VaLoma 8:16 - ULufingwi uLupwa

¹⁶ UMupepo uyo we akuhomeshezya mu mooyo giitu kuuti iswe swe vhaana vha Mulungu.

Tesitamenti Umupwa 1965

¹⁶ ShʼuMupepo wuyo akumwitishilʼumupepo witu ukuti swe vana va Mulungu.

VaLoma 8:16 ပူးပေါင်းရင်းမြစ်များ

Matayi 5:9

Vhalosiitwe vhe vhakuvhakundanya avhamwavho, mwe pe uMulungu alivhiita kuuti vhaana vhaakwe.

uLuuka 20:36

Pooka niizyo te vhahaafwe havhili, mwe pe vhaliivha inza avhahavhizya. Vhakuvha vhaana vha Mulungu, mwe pe vhazyusile.

Yohani 1:12

Ileelo vhaala vhe vhámuposheleeye nu kumwitiha, ávhavhiisile kuvha vhaana vha Mulungu.

iMbombo izya Vhatumwa 5:32

Niiswe swe vhahoome avha zyonti izyo, pooka nu Mupepo uMufinjile, we uMulungu avhapiiye vhonti vhe vhakumushindiha.”

VaLoma 8:14

Vhonti vhe vhakulongolwa nu Mupepo uwa Mulungu vhe vhaana vha Mulungu.

VaLoma 8:19

Yeenya, ivipelwa vwonti vikuguliilila ku mwoyo wonti ahavhaliilizyo he uMulungu alivhalolesya apazelu avhaana vhaakwe.

VaLoma 8:23

Havhili, te vwe vipelwa vweka vwe vikuvhuvhula ku vhuvhaavi. Niiswe vhweleele tukuvhuvhula nkaani mu mooyo giitu, poosye inga tupeliilwe uMupepo uMufinjile we shipeelwa ishitanzi isha Mulungu. Tukuvhuvhula, mwe pe tukuguliilila kuuti uMulungu aatupe amaha gonti aga kuvha swe vhaana vhaakwe, kwe kuuti, kugatavhula amavhili giitu.

VaLoma 8:26

Pooka niizyo, uMupepo uMufinjile we akutwavwaga mu vhuyeyevhazu vhwitu, mwe pe iswe tutamanyile vwe yikwanzilwa kulaavha, nkandi uMupepo uMufinjile wuuyo akutulaavhila ku nkuuta iya vhuswimiilizu ye yitangalondovholwa.

VaLoma 9:26

Havhili, “Poope ipo pe vhívuuye kuuti, ‘Imwe te mwe vhaane,’ ipo vhaliyangwa kuuti, ‘Vhaana vha Mulungu uMulanzi.’”

VaLoma 9:8

Amazwi igo kwe kuuti, avhaana vhe vhápafwilwe kulandatana na vwe uAabulahamu ahanzaga, vhatakuvhaazilwa kuuti vhaana vha Mulungu, nkandi avhaana vha Aabulahamu vhe vhápafwilwe kulandatana nu lufingwi ulwa Mulungu vhe vhakuvhaazilwa kuuti vhaana vha Mulungu.

2 VaKolinti 1:12

Ishi iswe tukuyitumvwa kuli ili: Tukuyilola mu mooyo giitu kuuti mu nsi umu, inkaani kuli imwe, twálandiiye ku vhugolosu, havhili na ku mwoyo umuzelu kufuma kwa Mulungu. Tutávhomvile vhwevhulo ku vhushindamu vhwitu uvhwa njeele, nkandi ku vhwila uvhwa Mulungu.

2 VaKolinti 1:22

nu kutuvhiiha ishilemezanyo kuvha swe vhantu vhaakwe, nu kumuvhiiha mu mooyo giitu uMupepo uMufinjile, inga avhe wu hapinjiha ku zye áfinzile kuutupa.

2 VaKolinti 5:5

UMulungu we atusenganiziinye izyo, havhili atupiiye uMupepo waakwe, inga tumanye kuuti nalyoli vwe ziliivha.

2 VaKolinti 6:18

Havhili uMWENE uMulungu uwa Maha Gonti akuyanga akuti, “Kwe mbe ne Taata wiinyu, niimwe kwe muvhe mwe vhaana vhaane avhanaavuli na vhalindu.”

VaGalati 3:26

Kwi idala ilya lwitiho, imwe mwenti mwe vhaana vha Mulungu, mwe pe musopenkiine nu Chilisiti uYeesu.

VaGalati 4:6

Ishi, mwe pe twe vhaana vhaakwe, uMulungu amusonteleziizye uMupepo uwa Mwana waakwe mu mooyo giitu, uMupepo we akutuvhiiha kuuti tumwitaje uMulungu tutinji, “Aba,” kwe kuuti, “Taata.”

VaEfeso 1:13

Niimwe vhweleele mwe te mwe Vhayuuda, mwívuuye izwi ilya nalyoli, kwe kuuti Izwi iLyinza ilya kuvhapoha. Lwe mwivwa muhamwitiha uChilisiti, woope uMulungu ahavhalemezanya ni shilemezanyo kulolesya kuuti mwe vhaakwe. Ishilemezanyo isho, wu Mupepo uMufinjile we áfinzile kuutupa.

VaEfeso 4:30

Mutamuvhiihaje uMupepo uMufinjile kuuti aswimililwaje. Uweene shilemezanyo isha kulolesya kuuti, mwe vhantu vha Mulungu, havhili akuhomeshezya kuuti isiku liliyinza lye uMulungu alivhatavhula imwe.

1 Yohani 3:1

Yeenyi vwe uTaata uMulungu atukunzite nkaani. Akutwita kuuti swe vhaana vhaakwe! Mwe muumwo, nalyoli vwe tuli. Ileelo avhantu vhe vhatakumushindiha uMulungu, vhatatumanyile, mwe pe vhatamumanyile uweene.

1 Yohani 3:10

Pe ishi, umuntu we atakuvhomba ingolosu, poosye we atakumukunda uwamwavho, uyo te mwana wa Mulungu. Isho vwe tukumanya uvhusugaano uvhwa vhaana vha Mulungu, na vhaana vha Mukwalanzi.

1 Yohani 3:2

Mwe vhankundwa, ishi iswe swe vhaana vha Mulungu, ileelo yitamanyisile apazelu vwe tuliivha. Tumanyile kuuti ahavhaliilizyo he uChilisiti aligaluha havhili, tuliholana nawo, mwe pe tulimulola vwe ali.

1 Yohani 4:13

Tumanyile kuuti tukulandila ku vhuliilani nu Mulungu, woope uMulungu akulandila ku vhuliilani niiswe. Tumanyile vhwevhulo, mwe pe atupiiye uMupepo waakwe.

1 Yohani 5:10

Umuntu we akumwitiha uMwana wa Mulungu, ayitisile kuuti uvhwahoome uvhwo vhwa nalyoli. Ileelo we atakumwitiha uMulungu, akumuvhiiha uMulungu kuuti ali ni ilenga, mwe pe atavhwitisile uvhwahoome vhwe uMulungu avhufumwizye kuzya Mwana waakwe.

Ishitushizya 21:7

Ula we alipoota indingo, aliposheela isho, niine ndiivha ne Mulungu waakwe, woope aliivha mwana waane.