ataliipo wumo we ali nu vhushindamu uvhwa njeele, we angalonzya amalandu aga vhamwavho?

2 VaKolinti 10:1

Ishi, ine ne Paavhuli ne nkuloleha ne mutonsu lwe indi pooka niimwe, ileelo nkuloleha ne muhali lwe indi ukutali niimwe, nkuvhalambiilizya ku vhwahayiisye na ku vhutonsu uvhwa Chilisiti,

2 VaKolinti 8:24

Ishi muvhalolesyaje avhantu ivho ishikunzi shiinyu, inga ivivhanza vimanye kuuti, zye tukuyitumvwa ku zyinyu, zya nalyoli.

VaGalati 5:23

nu vhutonsu nu kuyikonzya. Lutaliipo ululajizyo lwe lukuhaana izyo!

VaGalati 6:1

Vhamwitu, inga umuntu aagwa mu vhutalamalandu, imwe mwe mukulongolwa nu Mupepo mumusohaje ku vhutonsu vhwe vhukufuma kwa Mupepo, inga aleshe uvhutalamalandu vhwakwe. Havhili muvhanje minso, inga niimwe mutahinze mulingwe kululandata ulujendo lwakwe.

VaGalati 6:4

Ileelo mwenti mwenyelezyaje ulujendo lwinyu. Inga mukuvhomba inyinza, pe mungayitiima ku ziila zye muzivhomvile imwe vhweleele, ishisita kuholanya na zye avhanji vhavhomvile.

VaEfeso 4:2

Muvhanje nu vhwahayiisye, havhili muvhanje mwe vhatonsu ku zyonti. Mujimbililanaje nu kuswilana ku shikunzi.

Filipi 1:27

Ileelo ulujendo lwinyu luvhe inza vwe Izwi iLyinza ilya Chilisiti likwanza. Pe inga nkwinza kuvhavuula, poosye inga ntaliipo, inivwaje inongwa zyinyu kuuti mukusimpa ku mwoyo wooka. Havhili inivwaje kuuti, mukulwila ulwitiho ulwa Izwi iLyinza pooka.

Kolosi 3:12

Ishi, mwe pe mwe vhasaavhulwa avha Mulungu, havhili mwe vhafinjile vhe avhakunzite, muvhe nu mwoyo uwa vhwila nu mwoyo umwinza nu vhwahayiisye nu vhutonsu nu vhujimbiilizu.

1 Timoti 4:12

Atahaavhe umuntu uwa kukusuufwa, mwe pe we mujaaha, nkandi uvhe we shiholanyo ishinza ku vhiitisi, mu hayanjile haaho na mu lujendo lwaho na mu shikunzi shaaho na mu lwitiho lwaho na ku mwoyo waaho umugolosu.

1 Timoti 6:11

Ileelo iwe we muntu wa Mulungu, uzishimbile izyo zyonti. Ulandate ku mute ingolosu nu lujendo ulwinza pilongolela ilya Mulungu nu lwitiho ni shikunzi nu vhujimbiilizu nu vhutonsu.

2 Timoti 2:25

Inga avhantu vhakudalinkana nawo, avhasohaje ku vhutonsu. Lumo uMulungu angaavhapa kuvhuleha uvhutalamalandu vhwavho vhwonti, nu kuvhumanya uvhwanalyoli.

uTiiti 3:2

Patahaavhe avhantu vhe vhakuligana, poosye avha ivho, nkandi vhajimbililaje nu kulolesya uvhutonsu ku vhantu vhonti.

VaHebuli 13:5

Mutavhanje nu lupapilo ulwa mpiiya, nkandi amooyo giinyu gitihaje kuuti vikwiliiye vwe muli navwo. Nkuvhavhuuzya vhwevhulo, mwe pe uMulungu áyanzile átili, “Te nkakuleshe, poosye kukuluvwa naalumo.”

Yakobu 1:21

Pe ishi, muvhuleshe uvhuhandamanu vhwonti nu vhuvhiivhi vhwe muli navhwo. Muposheele ku vhutonsu izwi liila lye uMulungu alivhiisile mu mooyo giinyu. Izwi ilyo lye lili na maha aga kuvhapoha.

Yakobu 2:18

Ileelo umuntu wumo angati, “Avhantu vhamo vhali nu lwitiho, avhamwavho vhali ni mbombo inyinza.” Uyo ingamwamula kuuti, “Undolesye vwe ungavha nu lwitiho ishisita kuvha ni mbombo inyinza. Ine ku mbombo inyinza, nkukulolesya vwe ulwitiho lwane luli.”

Yakobu 3:1

Mwe vhamwitu, kuli imwe kutahaavhe avhasambiilizi avhinji avha izwi ilya Mulungu, mwe pe mumanyile kuuti isiku ilya kulongwa, uMulungu alitulonga iswe swe vhasambiilizi nkaani kuluusya avhanji.

Yakobu 3:17

Ileelo vhe vhakuvha nu vhushindamu uvhwa njeele vhwe vhukufuma kwa Mulungu, amooyo gaavho mazelu. Ivho vhe vhakusungwa kuvha nu vhutehamu na vhantu avhanji, vhatonsu, havhili vhali nu mushinzi. Muhati zyavho vhizuuye uvhwila ni mbombo inyinza. Vhatakuvhomba uvhunyala ku vhantu vhamo, havhili vhatali ni shifumbo.

1 Peteli 1:15

nkandi muvhanje mwe vhafinjile mu lujendo lwinyu lwonti, inza uMulungu we ávhiisite vwe mufinjile.

1 Peteli 2:12

Muvhanje nu lujendo ulwinza pilongolela ilya vhantu vhe vhatamwitisile uMulungu. Pe inga vhakuvhayanga kuuti mwe vhavhomba mbiivhi, vhazilolaje imbombo zyinyu inyinza, inga vhahamutiime uMulungu ku zyinyu, isiku ilya kwinza kuvhalonga avhantu vhonti.

1 Peteli 2:9

Ileelo uMulungu ávhasavhuuye imwe kuvha mwe vhantu vhaakwe. Imwe mwe vhapuuti mu vhumwene vhwakwe, havhili mwe vhantu avhafinjile. UMulungu ávhasavhuuye imwe, inga mukumusyaje imbombo zyakwe impiti. Uweene ávhiisite kufuma mu shiisi nu kuvhinjizya mu vhuzelu vhwakwe uvhupiti.

1 Peteli 3:4

nkandi kuvhanje mu mooyo giinyu mwe mutakuloleha. Havhili kuvhanje ku vintu ivwa kuyiyemvwa vwe vitakunanjiha, inza uvhutonsu nu vhutehamu. Ivwo vwe vili ni nsavho impiti pilongolela ilya Mulungu.