VaHebuli 6:18 - ULufingwi uLupwa

¹⁸ Inga uMulungu afinga nu kulapa, atakwandula naalumo, mwe pe uweene atakuluma ilenga. Uweene ávhomvile ivintu ivi vivhili, kufinga nu kulapa, inga aatupe umwoyo iswe twe tushimbiliiye kuzilema nkaani ziila zye tukuzisuuvhila.

Tesitamenti Umupwa 1965

¹⁸ ukuti kuṿintu ṿivili iṿisitakuga-lunkana, ṿwe muli ṿiṿwo uMulungu atangalumʼilenga, tuvanje nulusuvizyo ulugomu iswe swe tushimbiliye ukulemʼulusuvilo lwe tuvishililwe,

VaHebuli 6:18 ပူးပေါင်းရင်းမြစ်များ

Matayi 24:35

Imwanya ni nsi viliyeepa, ileelo poosye zivhe vhuli amazwi gaane galilunjiha.”

Matayi 3:7

Ileelo uYoohani lwe avhalola aVhafalisaayi na Vhasadukaayi vhakwinza ku vhwinji, inga avhoozye, ahavhavhuuzya ahati, “Mwe vhaana vha njoha imwe! Wu naanu we avhasosile kuuti mushimbile uvhuhalazu uvhwa Mulungu vhwe vhukwinza?

uLuuka 2:25

Ahavhaliilizyo iho ku Yelusaleemu, kwáli umuntu wumo we vhahatinji uSimiyooni. Umuntu uyo áamile mugolosu, havhili ahamushindihaga uMulungu. Ahasuvhilaga kwinza ukwa we alivhapoha aVhaisilayeeli. USimiyooni ahalongolwaga nu Mupepo uMufinjile.

VaLoma 15:5

UMulungu we akuutupa uvhujimbiilizu nu kutusuvhaalizya amooyo giitu, avhavhiishe kuuti muvhe ni nsiivho zyoka lwe mukumulandata uChilisiti uYeesu.

VaLoma 3:25

UMulungu ámufumwizye uYeesu kuvha mpuutile iya kuvhakundanya avhantu nu weene, kwi idala ilya kwita amavhanda gaakwe, avhantu vhe vhakwitiha kuuti áfuuye kuzya vhutalamalandu vhwavho vhaswilwe. UMulungu ávhomvile vhwevhulo kulolesya kuuti uweene mugolosu. Yeenya, uweene ájimbiliiye, atávhapiiye isunde ku vhutalamalandu vhwavho vhwe vhátazile ahavhaliilizyo aha mwisinda.

VaLoma 3:4

Ndaali, te muumwo inga hansi! UMulungu akuvhalolesya avhantu kuuti uweene akuyanga izya nalyoli nu kuzivhomba, poosye inga avhantu vhonti vhakuluma ilenga. Yeenya, uVhusimbe uVhufinjile vhukuti, “Inga wavhavhuuzya avhantu vhaaho uvhutalamalandu vhwavho, amazwi gaaho ga nalyoli. Inga wavhalonga, uvhulonzi vhwaho vhugolosu.”

VaLoma 5:5

Ulusuuvhilo ulwo lutakutusuupizya, mwe pe uMulungu atulolesiizye ishikunzi shaakwe ishipiti mu mooyo giitu kwi idala ilya kuutupa uMupepo uMufinjile.

Filipi 2:1

UChilisiti akuuvhapa umwoyo, ni shikunzi shaakwe shikuvhasuvhaalizya. Muli nu vhuliilani nu Mupepo uMufinjile, havhili mukufwilana uvhwila.

Kolosi 1:23

Nalyoli muli isho pilongolela lyakwe, inga mukujendeelela kumwitiha uChilisiti, nu kuyigomwa nu kuvha na maha, havhili inga mutakwitiha kuleha ulusuuvhilo lwe mwáposheleeye, lwe mwivwa Izwi iLyinza. Izwi ilyo, lye avhavhomvi avha Mulungu vhakumusiizye ku vhantu vhonti avha mu nsi, havhili lye ine ne Paavhuli, ne muvhomvi uwa kukumusya.

Kolosi 1:27

Ivho vhe uMulungu asungwilwe kuvhavumbulila uvhuzigizigi uvhwo vwe vhuli nu vhudumbwe uvhwa kusukumizya ku vhantu vhe te Vhayuuda. Uvhuzigizigi uvhwo, wu Chilisiti we ali muhati yiinyu, uweene we akuvhavhiiha kuuti muvhe nu lusuuvhilo ulwa kuposheela uvhushindamu.

