VaHebuli 7:27 - ULufingwi uLupwa

²⁷ Avhapuuti avhapiti vhahanzilwaga kufumwa impuutile izya vhutalamalandu vhwavho. Lwe vhavhomba vhwevhulo, pe vhahafumwaga impuutile izyamwavho ku vhutalamalandu uvhwa vhantu avhanji. Havhili vhahavhombaga vhwevhulo ulwinji. Ileelo uYeesu atávhomvile inza avhapuuti avhapiti ivho. Uweene áyifumwizye pa shihovhenkanyo lwoka vhweleele ku vhutalamalandu uvhwa vhantu vhonti.

Tesitamenti Umupwa 1965

²⁷ Pakuti atavanje fwe vashiputo avapiti vanava ve shima amanda gonti isuti vakufinjila imputile zya pavutalamalandu vwavo vuvo, inga pe vakupitilila ukufinjila izya pavwa vantu avamwavo. Shʼuwene zinizi zyʼamazile nzila lwoka lwene pala pʼayifinjiye weka pashifinjilo.

VaHebuli 7:27 ပူးပေါင်းရင်းမြစ်များ

VaLoma 6:10

Kufwa kwakwe, áfuuye lwoka vhweleele, kuzya vhutalamalandu. Ishi mulanzi, na ku vhulanzi vhwe akulandila akumuhondezya uMulungu.

VaEfeso 2:22

Ishi, kwi idala ilya kusopenkana nu weene, niimwe mwe te mwe Vhayuuda mukuzengwa pa lwalo ulwa nyumba ye uMulungu akutendama. UMulungu akutendama mu nyumba iyo, kwi idala ilya Mupepo waakwe.

VaEfeso 5:2

Mukundanaje ahavhaliilizyo honti, inza vwe uChilisiti ahatukunda nu kufwa ku zyitu. Ahayifumwa inza impuutile iya mununsi umwinza ye yikumuhondezya uMulungu.

uTiiti 2:14

UYeesu we áyifumwizye ku zyitu, inga atutavhule kufuma mu vhutalamalandu vhwonti nu kutuzelufwa tuvhe swe vhantu vhaakwe vhe vhakuyifumwa ku mute kuvhomba inyinza.

VaHebuli 5:1

Yeenya, umupuuti umupiti wonti akusaavhulwa kufuma ku vhantu kumuvhombela uMulungu pa luvhambo lwavho. Akuvhafumwizya kwa Mulungu ivipeelwa ni mpuutile zyavho kuzya vhutalamalandu.

VaHebuli 5:3

Uvhuyeyevhazu vhwakwe vhwe vhukupela kuuti, woope akwanzilwa kufumwa impuutile kuzya vhutalamalandu vhwakwe wuuyo, inza vwe akufumwa impuutile kuzya vhutalamalandu uvhwa vhamwavho.

VaHebuli 8:4

Inga uChilisiti ajendelelaje kulandila mu nsi umu, nkandi te mupuuti inga hansi, mwe pe mu nsi umu vhaliipo avhapuuti vhe vhakufumwa impuutile kulandatana ni ndajizyo izya Moose.

VaHebuli 9:12

Uweene áyinjiiye lwoka vhweleele aPafinjile pa Pafinjile. Atínjiiye na mavhanda aga saawe poosye aga ngwada, nkandi áyinjiiye na mavhanda gaakwe wuuyo, inga tuposheele uvhutavhuzi uvhwa shiima.

VaHebuli 9:14

Ileelo amavhanda aga Chilisiti gali na maha amapiti kuluusya aga vihanu ivwo! Uweene ku maha aga Mupepo uwa shiima, áyifumwizye kwa Mulungu kuvha mpuutile ye yilunjisile. Amavhanda gaakwe ge gakutuzelufwa na mooyo giitu kufumiilana ni mbombo zye zikuleeta uvhufwe, inga tumuvhombelaje uMulungu uMulanzi.

VaHebuli 9:25

Umupuuti umupiti uwa Vhayuuda ahinjilaga aPafinjile pa Pafinjile amaaha gonti na mavhanda aga vihanu. Ileelo uChilisiti atínjiiye ku mwanya, inga ayifumwe kuvha mpuutile ulwinji, áyifumwizye lwoka vhweleele.

VaHebuli 9:26

Inga uChilisiti ahanzilwaga kuyifumwa kuvha mpuutile ulwinji, inza vwe umupuuti umupiti ahafumwaga impuutile ulwinji, pe nkandi ahanzilwaga kuyimvilwa ulwinji kufuma pe uMulungu ápezile insi. Ileelo uweene amanda iga aga vhusililishilo, ayinzile nu kuyifumwa kuvha mpuutile lwoka vhweleele, inga atuzelufwe uvhutalamalandu vhwitu.

VaHebuli 9:28

vhwevhulo, uMulungu ámufumwizye uChilisiti, inga afwe nu kuvha mpuutile ye yilunjisile lwoka vhweleele, inga uMulungu avhaswile avhantu avhinji uvhutalamalandu vhwavho. Havhili uChilisiti aliyinza ulwa vhuvhili. Te ahinze, inga uMulungu avhaswile avhantu uvhutalamalandu, nkandi aliyinza kuvhapoha avhantu vhe vhakumuguliilila.

VaHebuli 9:7

Ileelo umupuuti umupiti weeka we ahitishilwaga kwinjila ishumba isha vhuvhili, woope ahinjilaga lwoka vhweleele ku mwaha. Havhili ahanzilwaga kwinjila na mavhanda aga shihanu she shivholiilwe nu kumufumwizya uMulungu. Ahavhombaga vhwevhulo, kuzya vhutalamalandu vhwakwe wuuyo nu vhwa vhantu avhanji vhonti vhwe vhahavhombaga ishisita kumanya.