Kolosi 1:5

Ulwitiho ni shikunzi isho, vikufumiilana nu lusuuvhilo ulwa vipeelwa vwe uMulungu avhavhishiiye ku mwanya. Mwívuuye inongwa izya lusuuvhilo ulwo kufuma pe mwálumbililiilwe izwi ilya nalyoli, kwe kuuti Izwi iLyinza.

1 VaTesaloniki 1:10

nu kumuguliilila uMwana waakwe uYeesu kufuma ku mwanya. Uweene we uMulungu ámuzyusiizye, havhili we akutupoha mu vhuhalazu uvhwa Mulungu vhwe vhukwinza.

1 Timoti 1:1

Ukalaata uno nsimvile neene ne Paavhuli. Ine ne mutumwa uwa Chilisiti uYeesu, kufumiilana ni ndajizyo izya Mulungu uMuposhi wiitu, nu Chilisiti uYeesu we lusuuvhilo lwitu.

1 Timoti 6:12

Uyikungulaje nkaani ku vhulugu uvhwinza uvhwa kulwila ulwitiho lwitu, inga uhavhwaje uvhulanzi uvhwa shiima shiima. Uvhulanzi uvhwo vhwe uhiitilwa nu Mulungu, lwe wiitiha ulwitiho lwaho kwa Yeesu pilongolela ilya vhahoome avhinji.

2 Timoti 2:13

Inga poosye te swe vhatungamu, uweene ali she mutungamu kuli iswe, atangayihaana.”

uTiiti 1:2

Kuli izyo, vhakuvha nu vhulanzi uvhwa shiima, mwe pe uMulungu áfinzile kuutupa uvhulanzi uvhwo kufuma lwe insi yishiili kupelwa, nu Mulungu atakuluma ilenga.

VaHebuli 11:7

Mwe pe uNoowa ámwitisile uMulungu, ámushindisile uMulungu lwe amusoha ku zye zyáshiili kufumila. Pe ahagomba imbogooso, inga uMulungu amuposhe uweene pooka na vhantu avha mu nyumba yaakwe. Kwi idala ilyo, ávhalonzile avhantu avha mu nsi vhe vhatámwitisile uMulungu. Kuli izyo, uMulungu ahamuvhaazya uNoowa kuuti muntu umugolosu pilongolela lyakwe.

VaHebuli 3:11

Kuli izyo, návisiitwe nu kulapa, náyanzile nátili, ‘Nalyoli avhantu ivha te vhahinjile pa lutuuzyo lwe mbasenganiziinye.’”

VaHebuli 3:6

Ileelo uChilisiti uweene Mwana uMutungamu, havhili mwimiilizi uwa vhantu avha mu nyumba iya Mulungu. Niiswe twe vhantu vhaakwe, inga tukujendeelela kuvha nu vhudandamazu vhwitu nu kusimpa mu ziila zye tukuzisuuvhila.

VaHebuli 6:17

Woope uMulungu ahanzaga kulolesya apazelu ku vhantu vhe vhaliposheela ziila zye áfinzile kuuti te ahazyandule. Ili lye lyápeleeye kuuti ahomeshezye ulufingwi lwakwe kwi idala ilya kulapa.

VaHebuli 7:19

Mwe pe ululajizyo ulwo lutáshivhiisile ishintu naashimo kuvha shilunjisu, tupeliilwe ulusuuvhilo ulwamwavho lwe lwinza nkaani, lwe lukutuvhiiha kuvha papiipi nu Mulungu.

VaHebuli 7:21

inza vwe yisimviilwe mu Vhusimbe uVhufinjile kuuti, “UMWENE uMulungu alafile, havhili te ahandule insiivho zyakwe naalumo. ‘Iwe we mupuuti shiima.’”

1 Yohani 1:10

Inga tukuti tutavhomvile uvhutalamalandu, tukumuvhiiha uMulungu kuuti ali ni ilenga, havhili tukuvha tulihaanile izwi lyakwe.

1 Yohani 5:10

Umuntu we akumwitiha uMwana wa Mulungu, ayitisile kuuti uvhwahoome uvhwo vhwa nalyoli. Ileelo we atakumwitiha uMulungu, akumuvhiiha uMulungu kuuti ali ni ilenga, mwe pe atavhwitisile uvhwahoome vhwe uMulungu avhufumwizye kuzya Mwana waakwe.